Lucy Catherine Lloyd (7 November 1834 - 31 Augustus 1914) was saam met haar swaer, Wilhelm Bleek, die opsteller van die 19de-eeuse argief van ǀXam- en !Kung-tekste.

Lucy Lloyd
Lucy Lloyd00.jpg
Gebore
Lucy Catherine Lloyd

(1834-11-07)7 November 1834
Norbury, Engeland
Sterf31 Augustus 1914 (op 79)
NasionaliteitBrits
BeroepLinguis
Bekend virBleek-en-Lloyd-argief

BiografieWysig

Lucy Catherine Lloyd is op 7 November 1834 in Norbury, Engeland, gebore. Haar suster, Jemima, is op 22 November 1862 met Wilhelm Bleek getroud en in dieselfde jaar is hy aangestel as die kurator van die Greyversameling van die Nasionale Biblioteek van Suid-Afrika in Kaapstad.

Lucy het na Kaapstad gereis vir haar suster se troue, maar die skip het gestrand en sy het by haar suster en swaer gaan woon. Sy het hom begin help met sy navorsing oor Afrikatale, veral ǀXam, en was verantwoordelik vir omtrent twee derdes van die teks wat tot met Bleek se dood versamel is.

In 1870 het Lloyd en Bleek, wat nou saamgewerk het om die "Boesmantaal" te leer en persoonlike vertellings en folklore neer te skryf, bewus geword van die teenwoordigheid van ’n groep van 28 ǀXam-gevangenes in die Breekwatertronk en toestemming gekry om een na Mowbray te verskuif om sy taal te leer. ’n Jong man met die naam ǀAǃkúṅta is gekies. Dié was as gevolg van sy jeugdigheid egter onkundig oor sy mense se folklore en ’n ouer man met die naam ǁKábbo is toegelaat om hom te vergesel. ǁKábbo het Bleek en Lloyd se eerste werklike "onderwyser" geword. Mettertyd het ander lede van ǁKábbo se familie en ander families by Bleek en Lloyd in Mowbray gebly. Bleek en Lloyd het hulle taal geleer en neergeskryf, eers as lyste woorde en frases en later as stories oor hulle lewe, geskiedenis, folklore en gebruike.

Bleek en Lloyd het probeer om soveel moontlik antropologiese en etnografiese inligting te versamel. Dit het geslagsregisters, plekke van oorsprong, en die gebruike en daaglikse lewe van die inligtingsverskaffers ingesluit. Hoewel Bleek en Lloyd (alleen ná Bleek se dood) onderhoude met ander individue gevoer het, het hulle hulle aandag op ses |Xam-bydraers toegespits.

Ná Bleek se dood in 1975 het Lloyd sy werk voortgesit met die steun van haar suster en Bleek se weduwee, Jemima. Sy is as Bleek se opvolger aangestel as die kurator van die Greyversameling, terwyl sy haar navorsing oor |Xam voortgesit het.

Sy en haar suster Fanny is in 1883 terug na Engeland om gesondheids- en finansiële redes. Haar briewe wys sy was in dié tyd nie gesond nie ná lang tye van harde werk en geldelike kommer. Die familie het vir lang tye hele families (volwassenes sowel as kinders) gehuisves en was verantwoordelik vir uitgawes soos kos, klere en tabak.

In 1913 het Lloyd ’n eredoktorsgraad van die Universiteit van die Kaap die Goeie Hoop ontvang vir haar navorsingswerk. Sy was die eerste vrou in Suid-Afrika wat dié graad gekry het.

Lloyd is op 31 Augustus 1914 op 79-jarige ouderdom in Wynberg oorlede en is in die Wynbergbegraafplaas naby Bleek begrawe.

SkakelsWysig