Matigheid (tarotkaart)
Matigheid is gewoonlik die 14de troefkaart in tarotkaartspeletjies en die 14de Groot Arcana-kaart in pakke vir waarsêery. Dit word in albei gebruik. Die kaart beeld 'n vrou uit wat matigheid verteenwoordig. Saam met Geregtigheid en Krag is dit een van die tarotkaarte wat drie kardinale deugde uitbeeld.[1]
Identiteit van die figuur
wysigDie kaart beeld feitlik altyd 'n figuur uit wat vloeistof van een kelk in 'n ander oorgooi. Daar word na die figuur verwys as matigheid of 'n engel, hoewel ander vertolkings ook bestaan.
Paul Huson stel voor die figuur het eens Ganumedes verteenwoordig, wat die skinker van Zeus was.[2] Die figuur kan moontlik ook die godin Iris of die aartsengel Migael wees.[1] Die eerste vertolking is vanweë die reënboog wat dikwels bo haar kop voorkom en die feit dat die blomme op die Rider-Waite-tarotkaart irisse is.[3]
Beskrywing
wysigMatigheid (Italiaans: La Temperanza) verskyn in die oudste Italiaanse pakke, waarin dit VI of VII gemerk is. In die Tarot van Marseille en in die meeste moderne pakke is die kaart XIV gemerk. In die Thoth-tarot en pakke wat daardeur beïnvloed is, word die kaart "Kuns" genoem.[4]
Die oorgooi van vloeistof van een kelk in 'n ander is histories die standaardsimbool van matigheid en verteenwoordig die verdunning van wyn met water. In baie pakke is die figuur 'n engel met vlerke en staan hy of sy met die een voet in water en die ander voet op die grond. Aan die einde van die pad links is 'n kroon, wat dui op die bereiking van 'n doel of die bemeestering daarvan.[5]
Op die Rider-Waite-beeld is die Hebreeuse Tetragrammaton op die engel se bors bo die vierkant en driehoek. Op ander pakke se kaarte kom dit gewoonlik nie voor nie.
Volgens A.E. Waite se boek van 1910 Pictorial Key to the Tarot[6] het die kaart verskeie verbintenisse in waarsêery:
14 MATIGHEID – ekonomie, matigheid, spaarsaamheid, bestuur, akkommodasie. Omgekeer – dinge wat met kerke verbind word, godsdiens, sektes, priesterskap, soms selfs 'n priester; ook verdeeldheid, ongelukkige kombinasies, botsende belange.
In astrologie word Matigheid verbind met die manlike diereriemteken die Boogskutter en sy heersende planeet, Jupiter.[7]
Verwysings
wysig- ↑ 1,0 1,1 Place, Robert (2005). the Tarot: History, Symbolism, and Divination (1st uitg.). New York, New York: the Penguin Group. ISBN 1-58542-349-1.
- ↑ Huson, Paul (2004). Mystical origins of the tarot: From ancient roots to modern usage. Rochester, Vt: Destiny Books. ISBN 978-0-89281-190-8.
- ↑ O'Neill, R.V. (1986). Tarot Symbolism (1st uitg.). Fairway Press.
- ↑ Scribes, Joanne Sacred. "TAROT - The Royal Road: 14 TEMPERANCE XIV". TAROT - The Royal Road. Besoek op 16 September 2015.
- ↑ Gray, Eden. "Complete Guide to the Tarot." 1970. Crown Publishers, New York, NY.
- ↑ Waite, Arthur Edward, 1857-1942. (2005). The pictorial key to the tarot. Mineola, NY: Dover Publications. ISBN 0-486-44255-1. OCLC 57549699.
{{cite book}}: AS1-onderhoud: meer as een naam (link) - ↑ "A Taste of Tarot: Temperance & Sagittarius". Tarot.com (in Engels (VSA)). Besoek op 14 Julie 2023.
Skakels
wysig
Wikimedia Commons het meer media in die kategorie Matigheid (tarotkaart).
Hierdie artikel is in sy geheel of gedeeltelik uit die Engelse Wikipedia vertaal.
