Mooi Fees van die Vallei
Die Mooi Fees van die Vallei (Egipties: heb nefer en inet;[1] Arabies: عيد الوادي الجميل, Eid al-Wadi al-Jamil) was 'n antieke Egiptiese fees wat in die tyd van die Middelryk en daarna jaarliks in Thebe (nou Luxor) gehou is. Dit was 'n kleurryke en vrolike geleentheid vir die inwoners van Thebe.[2]
.jpg)
Die heilige barke (bote) van die windgod, Amoen-Re, sy metgesel, Moet, en seun, Chonsoe, het die tempel by Karnak verlaat en die dodetempels van afgestorwe koninklikes aan die westeroewer van die Nyl en hulle heiligdomme in die Thebaanse Nekropolis aangedoen.
Viering
wysigDie Mooi Fees van die Vallei was 'n viering van die dooies.[3] Dit kan ouer as die Opetfees wees, want dit kan teruggespeur word na die Middelryk.[2]
Dit is glo van die begin van die Middelryk af gehou ter nagedagtenis van die oorledenes.[4] Saam met die Opetfees was die heilige optog die hoofgebeure op die liturgiese kalender van Thebe.[3] Die jaarlikse fees is gehou met die volmaan van Maand Twee van die oesseisoen, Sjemoe.[5] Dit was die 10de van 12 maande op hulle kalender.[5]
Tydens die bewind van Hatsjepsoet het sy aan die hoof gestaan van beide die Opet- en die Mooi Fees van die Vallei vir Amoen.[6]
Verrigtinge
wysigAan die begin van die fees was daar 'n groot optog wat verskeie dae sou duur.[7] Die optog sou deur Amoen self gelei word,[3] van die ooste (opkomende son, nuwe lewe, rigting van die lewendes) na die weste (ondergaande son, land van die afgestorwenes).[7]
'n Standbeeld of ander afbeelding van Amoen, versier met 'n breë kraag en sonskyf,[1] sou die priesters teen die Nyl af lei in 'n seremoniële boot of bark.[2] Die bark is dan in 'n skip bekend as die Oeserhet gelaai wat bedek was met goud en edelstene.[1] Die Oeserhet is dan gevolg deur die bote van Moet en Chonsoe as deel van die Thebaanse Triade.[3]
Die optog het beweeg na die "Tempel van Miljoen Jaar van die Koning", waar die inwoners offerandes van kos en drank sowel as blomme aan die vloot gebring het.[3] Daar sou groot hoeveelhede blomme wees,[5] want die Egiptenare het geglo die blomme word gevul met die wese van die godheid.[3] Hulle het dan die blomme na hulle familielede se grafte geneem om aan hulle respek te betoon en die opwekking van hulle gees te verseker.[3]
Eindelik sou Amoen se heiligdom in die Djoser-djoseroe ("allerheiligste") gedra word om die band te herbevestig tussen die koning van die gode en die koning van die mense.[7]
Verwysings
wysig- ↑ 1,0 1,1 1,2 "Beautiful Feast of the Valley". www.hethert.org. Geargiveer vanaf die oorspronklike op 4 Augustus 2017. Besoek op 24 Junie 2014.
- ↑ 2,0 2,1 2,2 "Egypt: Grand Festivals in Ancient Egypt". www.touregypt.net.
- ↑ 3,0 3,1 3,2 3,3 3,4 3,5 3,6 "Ancient Egypt and Archaeology Web Site - AE, Deir el Bahri". www.ancient-egypt.co.uk. Besoek op 26 Februarie 2018.
- ↑ "Public religious ceremonies in ancient Egypt". www.reshafim.org.il. Geargiveer vanaf die oorspronklike op 3 Junie 2016. Besoek op 11 Junie 2014.
- ↑ 5,0 5,1 5,2 "Festivals in the ancient Egyptian calendar". www.digitalegypt.ucl.ac.uk.
- ↑ University, Charles Sturt. "NSW HSC Online". www.hsc.csu.edu.au. Geargiveer vanaf die oorspronklike op 14 Julie 2014.
- ↑ 7,0 7,1 7,2 "Beautiful Feast of the Valley". kemetic-independent.awardspace.us.
Skakels
wysig
Hierdie artikel is in sy geheel of gedeeltelik uit die Engelse Wikipedia vertaal.
