NG gemeente Delareyville

Die NG gemeente Delareyville is 'n gemeente van die Nederduitse Gereformeerde Kerk in die Sinode van Goudland (voorheen Wes-Transvaal).

Die NG kerk Delareyville, ingewy op 3 Mei 1936. Die argitek was Gerard Moerdyk.

Ds. J.M.C. van den Berg was die leraar hier van 1945 tot 1948 toe hy 'n beroep aanneem na die NG gemeente Bothaville.

Ds. J.F. Wohlitz, leraar van 1960 tot sy aftrede op 30 November 1980.

Die kerkgebou is geleë in Generaal De la Reystraat, Delareyville. Tans (2023) is die leraar dr. S.J.P. Slabbert. In 2013 was hier 112 doop- en 421 belydende lidmate. In 2015 het dit afgeneem tot onderskeidelik 97 en 355. In die NG Kerk Jaarboek van 2021 was die syfers 102 en 343.

Stigting

Die Herv. of Geref. gemeente Delarey is op 20 September 1912 in 'n privaat woning op Barberspan, wat aan “de broeder H. Lemmer" behoort het, gestig. Die dorpie wat as sentrale kerkplek moes dien, het die naam Salt Waters gedra. Op 6 Junie 1914 besluit die kerkraad: “Dat een verzoek . . . gezonden worden aan het Gouverment vragende om de naam ‘Salt Waters' veranderd te krijgen na ‘De la Rey’." Hierdie verandering van naam is deur die regering toegestaan. Die eerste vergaderplek van die gemeente was 'n sinkgeboutjie met 'n seildak. Dit is later verander in die kerksaal wat 25 jaar lank as kerkgebou diens gedoen het. Op die Transvaalse Sinode van 1950 is die gemeentenaam na Delareyville verander. Die gemeente het toe byna 2 000 siele getel, van wie 1 150 belydende lidmate was.

Kerkbou

Op 20 Oktober 1917 besluit 'n gemeentevergadering om, “daar het gebou waarin wij sijn niet doelmatig is, om als kerk te dienen", 'n nuwe kerk te bou en 'n boukommissie is benoem. Daardie besluit is eers op 3 Mei 1936 verwesenlik toe 'n sierlike kerkgebou, volgens die plan van die bekende argitek Gerard Moerdyk, sonder skuld ingewy is. Die kerkgebou troon bo die ander dorpsgeboue uit en kan van ver af gesien word, en staan hier as simbool van 'n vroeër sukkelende gemeente se geloofsvertroue. Dit is 'n nasionale gedenkwaardigheid.

Leraars

Die gemeente se eerste herder was ds. C.G.R. du Toit, wat op 17 Februarie 1913 as jong predikant bevestig is. Daarna volg di. A.M. De V. Esterhuysen (1919–1922), S.T. Potgieter (1924–1945) en J.M.C. van der Berg (1945–1948). Die volgende leraar was ds. G.S. Mare (van 1948 tot 1959). Tydens ds. G.S. Mare se bediening is ds. S.J. du Preez beroep (1956-1959) en vir 'n paar jaar was daar twee leraars in NG Delareyville. Na ds. Mare se aftrede het die kerkraad nie weer 'n medeleraar beroep nie, en ds. du Preez was vir 'n jaar alleen leraar. In 1960 is Ds. J.F. Wohlitz beroep en hy het vir 20 jaar as leraar in die gemeente opgetree, tot sy aftrede in 1980. Ds. J.L.O. Bruwer is leraar vanaf 1981 tot 1988, waarna ds. C.F. Sieberhagen die beroep na Delareyville aanneem. Hy is leraar in die gemeente tot 1996. Hy verwerf sy Ph.D in 2000 en is tans verbonde aan die Bybelgenootskap van Suid-Afrika. Tussen 1996 en 1997 word NG Delareyville deur Ds. F.J. Venter as tentmaker tydelik bedien. In 1997 word Ds. T.Oosthuizen beroep en hy werk in die gemeente tot 2006. In 2007 word ds. S.J.P. Slabbert beroep en hy is tans (2023) steeds leraar in die gemeente. In 2018 vewerf hy sy Ph.D.

Leraars - Opsomming

• Charl Guillaume Rocher du Toit (1912-1918)
• Abraham Matthys de Villiers Esterhuysen (1920-1922)
• Salomon Theodorus Potgieter (1924 - 1945)
• Jan Mattheús Christiaan van den Berg (1945 - 1948)
• Gabriël Stefanus Maré (1948-1959)
• Stepanus Johannes du Preez (1956-1959)
• Johan Frederik Wohlitz, (1960 – 1980)
• Jan Louis Oosthuizen Bruwer (1981-1988)
• Charl Francois Sieberhagen (1988-1996)
• Frederick Johannes Venter (1996-1997) - Tentmaker
• Theo Oosthuizen (1997-2006)
• Sarel Johannes Petrus Slabbert (2007 - huidig)

Orrel

Op 10 Junie 1939 is 'n orrelfonds in die lewe geroep. Maar, as gevolg van die Tweede Wêreldoorlog, moes die gemeente meer as nege jaar op die orrel wag. Die pragtige Compton-pyporrel kon ook sonder enige skuld ingewy word.

Sending

In 1925 is 'n sendinggemeente hier gestig. Op 13 November 1943 besluit die kerkraad om 'n sendeling te beroep. Eerw. C.J. Bothma is in 1944 as eerste sendeling bevestig. Hy is opgevolg deur eerw. H.V. van Huyssteen. Ná hom is die sendinggemeente deur eerw. W.J.C. Olwagen bearbei.

In 1952 berig Ons gemeentelike feesalbum: “Daar was jare van kommer en sorg, jare waarin die fondse soms skraal geword het, maar met dankbaarheid teenoor die Here het daar die laaste jare 'n kentering gekom en is die offers van die gemeente bemoedigend. In 1951 is oor die £5 000 aan Dankoffers alleen ingebring. Die gemeente Delareyville, op die vlaktes van Wes-Transvaal, is vandag 'n vooruitstrewende gemeente, juis omdat sy vertroue op die God van die Eeue gevestig bly.”

Bronne

• (af) Olivier, ds. P.L., 1952. Ons gemeentelike feesalbum. Kaapstad en Pretoria: N.G. Kerk-uitgewers.
• Small, Mario (samesteller). 2013. Jaarboek van die NG Kerke. Wellington: Tydskriftemaatskappy van die NG Kerk NPC - 'n divisie van Bybel-Media.
• van der Merwe, Gerdrie. 2012. Skildery van liefde en genade. Die verhaal van die NG Gemeente Delareyville. 1912-2012. Trompsburg. Merwede Uitgewers

Eksterne skakels

• (en) Foto's van die kerkgebou op Artefacts.co.za URL besoek op 15 September 2015.