Portugese Rugbyfederasie
Die Portugese Rugbyfederasie (Portugees: Federação Portuguesa de Rugby, afgekort “FPR”) is die bestuursliggaam wat rugby en sewesrugby in Portugal beheer. Die beheerliggaam is in 1926 gestig en in Lissabon gesetel. Sedert 1988 verteenwoordig dit Portugal by Wêreldrugby en sedert 1934 ook by Rugby Europa (“RE”).
| Portugese Rugbyfederasie | |
|---|---|
 Kenteken van die Portugese Rugbyfederasie
| |
| Portugese naam | Federação Portuguesa de Rugby |
| Afkorting | FPR |
| Land |  Portugal
|
| Sportsoorte | Rugby, Sewesrugby |
| Stigting | 1926 |
| Lid van | Wêreldrugby |
| Aangesluit in | 1988 |
| Vastelandse beheerliggaam | Rugby Europa |
| President | Carlos Amado da Silva |
| Setel | Lissabon, Portugal |
| Amptelike taal | Portugees |
| Amptelike webwerf | fpr.pt |
Geskiedenis
wysigDie Portugese Rugbyfederasie is in 1926 gestig en het in 1988 ’n volle lid van die Internasionale Rugbyvoetbalraad (IRVR; nou Wêreldrugby) geword.[1] Daarbenewens was die Portugese Rugbyfederasie in 1934 ’n stigtingslid van die vastelandse beheerliggaam Fédération internationale de rugby amateur (FIRA, nou Rugby Europa).[2]
Taak
wysigDie Portugese Rugbyfederasie organiseer verskeie nasionale spanne, insluitend Portugal se nasionale seniorrugbyspan vir mans (“die wolwe”), vroue en jeug. Die FPR hou ook toesig oor sewesrugby in Portugal en aangesien dit ’n Olimpiese sportsoort is, werk hulle met die Portugese Nasionale Olimpiese Komitee saam. Naas die amptelike nasionale span roep die FPR ook ander keurspanne byeen. Daarbenewens bestuur die beheerliggaam kinder- en jeugrugby in Portugal. Kinders en jongmense word reeds op skool aan rugby bekend gestel en na gelang van hul belangstelling en talent begin hul met hul afrigting. Net soos ander rugbylande beskik Portugal oor ’n o/20-nasionale span wat aan die Europese en Wêreldrugby o/20-kampioenskap deelneem.[3] Die Portugal Sevens is die Portugese sewesrugbyspan en hulle neem aan internasionale toernooie soos Wêreldrugby se Sewesreeks, Sewesrugbywêreldbeker en Olimpiese Somerspele deel.
Die beheerliggaam reël ook die plaaslike kompetisies. Die hoogste rugbyliga in Portugal is die Campeonato Português de Rugby, waaraan twaalf spanne deelneem. Weens die beter finansiële moontlikhede verkies baie spelers egter ’n loopbaan by ’n klub in Frankryk of ’n ander Wes-Europese land. In Portugal aktiewe nasionale spelers draf meestal uit vir die professionele span Lusitanos XV wat sedert 2021 aan die Rugby Europa Superbeker deelneem.
Kenteken
wysigDie Portugese Rugbyfederasie se kenteken toon die wapen van Portugal in rooi met die belettering Portugal Rugby daaronder. Die nasionale span se bynaam is Os Lobos (“die wolwe”), ontleen aan die Iberiese wolf.
Verwysings
wysig- ↑ (en) "Portugal". Wêreldrugby. Besoek op 30 Maart 2024.
- ↑ (en) "Historical Rugby Milestones 1930s". Rugby Football History. Besoek op 30 Maart 2024.
- ↑ (en) "World Rugby U20 Championship". Wêreldrugby. Besoek op 30 Maart 2024.
Eksterne skakels
wysig- (pt) Amptelike webwerf