Robert Baden-Powell
Lord Robert Stephenson Smyth Baden-Powell (22 Februarie 1857 – 8 Januarie 1941) was 'n Britse luitenant-generaal en stigter van die jeugbeweging die Boy Scouts.[7]
| Robert Baden-Powell | |
|---|---|
.png)
| |
| Geboortedatum | 22 Februarie 1857 |
| Geboorteplek | Paddington, Londen, Engeland |
| Sterfdatum | 8 Januarie 1941 (83 jaar oud) |
| Sterfplek | Nyeri, Kenia |
| Lojaliteit | .svg){kind=small} Verenigde Koninkryk
|
| Diens/Tak |  Britse leër
|
| Jare in diens | 1876–1910 |
| Rang | Luitenant-generaal |
| Veldslae/oorloë | Anglo-Ashanti-Oorloë Tweede Matabele Oorlog Tweede Vryheidsoorlog |
| Toekennings | * Ashanti Star (1895)[1]
|
| Ander werk | Stigter van die Boy Scouts (Verkennersbeweging) |
Hy is gebore in Oxford en word in 1876 'n soldaat, waarna hy militêre diens doen in Indië, Afganistan en Suid-Afrika. In 1896 word hy hoof-stafoffisier in die Matabele-oorlog in die teenswoordige Zimbabwe en skryf hy ook The Matabele Campaign. Drie jaar later word hy generaal-majoor na die beroemde verdediging van Mafeking teen die Boere. Van 1900 tot 1903 organiseer hy die South African Constabulary.
Sy pa is in 1860 dood en sy ma het al ses haar seuns aangemoedig om die natuur te bestudeer. Hy het die leër as beroep gekies nadat hy goed gepresteer het in ʼn militêre eksamen. In September 1876 het hy met sy militêre diens in Indië begin. Terwyl hy hiermee besig was, het hy padvindery begin ontwikkel as deel van militêre opleiding.
Na sy opleiding het hy hom op verkenningswerk toegelê. Hy het sy tegniese kennis in twee boeke uiteengesit naamlik Reconnaissance and Scouting (1884) en Cavalry Instruction (1889). Op pad terug na Brittanje in 1884 het Baden-Powell se regiment tydelik by Natal aan wal gegaan en daar gebly om militêre verkenningswerk in die Drakensberg te doen. Hy het die geleentheid gebruik om 'n opname van die minder bekende passe in die Drakensberg te maak. Na 'n tyd in Engeland het hy in 1888 weer na Suid-Afrika gekom om aan die veldtog teen die Zoeloekoning Dinizulu deel te neem – as aide-de-camp van sy oom, lt.-genl. H.A. Smyth.
Na twee jaar in Indië is hy in 1899 na die destydse Betsjoeanaland (Botswana) en Matabeleland gestuur om troepe te werf vir die twee gebiede se verdediging. Aan die begin van die Anglo-Boereoorlog (1899-1902) het hy 'n deel van die mag gebruik om Mafeking (tans Mafikeng) te verdedig teen die Boeremagte onder genl. Piet Cronje. Op 17 Mei 1900 het die Britse troepe Mafeking ontset.
Die nuus van die ontsetting het gou in Brittanje versprei en Baden-Powell groot aansien besorg. Die belangrikste organisatoriese taak wat hy daarna in Suid- Afrika verrig het, was die daarstelling van die South African Constabulary, ʼn militêr geskoolde en georganiseerde polisiemag in die oorlogsgebied. In 1903 het Baden-Powell na Brittanje teruggekeer en in 1910 met die rang van luitenant-generaal uit die Britse militêre diens getree. Tydens sy diensjare in Indië is hy baie deurverkenningswerk geïmponeer en na 1910 het hy hom gewy aan 'n nuwe beweging, die Boy Scouts, wat oral belangstelling gewek het.
Hy het die Boy Scouts-beweging op 'n wêreldwye grondslag georganiseer. In 1925, en later weer in 1936, het hy as hoofverkenner (Chief Boy Scout) van die organisasie Suid-Afrika besoek. Die beweging is deels deur sy oorlogsreputasie en deels deur die gewildheid van sy Aides to Scouting besiel. Die verskyning van Scouting for Boys in 1908, nadat sir C. Arthur Pearson die stigting van 'n afsonderlike organisasie gefinansier het, het nie net groot opgewondenheid in Brittanje veroorsaak nie, maar ook in die res van die wêreld.
In 1909 het 'n saamtrek by die Crystal Palace in Londen 11 000 Boy Scouts gelok. Onder aanvoering van sy suster, Agnes, as presidente, het 'n soortgelyke wêreldorganisasie vir meisies, bekend as die Girl Guides, na 1910 ontstaan. Baden-Powell het 'n aantal Britse dekorasies vir sy werk gekry en ses eredoktorsgrade is ook aan hom toegeken vir sy waardevolle diens aan die jeug.
In 1922 word hy tot ridder geslaan en in 1929 vereer met 'n baronetskap. Vier jaar later skryf hy sy outobiografie, Lessons of a Life-time. Hy is in 1941 in Kenia oorlede.
Verwysings
wysig- Wêreldspektrum, 1982, ISBN 0908409435, volume 2, bl. 139, 140
- ↑ (en) "Ashanti Campaign, 1895". The Pine Tree Web. Geargiveer vanaf die oorspronklike op 19 September 2015. Besoek op 17 Junie 2009.
- ↑ (en) "Matabele Campaign". The Pine Tree Web. Geargiveer vanaf die oorspronklike op 14 Desember 2006. Besoek op 2 Desember 2006.
- ↑ (en) "Queen's South Africa Medal". The Pine Tree Web. Geargiveer vanaf die oorspronklike op 2 Desember 2002. Besoek op 2 Desember 2006.
- ↑ (en) "Kings's South Africa Medal". The Pine Tree Web. Geargiveer vanaf die oorspronklike op 4 Januarie 2003. Besoek op 2 Desember 2006.
- ↑ "Fact Sheet: The Silver Buffalo Award". Fact sheet (in Engels). Boy Scouts of America, Troop 14. 1926. Geargiveer vanaf die oorspronklike op 2 Januarie 2016. Besoek op 2 Desember 2006.
- ↑ (en) "The Library Headlines". ScoutBase UK. Geargiveer vanaf die oorspronklike op 15 Maart 2005. Besoek op 2 Desember 2006.
- ↑ HAT Taal-en-feitegids, Pearson, Desember 2013, ISBN 978-1-77578-243-8
Bronne
wysig- Albertyn, dr. C.F. (red.) 1962. Die Afrikaanse Kinderensiklopedie. Kaapstad, Bloemfontein, Johannesburg: Nasionale Boekhandel Bpk.
Wikimedia Commons het meer media in die kategorie Robert Baden-Powell.
