Sanlam-kunsversameling

Die Sanlam-kunsversameling is ‘n versameling van skilderye, beeldhouwerke en grafiese werke deur Suid-Afrikaanse kunstenaars.

Galerye

Hierdie kunswerke is die eiendom van Sanlam en kan deur die publiek besigtig word by die Sanlam-kunsgalery in die versekeringsmaatskappy se hoofkantoor in Bellville. ‘n Deel van die versameling word egter uitgestal in Sanlam se kunskamer in Sandton. Voorheen het Sanlam sekere van die werke op reise deur die platteland geneem tot in Namibië en Zimbabwe. Op ‘n sekere geleentheid is sekere van die kunswerke in Duitsland, Oostenryk en Switserland uitgestal.

Geskiedenis

Dr. A.D. Wassenaar, ‘n destydse besturende direkteur van Sanlam, was ‘n groot kunsliefhebber. Hy het besluit dat op die kalender wat die maatskappy elke jaar uitgee twaalf afdrukke van kunswerke deur Suid-Afrikaanse kunstenaars moet verskyn. Sanlam is by die aankoop van die kunswerke geadviseer deur F.L. Alexander, die kunsresensent van Die Burger, en later bygestaan deur ‘n advieskomitee. Prof. Matthys Bokhorst en dr. Albert Werth was ook betrokke by die keuring en aankoop van die kunsobjekte.

Doel

Die doel met die projek was om Sanlam as maatskappy bekend te stel, die publiek se belangstellling in kuns aan te wakker, die kunstenaar aan te moedig en vir hulle ‘n moontlike afsetgebied te skep.

Kunstenaars

Werke van die ondergenoemde gevestige kunstenaars kom in die versameling voor, maar aandag aan kuns deur die jonger geslag word ook gegee om die kolleksie verteenwoordigend te hou van wat in die land beskikbaar is.

Gregoire Boonzaier, Christo Coetzee, Irmin Henkel, Adolph Jentsch, Wolf Kibel, Moses Kottler, Fritz Krampe, Erik Laubscher, Maggie Laubser, Judith Mason, Frans Oerder, Pierneef, Alexis Preller, Irma Stern, Herman van Nazareth, Anton van Wouw, Jan Vermeiren, Edoardo Villa, Jean Welz, Pieter Wenning

Bibliografie

• blog.sanlam.co.za
• Sanlam se kunsversameling. In: Lantern. Tydskrif vir Kennis en Kultuur. Jaargang 34, nr. 2, April 1985