Semi-soet
Semi-soet is ’n Afrikaanse rolprent wat op 17 Februarie 2012 in teaters regoor Suid-Afrika begin draai het. Die vervaardigers was Anel en James Alexander terwyl Joshua Rous die regie behartig het. Die prent speel in die Boland en Johannesburg af en het ongeveer R 5 miljoen gekos om te vervaardig. [1]
| Semi-soet | |
|---|---|
| Regisseur | Joshua Rous |
| Produksieleier | Anel Alexander James Alexander |
| Draaiboek | Draaiboek: Sandra Vaughn |
| Met | Anel Alexander Corine du Toit Sandra Vaughn Nico Panagiotopoulos Diaan Lawrenson Paul du Toit |
| Musiek deur | Orangotang Music Michael Bester |
| Kinematografie | Nicholas Costaras, Bertus Kirsten |
| Redigeerder | Nicholas Costaras |
| Ateljee | Scramble Productions |
| Verspreider | Nu Metro |
| Uitgereik | 17 Februarie 2012 |
| Speeltyd | 107 minute |
| Land | Suid-Afrika |
| Taal | Afrikaans |
| Amptelike webtuiste | |
| IMDb-profiel | |
Genre
wysigDie rolprent is ’n romantiese komedie. Die ouderdomsperk is OL (ouerleiding), T (taal). Die film se slagspreuk is: ’n Halwe waarheid. ’n Halwe leuen. ’n Hele gedoente! Dit is as die eerste Afrikaanse romantiese komedie (‘chick’-fliek) beskryf,[2] hoewel rolprente soos Snip en Rissiepit en Kiepie en Kandas reeds die genre in Afrikaans ontgin het.
Hoofrolspelers
wysig- Anel Alexander as Jaci van Jaarsveld
- Corine du Toit as Denise Marais
- Paul du Toit as Markus Rossouw
- Wikus du Toit as Josie
- Nico Panagiotopoulos as JP Basson
- Sandra Vaughn as Karla Jordaan
- Louw Venter as Hertjie Greyling
en andere.
Storielyn
wysigJaci is ’n selferkende werkholis wat alles in haar vermoë sal doen om te keer dat die advertensiemaatskappy waarvoor sy werk deur ’n genadelose sakeman bekend as ‘The Jackal’ oorgeneem word. Haar enigste hoop is om ’n groot kontrak los te slaan vir ’n wynlandgoed wat hul wyne internasionaal wil bemark. Makliker gesê as gedaan, veral as die wynboer vereis dat die persoon wat sy wyn gaan bemark in ’n gevestigde liefdesverhouding moet wees.
Uit desperaatheid besluit Jaci om ’n model te huur om hom voor te doen as haar verloofde. Gevolglik neem sy aan dat die eerste aantreklike man wat by hulle kantore instap deur die modelagentskap gestuur is.
Als blyk seepglad te verloop met die ontmoeting met die wynboer, totdat hy vir Jaci en haar ‘verloofde’ wynplaas toe nooi vir ’n naweek waartydens sy teen die opposisie sal moet meeding vir die kontrak. En wie is die opposisie? Jaci se eks-verloofde, Markus Rossouw.
Net wanneer Jaci dink dat sy in volle beheer is besef sy dat haar kamstige verloofde, JP, die einste ‘Jackal’ is wat haar maatskappy probeer sink.