Simca
Simca was 'n Franse motorvervaardiger, wat ook voertuie in Brasilië en Spanje vervaardig het in die 1960's. Die firma bestaan nie meer nie.
Die naam SIMCA staan vir Société Industrielle de Mécanique et de Carrosserie Automobile. Die stigter van Simca was Henri Pigozzi wat aanvanklik Fiat-voertuie vervaardig het in Frankryk. Die eerste Simca-fabriek is in 1934 in die Paryse voorstad Nanterre geopen, en het tot en met 1951 bestaan. Alhoewel Frankryk beset is gedurende die Tweede Wêreldoorlog, is Simca-voertuie steeds in klein getalle gedurende die oorlog vervaardig.
Die Simca Aronde was die eerste werklike Simca-voertuig (en nie 'n Fiat ewebeeld nie) en is bekendgestel in 1951. Dit het 'n 1200 cc-enjin gehad en 100 000 eenhede is jaarliks geproduseer. Na hierdie sukses het Simca die Franse vragmotorvervaardiger Unic in 1951 oorgeneem, die Poissy-aanleg van Ford (Frankryk) in 1954 en die naam Talbot in 1958 gekoop.
Die Amerikaanse motorvervaardiger Chrysler Corporation wou die Europese mark betree en het 15% van die Simca-aandele gekoop (tesame met die Britse vervaardiger Rootes), en al die Simca-modelle wat sedert 1967 verkoop is, het die Chrysler pentastar-wapen gedra. Simca het sedert 1961 al hulle modelle in die voormalige Franse Ford-fabriek in Poissy vervaardig, en die fabriek in Nanterre is aan Citroën verkoop.
Die Simca 1000 is bekend gestel in 1961.
Die bekendste Simca-modelle (voor die Chrysler era) was die Aronde, die Simca 1000 en die Simca 1100. Gedurende die laat 1970's het Simca die nuwe 1307-reeks (Chrysler Alpine in die Verenigde Koninkryk) vervaardig, en later die Horizon. Beide modelle het die Europese Motor van die Jaar-trofee verwerf by hulle bekendstelling. Die samesmelting van Simca en Rootes was nie suksesvol nie, en Chrysler Europa het in een gestort in 1977 en die oorblyfsels is verkoop aan Peugeot in die opvolgende jaar. Die Rootes modelle is vinnig verwyder, en die Simca-gebaseerde Alpine/1307- en Horizon-voertuie is verder verkoop gedurende die eerste helfte van die 1980's onder die naam Talbot.
Peugeot het uiteindelik moeg geword vir die Talbot-naam en die laaste Simca ontwerp is gelanseer as die Peugeot 309 (in plaas van Talbot Arizona soos oorspronklik beplan) wat die einde van hierdie Franse naam beteken het. Die Peugeot 309 het Simca-enjins gebruik tot einde Oktober 1991 waarna hulle vervang is deur Peugeot se eie TU- en XU-reeks van enjins. Die 309 is in die voormalige Rootes-fabriek in Ryton-on-Dunsmore, Verenigde Koninkryk vervaardig, sowel as in die Poissy-aanleg.
Simcas word vandag nog gesien in sekere Europese lande en is ook in Brasilië, Spanje en Swede vervaardig. 'n Klein aantal Simca-modelle is ook nog in Suid-Afrika te sien. Na die einde van die Simca-era, is die vervaardigingslyn deur Moskvitch na Rusland verskuif en gebruik om die Moskvitch Aleko te bou. Hierdie voertuig se eksterne eienskappe is amper identies aan die Franse model. Die maatskappy Moskvitch sê dat die ooreenkomste met die Simca 1307 slegs met die buitekant van die motor te make het.
Modelle
wysigEksterne skakels
wysig- 'n Geskiedenis van die Simcanaam Geargiveer 10 April 2006 op Wayback Machine
- Amerikaanse Simcabladsy
- Simcas in die Nederlande
- Nederlandse Simca/Matraklub
- Brasiliaanse Simcaklub Geargiveer 17 Februarie 2015 op Wayback Machine
- Die Simca 8-werf
- [1] Club Simca France
- [2] Geargiveer 8 Desember 2005 op Wayback Machine Simca 1000 rallye de légende (fr)