Spaanse Rugbyfederasie
Die Spaanse Rugbyfederasie (Spaans: Federación Española de Rugby, afgekort “FER”) is die bestuursliggaam wat rugby en sewesrugby in Spanje beheer. Die beheerliggaam is in 1923 gestig en in Madrid gesetel. Sedert 1988 verteenwoordig dit Spanje by Wêreldrugby en sedert 1934 ook by Rugby Europa (“RE”).
| Spaanse Rugbyfederasie | |
|---|---|
 Kenteken van die Spaanse Rugbyfederasie
| |
| Spaanse naam | Federación Española de Rugby |
| Afkorting | FER |
| Land |  Spanje
|
| Sportsoorte | Rugby, Sewesrugby |
| Stigting | 1923 |
| Lid van | Wêreldrugby |
| Aangesluit in | 1988 |
| Vastelandse beheerliggaam | Rugby Europa |
| President | Juan Carlos Martín Sánchez |
| Setel | Madrid, Spanje |
| Amptelike taal | Spaans |
| Amptelike webwerf | ferugby.es |
Geskiedenis
wysigDie Spaanse Rugbyfederasie is in 1923 gestig en het in 1988 ’n volle lid van die Internasionale Rugbyvoetbalraad (IRVR; nou Wêreldrugby) geword.[1] Daarbenewens was die Spaanse Rugbyfederasie in 1934 ’n stigtingslid van die vastelandse beheerliggaam Fédération internationale de rugby amateur (FIRA, nou Rugby Europa).[2] Van 1934 tot 1941 is die streek Katalonië verteenwoordig deur sy eie nasionale span, en dié beheerliggaam was ook ’n lid van FIRA.
Taak
wysigDie Spaanse Rugbyfederasie organiseer verskeie nasionale spanne, insluitend Spanje se nasionale seniorrugbyspan vir mans (“die leeus”), vroue en jeug. Die FER hou ook toesig oor sewesrugby in Spanje en aangesien dit ’n Olimpiese sportsoort is, werk hulle met die Spaanse Nasionale Olimpiese Komitee saam. Naas die amptelike nasionale span roep die FER ook ander keurspanne byeen. Daarbenewens bestuur die beheerliggaam kinder- en jeugrugby in Spanje. Kinders en jongmense word reeds op skool aan rugby bekend gestel en na gelang van hul belangstelling en talent begin hul met hul afrigting. Derhalwe het die beheerliggaam ’n uit verskeie module bestaande konsep ontwikkel, wat deur sportonderwysers op Laer- en Hoërskool gebruik kan word.[3] Net soos ander rugbylande beskik Spanje oor ’n o/20-nasionale span wat aan die Europese en Wêreldrugby o/20-kampioenskap deelneem.[4] Die Spain Sevens is die Spaanse sewesrugbyspan en hulle neem aan internasionale toernooie soos Wêreldrugby se Sewesreeks, Sewesrugbywêreldbeker en Olimpiese Somerspele deel.
Die beheerliggaam reël ook die plaaslike kompetisies. Die hoogste rugbyliga in Spanje is die semiprofessionele División de Honor de Rugby, waaraan twaalf spanne deelneem. Weens die beter finansiële moontlikhede verkies baie spelers egter ’n loopbaan by ’n klub in Frankryk of ’n ander Wes-Europese land. In Spanje aktiewe nasionale spelers draf meestal uit vir die professionele span Castilla y Leon Iberians wat sedert 2021 aan die Rugby Europa Superbeker deelneem. Vir slegs een seisoen, van 2009 tot 2010, het die professionele liga Superibérica de Rugby bestaan.
Kenteken
wysigDie Spaanse Rugbyfederasie se kenteken toon ’n leeu wat op ’n rubgybal leen, met die belettering España Rugby daaronder. Die nasionale span se bynaam is Los Leones (“die leeus”).
Verwysings
wysig- ↑ (en) "Spain". Wêreldrugby. Besoek op 30 Maart 2024.
- ↑ (en) "Historical Rugby Milestones 1930s". Rugby Football History. Besoek op 30 Maart 2024.
- ↑ (es) "Rugby Escolar". Spaanse Rugbyfederasie. 2023. Besoek op 30 Maart 2024.
- ↑ (en) "World Rugby U20 Championship". Wêreldrugby. Besoek op 30 Maart 2024.
Eksterne skakels
wysig- (es) Amptelike webwerf