Sri Lanka Krieket
Sri Lanka Krieket (Engels: Sri Lanka Cricket, afgekort “SLC”; Singalees: ශ්රී ලංකා ක්රිකට් ආයතනය; Tamil: இலங்கை துடுப்பாட்ட வாரியம்), tot in 2003 bekend as Raad vir Beheer van Krieket vir Sri Lanka (Board of Control of Cricket for Sri Lanka, “BCCSL”), is die bestuursliggaam wat krieket in Sri Lanka beheer. Die beheerliggaam is op 30 Junie 1975 gestig en by die Singalese Sportklub-krieketveld in Colombo gesetel. Sedert 1981 verteenwoordig dit Sri Lanka by die Internasionale Krieketraad (IKR) as ’n volle lid en sedert 1983 ook by die Asiatiese Krieketraad (Asian Cricket Council, ACC).
| Sri Lanka Krieket | |
|---|---|
 Kenteken van Sri Lanka Krieket
| |
| Engelse naam | Sri Lanka Cricket |
| Afkorting | SLC |
| Singalese naam | ශ්රී ලංකා ක්රිකට් ආයතනය |
| Tamilnaam | இலங்கை துடுப்பாட்ட வாரியம் |
| Land |  Sri Lanka
|
| Sportsoort | Krieket |
| Gestig op | 30 Junie 1975 |
| Lid van | Internasionale Krieketraad |
| Aangesluit op | 21 Julie 1981 |
| Vastelandse beheerliggaam | Asiatiese Krieketraad |
| President | Shammi Silva |
| Direktor | Tom Moody |
| Sekretaris | Mohan de Silva |
| Setel | Singalese Sportklub-krieketveld, Colombo, Sri Lanka |
| Amptelike tale | Engels, Singalees en Tamil |
| Amptelike webwerf | srilankacricket.lk |
Geskiedenis
wysigSri Lanka Krieket is op 30 Junie 1975 as Raad van Krieket vir Sri Lanka gestig, enkele dae nadat Sri Lanka aan die Krieketwêreldbeker 1975 in Engeland deelgeneem het.[1] Ná ’n onverwagse oorwinning oor Indië tydens die Krieketwêreldbeker 1979 het Sri Lanka op 21 Julie 1981 ’n volle lid van die Internasionale Krieketkonferensie (IKK; nou Internasionale Krieketraad, IKR) geword en mag dus toetskrieket speel, wat na die belangrikste en vernaamste internasionale krieketwedstryde verwys.[2] Daarbenewens was die Sri Lankaanse beheerliggaam in 1983 ’n stigtingslid van die Asiatiese Krieketkonferensie (Asian Cricket Conference, ACC; nou Asiatiese Krieketraad).[3]
Taak
wysig
Sri Lanka Krieket organiseer verskeie nasionale spanne, insluitend Sri Lanka se nasionale seniorkrieketspan vir mans (die Lions), vroue en jeug. Hulle is ook verantwoordelik vir die bestuur en organisasie van toets-, EDI- en T20I-reekse teen ander spanne, en vir die reëling van internasionale wedstryde tuis. Daarbenewens is Sri Lanka Krieket verantwoordelik vir inkomsteverkryging deur die verkoop van kaartjies, borgskappe en uitsaairegte, veral in verband met die Sri Lankaanse span.
Daarbenewens bestuur die beheerliggaam kinder- en jeugkrieket in Sri Lanka. Net soos ander krieketlande beskik Sri Lanka oor ’n o/19-nasionale span wat aan die o/19-krieketwêreldbeker deelneem.[4] Sri Lanka A is die tweede nasionale span van Sri Lanka en van hul wedstryde geniet eersterangse of A-lys-status.
Die beheerliggaam reël ook die plaaslike kompetisies. Die belangrikste krieketligas in Sri Lanka is die Major League Tournament in eersterangse krieket (26 spanne), die Premier Limited Overs Tournament in A-lys-krieket (26 spanne) en die Lanka Premierliga in T20-krieket (vyf spanne).
Sri Lanka Krieket organiseer ook gereeld internasionale toernooie. Hulle het al opgetree as gasheer van die krieketwêreldbekertoernooie in 1996 (saam met Indië en Pakistan) en 2011 (saam met Bangladesj en Indië), asook die Kampioenetrofee 2002 en die T20I-wêreldbeker 2012. Sri Lanka sal saam met Indië die T20I-wêreldbeker 2026 ook aanbied.[5]
Kenteken
wysigSri Lanka se krieketkenteken is ’n goue leeu met ’n swaard in die regterhand op ’n helderblou agtergrond. Die naam Sri Lanka Cricket staan bo die leeu. In toetskrieket word die kenteken op die pet effens verander, waar die leeu met ’n swaard deur blomblare omring word en dan ’n blou sirkel omring die helmteken en ’n geel sirkel omring die blou sirkel.
Die Sri Lanka nasionale krieketspan se bynaam is The Lions, genoem na die nasionale dier van Sri Lanka, die leeu.[6] Sri Lanka Krieket se kenteken toon derhalwe ’n leeu.
Verwysings
wysig- ↑ (en) "About". Sri Lanka Krieket. Besoek op 16 Februarie 2024.
- ↑ (en) "Sri Lanka Cricket". Internasionale Krieketraad. Besoek op 16 Februarie 2024.
- ↑ (en) "Inaugural Meeting of The Asian Cricket Conference on 19th and 20th September 1983, New Delhi, India". Asiatiese Krieketraad. Besoek op 16 Februarie 2024.
- ↑ (en) Martin Williamson. "A brief history: The Under-19 World Cup". ESPNcricinfo. Besoek op 16 Februarie 2024.
- ↑ (en) Nagraj Gollapudi (16 November 2021). "USA co-hosts for 2024 T20 WC, Pakistan gets 2025 Champions Trophy, India and Bangladesh 2031 World Cup". ESPNcricinfo. Besoek op 16 Februarie 2024.
- ↑ Andrew Fidel Fernando. "The lion's fairy tale". The Cricket Monthly. Besoek op 16 Februarie 2024.
Eksterne skakels
wysig- (en) (si) (ta) Amptelike webwerf van Sri Lanka Krieket