Australië, Indië, Sri Lanka en Suid-Afrika het vir die halfeindrondte gekwalifiseer. Indië het Suid-Afrika en Sri Lanka het Australië geklop, waardeur die twee Suid-Asiatiese spanne in die eindstryd ontmoet het. Nadat die eindstryd twee keer uitgereën het, het Indië en Sri Lanka die titel gedeel.[3] Die verdedigende kampioen Nieu-Seeland is reeds in die groepfase uitgeskakel.
Die Internasionale Krieketraad het Sri Lanka as gasheer vir die Kampioenetrofee 2002 aangewys. Dit was die eerste keer dat alle destydse volle lede van die IKR Sri Lanka vir ’n toernooi besoek het en die eerste kriekettoernooi wat geheel en al in Sri Lanka beslis is.[4]
Die destydse tien toetsnasies het vir die Kampioenetrofee 2002 gekwalifiseer: Australië, Bangladesj, Engeland, Indië, Nieu-Seeland, Pakistan, Sri Lanka, Suid-Afrika, Wes-Indië en Zimbabwe. Daarbenewens het Kenia en Nederland, wat destyds oor EDI-status beskik het, vir dié toernooi gekwalifiseer.
Tydens die toernooi is twee Sri Lankaanse stadions ingespan. Altesaam 15 wedstryde is tydens die Kampioenetrofee 2002 gespeel, waaronder twee halfeindstryde en die eindstryd.[4]
Die volgende tabel dui die Kampioenetrofee 2002 se daaglikse program aan. ’n Pers blokkie dui op wedstryde tydens die groepfase en ’n groen blokkie op wedstryde tydens die uitklopfase.