Keniaanse nasionale krieketspan

Die Keniaanse nasionale krieketspan (Swahili: Timu ya kriketi ya Kenya), met die bynaam die Simbas[6] (Swahili vir "leeus"), verteenwoordig Kenia in die spel van krieket en word deur die Krieket Kenia beheer. Die land is 'n geassosieerde lid van die IKR met EDI- en T20I-status sedert 1981. Tydens die Krieketwêreldbeker 2003 het die medegasheer Kenia tot die halfeindrondte gevorder, hul beste prestasie tot dusver.

Kenia
Flag of Kenya.svg
BynaamSimbas
KonferensieKrieket Kenia
Personeel
KapteinIrfan Karim
AfrigterVlag van Suid-Afrika Wynnand De Ridder
Internasionale Krieketraad
IKR-statusAssosiaatlid (1981)
IKR-streekAKV (Afrika)
IKR-ranglys Tans[1] Beste rang tot dusver
T20I27ste12de
Internasionale krieket
Eerste internasionale1 Desember 1951 t Tanzanië in Nairobi
Internasionale eendagwedstryde
Eerste EDIt Vlag van Indië Indië op Barabati-stadion, Cuttack; 18 Februarie 1996
Laaste EDIt Vlag van Skotland Skotland op Hagley-ovaal, Christchurch; 30 Januarie 2014
EDIs Gespeel Gewen/Verloor
Totaal[2]15442/107
(0 gelykop, 5 geen uitslag)
Vanjaar[3]00/0
(0 gelykop, 0 geen uitslag)
verskynings tydens wêreldbeker-toernooie5 (eerste in 1996)
Beste uitslagHalfeindstryd (in 2003)
verskynings tydens wêreldbeker-kwalifiserings7 (eerste in 1982)
Beste uitslagNaaswenner (in 1994 en 1997)
Twintig20s
Eerste T20It Vlag van Bangladesj Bangladesj op Nairobi Gymkhana Club, Nairobi; 1 September 2007
Laaste T20It Vlag van Papoea-Nieu-Guinee Papoea-Nieu-Guinee op Doebai Internasionale Krieketstadion, Doebai; 27 Oktober 2019
T20Is Gespeel Gewen/Verloor
Totaal[4]3915/24
(0 onbeslis, 0 geen uitslag)
Vanjaar[5]00/0
(0 onbeslis, 0 geen uitslag)
Verskynings by T20-wêreldbeker-toernooie1 (eerste in 2007)
Beste uitslagGroepfase (in 2007)
Verskynings by T20-wêreldbeker-kwalifiserings6 (eerste in 2008)
Beste uitslag4de plek (in 2008)
EDI-klere

Kenia is sedert 1981 ’n assosiaatlid van die Internasionale Krieketraad. Sedertdien het hulle tussen 1996 en 2011 aan vyf krieketwêreldbekertoernooie deelgeneem, en in 2003 hul beste prestasie behaal deur die halfeindstryd te maak. Kenia kon tot dusver net een keer vir die Twintig20-wêreldbeker kwalifiseer, in 2007.

Kenia het vanaf 1996 EDI-status in voorbereiding vir die Krieketwêreldbeker 1996 geniet en het dié status 18 jaar lank gehad, nadat hulle tydens die 2014-krieketwêreldbekerkwalifikasie op die vyfde plek eindig en hul EDI-status verloor. Sedert April 2019 neem Kenia aan die 2019–21 Krieketwêreldbeker Uitdagingsliga deel wat as kwalifisering vir die Krieketwêreldbeker 2023 dien.[7]

In April 2018 het die IKR besluit om aan al sy lede volle T20-status toe te ken. Vervolgens sal elke T20-wedstryd wat Kenia ná 1 Januarie 2019 teen ander IKR-lede speel, as volle T20I erken word.[8] Kenia is tans (4 Februarie 2020) 27ste op die Twintig20-wêreldranglys.[9]

GeskiedenisWysig

BeginjareWysig

Ná ’n aanvanklike kolonisasie deur Portugal het Kenia in die tweede helfte van die 19de eeu en die eerste helfte van die 20ste eeu geleidelik onder Britse invloed gekom. Krieket is dalk in die 1880’s deur die Britte na Kenia gebring.

Die eerste bekende wedstryd was in Desember 1899 "Oos-Afrikaanse Protektoraat t Res van die wêreld" (sic) in Mombasa.

Vanaf 1910 is ’n reeks van wedstryde, genaamd "Amptenare t Settlers", van stapel gestuur en tot in 1964 uitgespeel.

In 1914 het ’n Keniaanse span Uganda besoek en hul gasheer met 5 paaltjies in Entebbe verslaan.

Oos-Afrikaanse spanWysig

 
Vlag van die Oos-Afrikaanse nasionale krieketspan

Kenia, Tanzanië en Uganda het saam die Oos-Afrikaanse span gevorm, wat in 1966 ’n geassosieerde lid van die IKR geword het.[10] Hulle het voortgegaan om teen mekaar te speel, en tussen 1966 en 1980 het Zambië by hulle aangesluit om jaarliks ’n vierhoekige toernooi te speel.[11]

Indië het in 1967 na Oos-Afrika getoer[12] en op 5 Augustus ’n driedaagse wedstryd teen Kenia gespeel, wat gelykop geëindig het.[13] Verskeie toere na, en deur, Oos-Afrika het gevolg, insluitende ’n toer na Engeland in 1972[14] en ’n eersterangse wedstryd tussen Oos-Afrika en die Marylebone Krieketklub (MKK) op Nairobi Gymkhana Club in 1974[15] voordat Oos-Afrika aan die eerste krieketwêreldbekertoernooi deelgeneem het.

Die Krieketwêreldbeker 1975 het in Engeland plaasgevind, en Oos-Afrika was een van twee nie-toetspanne wat vir dié toernooi genooi is; die ander was Sri Lanka.[16] Kenia het die helfte van die span bestaande uit 14 spelers bygedra.[11] Ná opwarmingswedstryde teen Somerset, Wallis, Glamorgan en verskeie ander klubspanne, het hulle in die eerste rondte teen Engeland, Indië en Nieu-Seeland gespeel, maar al drie wedstryde verloor.[16] Die krieketwêreldbekertoernooi is opgevolg deur ’n eersterangse wedstryd teen Sri Lanka op die County Ground, Taunton.[17]

Oos-Afrika het daarna aan die IKR-trofee in 1979 deelgeneem, die eerste IKR-trofeetoernooi, maar hulle kon nie tot die volgende rondte vorder nie en het sodoende die kwalifisering vir die Krieketwêreldbeker 1979 misgeloop.[18]

IKR-lidmaatskapWysig

Nadat hulle lankal as sterkste deel van die Oos-Afrikaanse span beskou is,[11] het Kenia in 1981 weggebreek en op sy eie as ’n assosiaatlid by die IKR aangesluit,[19] kort ná ’n toer in Zimbabwe in 1980/81. Hulle het tydens dié toer twee driedaagse wedstryde teen Zimbabwe gespeel, en albei verloor.[20] Kenia het op sy eie aan die IKR-trofee in 1982,[21] 1986,[22] en 1990 deelgeneem,[23] en in September 1986 hul eerste eersterangse wedstryd teen Pakistan B gespeel.[24]

Krieketwêreldbeker 1996Wysig

Die IKR-trofee in 1994 is in Nairobi aangebied en Kenia het as naaswenner na die Verenigde Arabiese Emirate geëindig, en vervolgens vir die Krieketwêreldbeker 1996 gekwalifiseer.[25] Kenia het toe in Augustus 1995 tuis teen Indië A gespeel,[26] en in September/Oktober dieselfde jaar na Suid-Afrika getoer,[27] voordat hulle aan die krieketwêreldbekertoernooi deelgeneem het, wat aan Keniaanse krieket ’n groter gehoor besorg en hulle in die kollig gebring het.

Kenia is saam met Australië, Indië, Sri Lanka, Wes-Indië en Zimbabwe in een groep geloot.[28] Hulle het hul eerste EDI-wedstryd teen Indië gespeel.

In die destyds grootste verrassing tydens krieketwêreldbekertoernooi het Kenia Wes-Indië op net 93 uitgeboul en met 73 lopies gewen.[29]

Die Keniaanse span het vir sy eerste krieketwêreldbekertoernooi met spelers soos Steve Tikolo, Maurice Odumbe en Thomas Odoyo na Indië vertrek. Volgens verwagtinge sou dié span deur al die volle lede in die groepfase geklop word, en in die meeste wedstryde het dit wel gebeur. Maar die hoogtepunt van hul deelname was die seëviering oor die voormalige wêreldkampioen Wes-Indië in ’n wedstryd met ’n lae telling.

EDI-statusWysig

Ná hul vertoning tydens die krieketwêreldbekertoernooi het Kenia van die IKR volle EDI-status verkry, en in September/Oktober 1996 ’n vierhoekige toernooi teen Pakistan, Suid-Afrika en Sri Lanka aangebied.[30] Nederland het in Desember vir vier eendaagse wedstryde getoer, waarvan Kenia alle wedstryde gewen het.[31] Hulle het in die kwarteindstryd van die Suid-Afrikaanse Standard Bank-beker in Maart 1997 gespeel, maar met 104 lopies teen Natal op Kingsmead verloor.[32] Daarop het die IKR-trofee in 1997 gevolg, wat in Maleisië aangebied is.[33] Kenia het die eindstryd gemaak, waarin hulle teen Bangladesj met twee paaltjies verloor het.[34] In Oktober dieselfde jaar is in Nairobi ’n driehoekige toernooi teen Bangladesj en Zimbabwe aangebied.[35]

Engeland A was in 1998 die eerste teenstander en het in Januarie Kenia besoek. ’n Driedaagse wedstryd het gelykop geëindig, en Engeland A het die enigste eendaagse wedstryd, wat nie weens slegte weer afgelas is nie, gewen.[36] Hulle het tydens die Standard Bank-beker in die eindstryd gespeel, maar dié keer teen Gauteng met 8 paaltjies verloor.[37] Die Keniaanse span het in Mei Indië besoek, en ’n driehoekige EDI-reeks teen beide Bangladesj en Indië gespeel.[38] In die laaste wedstryd van die groepfase het Kenia ’n ontsteltenis aangeteken en Indië met 69 lopies verslaan.[39]

Kenia het in 1998 aan die kriekettoernooi tydens die Statebondspele deelgeneem. Kenia is saam met Nieu-Seeland, Pakistan en Skotland in een groep geplaas, maar hulle kon net die Skotte verslaan en het in die puntetabel derde geëindig.[40]

Kenia het met ’n driehoekige reeks in Bangladesj teen beide Bangladesj en Zimbabwe op die Krieketwêreldbeker 1999 voorberei.[41] Tydens die eintlike Krieketwêreldbeker in 1999 is hulle met Engeland, Indië, Suid-Afrika, Sri Lanka en Zimbabwe in dieselfde groep geplaas. Ná opwarmingswedstryde teen Somerset, Gloucestershire en Glamorgan het Kenia al sy vyf wedstryde tydens die toernooi duidelik verloor.[42] Ná die krieketwêreldbekertoernooi het hulle tuis ’n vierhoekige toernooi teen Indië, Suid-Afrika en Zimbabwe gespeel, en weer al hul wedstryde verloor.[43]

Die 21ste eeu het vir Kenia afgeskop met ’n besoek aan Zimbabwe, om aan die IKR se opkomende nasiestoernooi teen Denemarke, Ierland, Nederland, Skotland en Zimbabwe A deel te neem. Kenia het dié toernooi gewen[44] en dié vorm op ’n toer na Indië van sewe wedstryde saamgeneem, waarvan hulle net een verloor het.[45] Pakistan A het in Julie na Kenia getoer, en vyf eendaagse wedstryde en een vierdaagse eersterangse wedstryd gespeel. Hulle het in die vierdaagse wedstryd gelykop gespeel, en Kenia het die eendaagse reeks met 4–1 gewen.[46] Die uitklop-trofee is in Oktober 2000 in Nairobi aangebied, maar Kenia het teen die eerste struikelblok Indië verloor.[47]

Die eerste teenstander in 2001 vir Kenia was Sri Lanka A, wat in Januarie na Kenia getoer het, en twee eersterangse en vier eendaagse wedstryde gespeel het. Albei eersterangse wedstryde het gelykop geëindig, en Sri Lanka A het die twee eerste eendaagse wedstryde gewen, en die twee laaste wedstryde is afgelas.[48] Wes-Indië het in Augustus vir twee eersterangse en ’n EDI-reeks van drie wedstryde na Kenia getoer. Die eerste eersterangse wedstryd is deur Wes-Indië gewen, die tweede het gelykop geëindig, en die drie EDI-wedstryde is deur die toeriste gewen.[49] Kenia het in Oktober aan ’n driehoekige EDI-toernooi in Suid-Afrika teen beide Indië en die gasheer deelgeneem,[50] en ’n tweede EDI-oorwinning oor Indië aangeteken.[51]

Zimbabwe A het aan die einde van die jaar na Kenia getoer, en ’n eersterangse reeks met 1–0 en ’n eendaagse reeks met 3–2 verloor.[52] Kenia het in vroeg 2002 na Sri Lanka getoer, en drie eersterangse en drie eendaagse wedstryde teen Sri Lanka A gespeel. Sri Lanka A het al die drie eersterangse wedstryde gewen, maar Kenia het die eendaagse reeks met 2–1 gewen.[53] Die MKK het kort daarna na Kenia getoer, en een driedaagse en ses eendaagse wedstryde teen die gasheer gespeel. Vyf van die eendaagse wedstryde is deur Kenia gewen, voordat beide die sesde eendaagse wedstryd en die driedaagse wedstryd afgelas is.[54] Kenia het toe aan die Sesnasies-uitdagingstoernooi in Windhoek, Namibië, deelgeneem en teen Kanada, Namibië, Nederland, Sri Lanka A en Zimbabwe A gespeel.[55] Kenia het dié toernooi gewen, nadat hulle Sri Lanka A met 3 paaltjies in die eindstryd verslaan het.[56] In Augustus/September het Kenia ’n driehoekige toernooi teen beide Australië en Pakistan aangebied, maar al hul vier wedstryde verloor.[57] Daarna het Kenia aan die Kampioenetrofee deelgeneem, maar teen beide Wes-Indië en Suid-Afrika verloor, waardeur hulle versuim het om tot die volgende rondte te vorder.[58]

In November het Namibië na Kenia getoer om vier eendaagse wedstryde te speel. Kenia het dié reeks met 2–1 gewen, nadat een wedstryd afgelas is.[59] Kenia het toe na Zimbabwe getoer om die jaar af te rond, en drie eendaagse wedstryde teen Zimbabwe A, en ’n EDI-reeks van drie wedstryde teen die volle Zimbabwiese span gespeel. Zimbabwe het die EDI-reeks met 2–0 gewen, nadat een wedstryd onbeslis geëindig het, en Zimbabwe A het sy reeks teen Kenia met 2–1 gewen.[60]

Krieketwêreldbeker 2003 en agteruitgangWysig

Die Krieketwêreldbeker 2003 het Kenia se hoogtepunt in internasionale krieket gekenmerk. Suid-Afrika het as nominale gasheer van dié toernooi opgetree, terwyl Kenia sy groepwedstryde teen Sri Lanka en Nieu-Seeland tuis gespeel het.[61] Die toernooi het met ’n nederlaag teen Suid-Afrika afgeskop,[62] maar Kenia kon herstel en Kanada met 4 paaltjies in Kaapstad klop.[63] Nieu-Seeland het sy wedstryd teen Kenia in Nairobi weens veiligheidskwessies verbeur,[64] maar Sri Lanka het Nairobi wel besoek, en tot hul ontsteltenis met 53 lopies verloor, nadat Kenia ’n verdere skokoorwinning aangeteken het.[65]

Die toernooi is in Suid-Afrika met ’n oorwinning oor Bangladesj[66] en ’n nederlaag teen Wes-Indië voortgesit.[67] Kenia was in staat om tot die volgende Super 6-fase te vorder, en het die eerste nie-toetsnasie geword wat tydens ’n krieketwêreldbekertoernooi van die eerste rondte kon vorder. Tydens die Super 6 het hulle teen Indië[68] en Australië verloor,[69] maar hulle het Zimbabwe met 7 paaltjies verslaan,[70] en vir die halfeindstryd gekwalifiseer, waar hulle deur Indië met 91 lopies verslaan is.[71]

Kenia se sukses tydens die krieketwêreldbekertoernooi is met ’n plek tydens ’n vierhoekige toernooi op die Sharjah Krieketverenigingstadion teen Pakistan, Sri Lanka en Zimbabwe beloon, maar hulle is in al hul drie wedstryde verslaan.[72]

Kenia se mislukking tydens bogenoemde toernooi verwys dalk daarna hoe hulle versuim het om kapitaal uit hul sukses tydens die krieketwêreldbekertoernooi te slaan, alhoewel nie al die mislukking op die veld plaasgevind het nie. Ten spyte van die hoeveelheid wedstryde wat Kenia teen nasionale A-spanne gespeel het, en hul deelname aan die Carib Beer-beker in Wes-Indië in 2004,[73] het Kenia in die drie jaar ná die Sharjah-toernooi net twee EDI-wedstryde teen Indië en Pakistan tydens die Kampioenetrofee in 2004 gespeel.[74] Volgens verskeie waarnemers moes Kenia ná sy prestasie tydens die Krieketwêreldbeker 2003 toetsstatus verkry het,[75] hulle was glo reeds in 2000 op die punt om toetsstatus te verkry.[76]

Terugslae buite die krieketveld het ook gebeur. Maurice Odumbe is in Augustus 2004 weens wedstrydknoeiery verban,[77] en ’n reeks van spelerstakings[78] het daartoe gelei dat ’n verswakte Keniaanse span tydens die eerste Interkontinentale beker in die halfeindstryd deur Skotland uitgeskakel is.[79] Aan die einde van dié geskil in 2005 was die Keniaanse krieket sonder borg en het hom in ’n virtuele internasionale isolasie bevind.[78] Op dié stadium het die beheerliggaam intern ontbind en Kenia se krieketgeleenthede was beperk en internasionale krieket het vir hulle feitlik opgehou.

HerbouWysig

2005 tot 2007Wysig

’n Herbouproses het in 2005 begin. Die speler se staking het opgehou, en Kenia het weer die halfeindstryd van die Interkontinentale beker behaal. Hulle het vir die halfeindstryd in Windhoek met ’n toer na Zimbabwe voorberei, en het twee eersterangse en een eendaagse wedstryd teen Zimbabwe A gespeel. Hulle het al drie wedstryde gewen,[80] en het in die halfeindstryd van die Interkontinentale beker gelykop teen Bermuda gespeel[81] maar in die eindstryd teen Ierland verloor, ondanks hul telling van 404/4 in hul eerste beurt.[82]

In vroeg 2006 is die Keniaanse Krieketvereniging ontbind en deur Krieket Kenia vervang.[78] Die herbouproses was in volle gang toe Kenia weer begin het om EDI-wedstryde te speel. Hul terugkoms tot EDIs is met ’n reeks van vyf wedstryde teen Zimbabwe ingelui, wat 2–2 gelykop geëindig het nadat een wedstryd afgelas is.[80] Dit is deur ’n EDI-reeks met vier wedstryde teen Bangladesj opgevolg, maar Kenia het al die wedstryde tydens dié reeks verloor.[83] Hul Interkontinentale bekerveldtog het met ’n gelykop teen Nederland[84] en ’n nederlaag teen Kanada swak afgeskop,[85] maar hulle kon terugslaan met twee EDI-oorwinnings oor Kanada op die Toronto Cricket, Skating and Curling Club.[86] Bangladesj het in Augustus na Kenia getoer, en al drie EDI-wedstryde gewen,[87] voordat hulle tydens ’n Interkontinentale bekerwedstryd teen Bermuda gelykop speel[88] en drie EDI-oorwinnings oor Bermuda.[89]

’n Driehoekige toernooi in Mombasa teen Kanada en Skotland het die jaar 2007 vir Kenia ingelui, en die gasheer het dié toernooi gewen.[90] Hulle het toe afdeling een van die Wêreldkrieketliga op drie krieketgronde in Nairobi aangebied, en teen Bermuda, Kanada, Ierland, Nederland en Skotland gespeel. Kenia het dié toernooi gewen, nadat hulle Skotland in die eindstryd verslaan het.[91] Dit is opgevolg deur die Krieketwêreldbeker 2007, Kenia se vierde verskyning tydens ’n krieketwêreldbekertoernooi. Kenia het Kanada in die groepfase verslaan, maar teen Engeland en Nieu-Seeland verslaan, waarvolgens hulle die Super 8 misgeloop het.[92]

In Oktober 2007, weerskante van Interkontinentale bekerwedstryde, het Kenia Kanada vir twee EDI-wedstryde gehuisves[93] en toe Bermuda vir drie.[94] Kenia het al vyf wedstryde gewen, met ’n sterk boulwerk wat ’n relatief maklike lopiejaag opgestel het wanner hulle tweede begin kolf het.

2008 tot 2011Wysig

 
Die Jomo Kenyatta Sportgrond, in Kisumu, 2008

In Augustus 2008, ná ’n onderbreking van nege maande sonder enige EDI- of T20I-wedstryd, het Kenia vir verskeie reekse na Ierland, Skotland en Nederland getoer. Dit het tot ’n teleurstellende toer gelei, waartydens reën en ’n swak Keniaanse kolfwerk die hoofonderwerpe was.

Kenia het aanvanklik aan die T20-wêreldbekerkwalifisering in Belfast, Noord-Ierland, die kwalifiserende toernooi vir assosiaatlede, deelgeneem. Hulle het dié toernooi as een van die gunstelinge betree, en tweede in Groep B met ’n nederlaag teen Nederland en ’n oorwinning oor Kanada geëindig, maar nederlae teen beide Ierland en Skotland in die uitklopfase het Kenia vierde laat eindig, waarvolgens hulle die T20-wêreldbeker in 2009 misgeloop het.

Kenia het daarna aan drie EDI-reekse dwarsdeur Europa deelgeneem, maar dit het net in twee uitgereëne wedstryde in Skotland, ’n nederlaag in ’n natgereëne wedstryd in Nederland, en ’n nederlaag tydens ’n reeks van drie wedstryde in Ierland met 1–0, nadat twee wedstryde deur reën geaffekteer is.

In Oktober 2008 het Kenia beide Ierland en Zimbabwe tydens ’n EDI-reeks in Nairobi gehuisves, maar ná ’n nederlaag teen Ierland en ’n oorwinning oor Zimbabwe is al hul drie oorblywende wedstryde weens reën uitgewas.[95] Ná die uitgereëne reeks het Kenia vir twee EDI-wedstryde na Suid-Afrika getoer, maar is in albei duidelik verslaan.[96]

In laat Januarie en vroeg Februarie 2009 het Kenia tuis vyf EDI-wedstryde teen Zimbabwe gespeel, maar is in al die wedstryde verslaan.[97]

Sedert die krieketwêreldbekertoernooi het ’n span, die Kenia Select, aan die Zimbabwiese Logan-beker deelgeneem, maar kon nie ’n oorwinning aanteken nie,[98] en ook teen Zimbabwe A verloor.[99]

In hul openingswedstryd van die Krieketwêreldbeker 2011 het Kenia ’n duidelike nederlaag teen Nieu-Seeland met 10 paaltjies gely, hulle is met 69 lopies uitgeboul en Nieu-Seeland het die wedstryd binne-in 8 boulbeurte beklink sonder om ’n paaltjie te verloor.[100]

In 2011 is Kenia deur Nederland tydens ’n kort EDI-reeks van twee wedstryde in Sportspark Westvielt, Voorburg, platgeloop. Tydens dié reeks is Kenia se swak kolfwerk kolfwerk opgemerk. Hulle het net 208/8 in die eerste wedstryd[101] en ’n nog kleiner 184/8 in die tweede wedstryd[102] aangeteken. Beide Seren Waters en Collins Obuya (die kaptein) het egter uitstekend vertoon – die eersgenoemde het 71 in die eerste wedstryd en die laasgenoemde 54 in die tweede wedstryd aangeteken.

Hervormings in 2011Wysig

 
Krieketwedstryd tussen Kenia en Nepal in Katmandoe op 13 Maart 2017

Die Keniaanse spelers was vir jare die mees bederfde professionele spelers onder die assosiaatlede. Die eerste keer wat Krieket Kenia kennis geneem het was tydens die Krieketwêreldbeker 2011, nadat daar berigte van interne ongelykhede binne-in die span was,[103] nadat Kenia ’n teleurstellende toernooi gehad en al hul ses wedstryde verloor het.[104] Krieket Kenia het aangekondig dat hulle die krieketwêreldbekertoernooi se debakel ná afloop van dié toernooi sal hersien. Dit het ’n reeks hervormings wat deur die raad geïnisieer is, ingelui.[105]

Ná die hersieninge het die raad die voormalige Sahara Eliteliga met die Oos-Afrikaanse toernooie vervang. Terwyl die Oos-Afrikaanse Premierliga ’n T20-toernooi is, is die Oos-Afrikaanse beker ’n EDI-toernooi. Die raad hoop dat die nuwe toernooie verdere nuwe talente vir toekomstige Keniaanse spanne sal lewer.[106] Binne maande het die Oos-Afrikaanse toernooie ’n hoë agting verwerf en die intensiteit het sterk gestyg, soos dit uit ’n ESPNcricinfo-onderhoud met Krieket Kenia se hoof- uitvoerende beampte Tom Sears blyk.[107]

’n Verdere belangrike hervorming wat deur die nuwe raad ingebring is, was om met die ou personeel weg te doen. Soos dit die ESPN-joernalis Martin Williamson beskryf het, was die ou personeel nie aan vertoning toegewyd nie, maar eerder aan selfsugtige wense.[108] Die nuwe kontrakte het heeltemal met die verlede gebreek, en Collins Obuya, die nuwe kaptein, was met 29 die oudste speler. Ervare spelers soos die voormalige kaptein Jimmy Kamande, ’n veteraan van vyf krieketwêreldbetertoernooie, Thomas Odoyo, en ander het nie eens in aanmerking gekom nie. Soos verwag het die ontslane spelers vinnig reageer, Kamande het gemeen "die direksie het spelers gekies wat hul marionette sou wees", en Odoyo "dit was kwaadwillig en nie in goeder trou gedoen nie". Volgens hulle het dit die dood van Keniaanse krieket versnel. Hulle is ook deur die Keniaanse media bygestaan.[109]

Onder die 20 krieketspelers wat kontrakte aangebied is, is aan 13 sentrale kontrakte aangebied. Die dinge het nog moeiliker geword, toe vyf spelers dié kontrakte van die hand gewys het: Alex Obanda, Shem Ngoche, James Ngoche, Nehemiah Odhiambo en Elijah Otieno. Sears het gesê dat hulle tevrede is met die groep van sewe spelers wat hulself verbind het tot Krieket Kenia, terwyl hulle ewe teleurgesteld is met diegene wat die kontrakte verwerp het.[110] Gevolglik is hulle nie vir die span, wat tydens die Interkontinentale beker teen die VAE te staan gekom het, benoem nie.[111]

Krieket Kenia het kontrakte aan verdienstelike jong, talentvolle spelers aangebied, soos die openingskolwer Runish Gudhka uit Nairobi, die Australies-gebore veelsydige Duncan Allan, paaltjiewagter Irfan Karim, en indrukwekkende snelboulers soos Emmanuel Ringera, Ibrahim Akello en Dominic Wesonga, wat tydens die plaaslike NPCA- en Oos-Afrikaanse ligas uitstekend vertoon het.[112]

Die agt spelers wat die raad se kontrakte verwerp het, soos die voormalige kaptein Morris Ouma, Alfred Luseno en Nelson Odhiambo, is later ingesluit en het gevra dat hul menings gehoor word, en ondanks die nuwe kans wat die raad aan hulle toegestaan het, het hulle uiteindelik ’n sterk standpunt teen die raad ingeneem. Terwyl Obanda, Shem en James Ngoche, Odhiambo en Otieno nuwe aanbiedinge gemaak is, het Ouma, Luseno, en Nelson ’n driemaandse ooreenkoms tot Maart 2012, onderhewig aan prestasie. Indien hulle iets goeds sou kon bydra, kon hulle weer hul plek in die span inneem. Sears het oor hierdie debakel gesê: "Dit is ’n jammerte dat sommige van hierdie spelers weereens hul kontrakte van die hand gewys het, maar dit is hul keuse. Ons het met hierdie spelers vergader soos ons belowe het dat ons sou doen, ons het na hul siening geluister en aanbiedinge gemaak wat weerspieël wat hulle wou hê - ’n ooreenkoms wat sou duur tot aan die einde van die kontrakjaar in Mei 2012 as hulle aan sekere prestasiekriteria voldoen wat alle spelers moet ontmoet. Die teleurstellendste aspek was miskien dat hulle die afgelope naweek op die laaste nippertjie geweier het om hul spanne in die Oos-Afrikaanse toernooie te verteenwoordig. Ongelukkig bevraagteken dit die professionaliteit van hierdie spelers, hoe toegewyd hulle is om die moeite te doen, hul toepassing in die verwesenliking van hul potensiaal en die advies wat hulle van hul adviseurs ontvang het."[113]

’n Verdere hervorming was die aanstelling van die voormalige Otago-afrigter Mike Hesson as nasionale afrigter.[114] Onmiddellik daarna het Hesson aangekondig dat hy aangestel is om die geskil tussen die spelers en die raad op te los en te beëindig. Hy het dit tydens ’n onderhoud met die koerant Otago Daily Times verduidelik.[115]

Die Oos-Afrikaanse eindstryde is van Oktober tot Desember 2011 weens swaar storte in Nairobi geherskeduleer.[116] In Desember het swaar reënbuie egter daartoe gelei dat die eindronde weer uitgestel is tot Januarie 2012.[117]

Die Keniaanse nasionale krieketspanne kon nie vir die krieketwêreldbekertoernooie in 2015 en 2019 kwalifiseer nie.

RekordsWysig

WêreldbekerrekordWysig

Jaar Uitslag
1975 Sien   Oos-Afrika
1979 Sien   Oos-Afrika
1983 Nie gekwalifiseer nie
1987 Nie gekwalifiseer nie
1992 Nie gekwalifiseer nie
1996 Eerste rondte
1999 Eerste rondte
2003 Halfeindrondte
2007 Eerste rondte
2011 Eerste rondte
2015 Nie gekwalifiseer nie
2019 Nie gekwalifiseer nie
2023 N.v.t.

Twintig20-rekordWysig

Jaar Uitslag
2007 Uitdunfase
2009 Nie gekwalifiseer nie
2010 Nie gekwalifiseer nie
2012 Nie gekwalifiseer nie
2014 Nie gekwalifiseer nie
2016 Nie gekwalifiseer nie
2020 Nie gekwalifiseer nie
2021 N.v.t.

Kampioenetrofee-rekordWysig

Jaar Uitslag
1998 Nie toegelaat nie
2000 Uitdunfase
2002 Groepfase
2004 Groepfase
2006 Nie gekwalifiseer nie
2009 Nie toegelaat nie
2013 Nie toegelaat nie
2017 Nie toegelaat nie

Sien ookWysig

VerwysingsWysig

  1. (en) "ICC Rankings". Internasionale Krieketraad.
  2. (en) "ODI matches – Team records". ESPNcricinfo.
  3. (en) "ODI matches – 2020 Team records". ESPNcricinfo.
  4. (en) "T20I matches – Team records". ESPNcricinfo.
  5. (en) "T20I matches – 2020 Team records". ESPNcricinfo.
  6. (en) "ICC T20 World Cup Africa Final – Unique Trophy Shoot Leaves Captains In Awe". Cricket Uganda. Besoek op 4 Februarie 2020.
  7. (en) "All to play for in last ever World Cricket League tournament". Internasionale Krieketraad. 11 April 2019. Besoek op 4 Februarie 2020.
  8. (en) "All T20 matches between ICC members to get international status". Internasionale Krieketraad. 26 April 2018. Besoek op 4 Februarie 2020.
  9. (en) "Men's T20I Team Rankings". Internasionale Krieketraad. 11 Januarie 2020. Besoek op 4 Februarie 2020.
  10. (en) East Africa at Cricket Archive
  11. 11,0 11,1 11,2 (en) A history of Kenyan cricket Geargiveer 24 Julie 2008 op Wayback Machine
  12. (en) India in East Africa, 1967 at Cricket Archive
  13. (en) Scorecard of Kenya v India match, 5 August 1967 at Cricket Archive
  14. (en) East Africa in England, 1972 at Cricket Archive
  15. (en) Scorecard of East Africa v MCC match, 18 January 1974 at Cricket Archive
  16. 16,0 16,1 (en) World Cup 1975 at Cricket Archive
  17. (en) Scorecard of East Africa v Sri Lanka match, 23 June 1975 at Cricket Archive
  18. (en) 1979 ICC Trophy Geargiveer 30 September 2007 op Wayback Machine at Cricket Archive
  19. (en) Kenya at Cricket Archive
  20. (en) Kenya in Zimbabwe, 1980/81 at Cricket Archive
  21. (en) 1982 ICC Trophy at Cricket Archive
  22. (en) 1986 ICC Trophy Geargiveer 8 September 2008 op Wayback Machine at Cricket Archive
  23. (en) 1990 ICC Trophy Geargiveer 19 Julie 2008 op Wayback Machine at Cricket Archive
  24. (en) Scorecard of Kenya v Pakistan B match, 12 September 1986 at Cricket Archive
  25. (en) 1994 ICC Trophy at Cricket Archive
  26. (en) India A in Kenya, 1995 at Cricket Archive
  27. (en) Kenya in South Africa, 1995/96 at Cricket Archive
  28. (en) 1996 World Cup at Cricinfo
  29. (en) Article on Kenya's win over the West Indies
  30. (en) Sameer Cup at Cricket Archive
  31. (en) Netherlands in Kenya, 1996 at Cricket Archive
  32. (en) Scorecard of Natal v Kenya match, 12 March 1997 at Cricket Archive
  33. (en) 1997 ICC Trophy at Cricket Archive
  34. (en) Scorecard of Bangladesh v Kenya, 1997 ICC Trophy Final, 12 April 1997 at Cricket Archive
  35. (en) KCA President's Cup 1997 at Cricket Archive
  36. (en) England A in Kenya 1997 at Cricket Archive
  37. (en) Scorecard of Gauteng v Kenya match, 14 January 1998 at Cricket Archive
  38. (en) Coca-Cola Triangular Series 1998 at Cricket Archive
  39. (en) Scorecard of India v Kenya match, 28 May 1998 at Cricket Archive
  40. (en) 1998 Commonwealth Games cricket tournament at Cricket Archive
  41. (en) Meril International Tournament 1999 at Cricket Archive
  42. (en) 1999 World Cup at Cricket Archive
  43. (en) LG Cup 1999 at Cricket Archive
  44. (en) Emerging Nations Tournament at Cricket Archive
  45. (en) Kenya in India 2000 at Cricket Archive
  46. (en) Pakistan A in Kenya 2000 at Cricket Archive
  47. (en) 2000 ICC KnockOut at Cricket Archive
  48. (en) Sri Lanka A in Kenya 2001 at Cricket Archive
  49. (en) West Indies in Kenya 2001 at Cricket Archive
  50. (en) Standard Bank Triangular Tournament 2001 at Cricket Archive
  51. (en) Scorecard of India v Kenya ODI, 17 October 2001 at Cricket Archive
  52. (en) Zimbabwe A in Kenya 2001 at Cricket Archive
  53. (en) Kenya in Sri Lanka 2002 at Cricket Archive
  54. (en) MCC in Kenya 2002 at Cricket Archive
  55. (en) 2002 ICC 6 Nations Challenge at Cricket Archive
  56. (en) Scorecard of Kenya v Sri Lanka A match, 14 April 2002 at Cricket Archive
  57. (en) Kenya PSO Tri-Nation Tournament 2002 at Cricket Archive
  58. (en) 2002 ICC Champions Trophy at Cricket Archive
  59. (en) Namibia in Kenya 2002 at Cricket Archive
  60. (en) Kenya in Zimbabwe 2002 at Cricket Archive
  61. (en) 2003 World Cup schedule at Cricinfo
  62. (en) Scorecard of South Africa v Kenya match, 12 February 2003 at Cricket Archive
  63. (en) Scorecard of Canada v Kenya match, 15 February 2003 at Cricket Archive
  64. (en) Scorecard of abandoned Kenya v New Zealand match, 21 February 2003 at Cricket Archive
  65. (en) Scorecard of Kenya v Sri Lanka match, 24 February 2003 at Cricket Archive
  66. (en) Scorecard of Bangladesh v Kenya match, 1 March 2003 at Cricket Archive
  67. (en) Scorecard of Kenya v West Indies match, 4 March 2003 at Cricket Archive
  68. (en) Scorecard of India v Kenya match, 7 March 2003 at Cricket Archive
  69. (en) Scorecard of Australia v Kenya match, 15 March 2003 at Cricket Archive
  70. Scorecard of Kenya v Zimbabwe match, 12 March 2003 at Cricket Archive
  71. (en) Scorecard of India v Kenya World Cup semi-final match, 20 March 2003 at Cricket Archive
  72. (en) Cherry Blossom Sharjah Cup Geargiveer 1 Oktober 2012 op Wayback Machine 2003 at Cricket Archive
  73. (en) 2004 Carib Beer Cup at Cricket Archive
  74. (en) 2004 ICC Champions Trophy at Cricket Archive
  75. (en) "The decline and fall of Kenyan cricket". The Roar. 2 Maart 2018. Besoek op 4 Februarie 2020.
  76. (en) "Test Status: Kenya's next, but who then?". ESPNcricinfo. 13 Julie 2000. Besoek op 4 Februarie 2020.
  77. (en) Maurice Odumbe player profile at Cricinfo
  78. 78,0 78,1 78,2 (en) History of Kenyan cricket at Cricinfo
  79. (en) Scorecard of Kenya v Scotland semi-final, 17 November 2004 at Cricket Archive
  80. 80,0 80,1 (en) Kenya in Zimbabwe 2005/06 at Cricket Archive
  81. (en) Scorecard of Bermuda v Kenya match, 23 October 2005 at Cricket Archive
  82. (en) Scorecard of Ireland v Kenya final, 27 October 2005 at Cricket Archive
  83. (en) Kenya in Bangladesh 2006 at Cricket Archive
  84. (en) Scorecard of Kenya v Netherlands match, 29 March 2006 at Cricket Archive
  85. (en) Scorecard of Canada v Kenya match, 29 July 2006 at Cricket Archive
  86. (en) Kenya in Canada 2006 at Cricket Archive
  87. (en) Bangladesh in Kenya 2006 at Cricket Archive
  88. (en) Scorecard of Kenya v Bermuda match, 5 November 2006 at Cricket Archive
  89. (en) Bermuda in Kenya 2006 at Cricket Archive
  90. (en) ICC Associates Tri-Series (Kenya) 2007 at Cricket Archive
  91. (en) 2007 ICC World Cricket League Division One at Cricket Archive
  92. (en) 2007 Cricket World Cup at Cricket Archive
  93. (en) "Canada in Kenya ODI Series, 2007/08 / Results". ESPNcricinfo. Besoek op 3 Oktober 2014.
  94. (en) "Bermuda in Kenya ODI Series, 2007/08 / Results". ESPNcricinfo. Besoek op 3 Oktober 2014.
  95. (en) "Tri-Nation Tournament in Kenya, 2008/09 / Results". ESPNcricinfo. Besoek op 3 Oktober 2014.
  96. (en) "Kenya in South Africa ODI Series, 2008/09 / Results". ESPNcricinfo. Besoek op 3 Oktober 2014.
  97. (en) "Zimbabwe in Kenya ODI Series, 2008/09 / Results". ESPNcricinfo. Besoek op 3 Oktober 2014.
  98. (en) 2007 Logan Cup at Cricket Archive
  99. (en) Scorecard of Zimbabwe A v Kenya Select match, 16 May 2007 at Cricket Archive
  100. (en) New Zealand vs Kenya at Cricket Archive
  101. (en) first match
  102. (en) second match
  103. (en) Cricket Kenya chief hints at team discord ESPNCricinfo. Besoek op 21 Desember 2011
  104. (en) Disappointing farewell for Tikolo ESPNCricinfo. Besoek op 21 Desember 2011
  105. (en) Cricket Kenya to review World Cup debacle ESPNCricinfo. Besoek op 21 Desember 2011
  106. (en) Kenya prepare for new superleagues ESPNCricinfo. Besoek op 21 Desember 2011
  107. (en) 'Players know consistency will be the criterion for national selection' ESPNCricinfo. Besoek op 21 Desember 2011
  108. (en) Kenyan board right to dump old guard ESPNCricinfo. Besoek op 21 Desember 2011
  109. (en) Kenya's new contracts cut ties with the past ESPNCricinfo. Besoek op 21 Desember 2011
  110. (en) Five players turn down Kenya contracts ESPNCricinfo. Besoek op 21 Desember 2011
  111. (en) Kenya leave out players who refused contracts ESPNCricinfo. Besoek op 21 Desember 2011
  112. (en) Youngsters rewarded with central contracts ESPNCricinfo. Besoek op 21 Desember 2011
  113. (en) Cricket Kenya plays hardball with militant players ESPNCricinfo. Besoek op 21 Desember 2011
  114. (en) Mike Hesson appointed Kenya coach ESPNCricinfo. Besoek op 21 Desember 2011
  115. (en) Hesson's Kenyan baptism of fire ESPNCricinfo. Besoek op 21 Desember 2011
  116. (en) East Africa finals rescheduled for early December ESPNCricinfo. Besoek op 21 Desember 2011
  117. (en) East Africa finals again postponed ESPNCricinfo. Besoek op 21 Desember 2011

Eksterne skakelsWysig