Verenigde Arabiese Emirate

Verenigde Arabiese Emirate
دولة الإمارات العربية المتحدة (Arabies)
Vlag	Embleem
	Volkslied: عيشي بلادي; Ishy Bilady; (Arabies vir: "Lank lewe my Nasie");
Hoofstad	Aboe Dhabi 24°28′N 54°22′O / 24.467°N 54.367°O
Grootste stad	Doebai
Amptelike tale	Arabies
Regering ; • President; ; • Eerste minister	Federale parlementêre; grondwetlike monargie; Mohamed bin Zayed; Al Nahyan; Mohammed bin Rashid; Al Maktoum
Onafhanklikheid • van die Verenigde Koninkryk;	; 2 Desember 1971
Oppervlakte; - Totaal; ; - Water (%)	; 83 600 km2 (114de); 32 300 myl2; feitlik niks
Bevolking; - 2020-skatting; - 2005-sensus; - Digtheid	; 9 282 410 (92ste); 4 106 427; 121 / km2 (110de); 313,4 / myl2
BBP (KKP); - Totaal; - Per capita	2022-skatting; $779,234 miljard (34ste); $78 225 (7de)
BBP (nominaal); - Totaal; - Per capita	2022-skatting; $501,354 miljard (32ste); $50 349 (21ste)
MOI (2019)	0,890 (31ste) – baie hoog
Gini (2018)	26 – laag
Geldeenheid	Dirham (AED)
Tydsone; - Somertyd	GST (UTC+4); nie toegepas nie (UTC+4)
Internet-TLD	.ae, امارات.
Skakelkode	+971

Die Verenigde Arabiese Emirate (Arabies: دولة الإمارات العربية المتحدة‎, Dawlat al-Imārāt al-'Arabīyah al-Muttaḥidah; dikwels afgekort tot VAE), in die omgangstaal ook net Emirate (الإمارات‎, al-Imārāt) genoem, is 'n land in die Midde-Ooste en Wes-Asië. Die Verenigde Arabiese Emirate (VAE) is 'n federasie van sewe emirate – Aboe Dhabi (die grootste), Ajman, Doebai, Fujairah, Ras al-Khaimah, Sharjah en Umm al-Quwain – waarvan elkeen sy eie spesifieke karakter het.

Ruolie is die primêre bron van rykdom in die VAE, maar die emirate is besig om hul ekonomieë te diversifiseer. So word onder meer die toerisme- en handelsbedryf massief uitgebrei. Die ekonomiese welvaart het daartoe gelei dat die ou tradisies van die Arabiese kultuur in die VAE met 'n hipermoderne infrastruktuur en 'n kosmopolitiese leefstyl verbind word. Dit het ook baie buitelandse spesialiste en ander werknemers na die VAE gelok sodat die federasie tans 'n vinnige bevolkingsgroei van byna drie persent (soos in 2013) ervaar. Net sowat 'n vyfde van die meer as vyf miljoen Emiratis, soos die inwoners genoem word, is plaaslik gebore.

Die VAE het in die laat 20ste en 21ste eeu tot een van die mees dinamiese en hoogontwikkelde ekonomieë ter wêreld ontwikkel en soms word na die federasie as die "Switserland van die Nabye Ooste" verwys.^[8] In elk geval word die VAE met ambisieuse projekte en superlatiewe verbind, waaronder die hoogste gebou ter wêreld, die Burj Khalifa, die grootste moskee met plek vir 70 000 gelowiges, die langste voloutomatiese moltreinlyne en kunsmatige eilande soos The World en die palmeilande Palm Jumeirah en Jebel Ali.

Doebai en Aboe Dhabi, die twee grootste stede, het tot globale metropole en internasionale lugvaartsentrums ontwikkel, terwyl Emirates, 'n Doebai-gebaseerde lugredery, tot een van die grootstes wêreldwyd gegroei het.

Geografie

Die Verenigde Arabiese Emirate grens in die noordweste aan die Persiese Golf, in die noorde aan die Straat van Hormuz, in die noordooste aan die Golf van Oman, in die ooste aan Oman, asook in die suide en suidweste aan Saoedi-Arabië. Verder noordwes is Bahrein en Katar en in die noorde is Iran geleë. Die emirate se geografie word in die suide gekenmerk deur die Arabiese woestyn.

Geologie

Die Arabiese Plaat

Die Arabiese Skiereiland (wat in die geologiese konteks ook Arabiese Plaat genoem word) het oorspronklik deel gevorm van die Afrika-vasteland waarvan dit eers in die laat tersiêr (sowat 50 miljoen jaar gelede) en vroeë kwartêr geskei is. Tektoniese aktiwiteit in die aardkors het die Groot Skeurvallei gevorm, 'n slenkdal wat vanuit die Middellandse Seegebied in 'n suidelike rigting deur Ethiopië loop en verder suidwaarts tot in Zimbabwe strek en die Arabiese Skiereiland van die vasteland van Afrika skei. In die slenkdal tussen die Afrikavasteland en die Arabiese Plaat het die Rooisee gevorm.

Nadat die westelike randgebiede van die skiereiland deur verdere tektoniese prosesse opwaarts gedruk is, het die hele plaat in 'n oostelike rigting begin beweeg. Hierdie proses, waarby die Arabiese teen die Eurasiese Plaat stoot en die Anatolies-Iranse Plooigebergte ontstaan het, duur steeds voort en veroorsaak onder meer verwoestende aardbewings in Iran. Tans beweeg die Arabiese Plaat met 'n snelheid van tussen twee en drie sentimeter per jaar in 'n noordoostelike rigting en daar word verwag dat die Persiese Golf oor vyf miljoen jaar nie meer sal bestaan nie.

Emirate

Ligging van die sewe emirate

Vlag	Emiraat	Hoofstad	Bevolking^[9]		Oppervlakte
Vlag	Emiraat	Hoofstad	2008	%	(km²)	(myl²)	%
	Aboe Dhabi	Aboe Dhabi	1 548 655	31,2%	67 340	26 000	86,7%
	Ajman	Ajman	372 923	7,5%	259	100	0,3%
	Doebai	Doebai	1 770 533	35,6%	3 885	1 500	5,0%
	Fujairah	Fujairah	137 940	2,9%	1 165	450	1,5%
	Ras al-Khaimah	Ras al-Khaimah	171 903	3,4%	1 684	650	2,2%
	Sharjah	Sharjah	895 252	18,0%	2 590	1 000	3,3%
	Umm al-Quwain	Umm al-Quwain	69 936	1,4%	777	300	1%
	VAE	Aboe Dhabi	4 967 142	100%	77 700	30 000	100%

Politiek

Mohamed bin Zayed Al Nahyan, derde en huidige president van die VAE

Zayed bin Sultan Al Nahyan was die eerste president van die Verenigde Arabiese Emirate en word as vader van die nasie beskou

Die Duitse Departement van Buitelandse Sake het die politieke bedeling in die VAE, 'n federale absolute monargie, in 2007 as 'n "patriargaliese presidensiële stelsel met tradisionele konsultasiemeganismes" beskryf.^[10] Die VAE se president word deur die sewe eerste ministers uit die geledere van die sewe emirs of premiers van die emirate gekies. Daar is geen politieke partye of algemene verkiesings volgens westerse parlementêre modelle nie.

Die parlement – die Federale Nasionale Raad (FNR) – het 40 afgevaardigdes waarvan die helfte deur die sewe heersers of premiers benoem en die ander helfte indirek verkies word. Ofskoon die FNR bevoegd is om wetsbesluite en verordeninge asook die bedrywighede van departemente en ministers te hersien, tree dit in die praktyk eerder raadgewend op. Die VAE se grondwet maak voorsiening vir die skeiding van magte, maar dit is die hoogste federale liggaam, die Hoogste Raad van die sewe heersers, waar die wetgewende gesag in die praktyk gesetel is. Aangesien hulle ook die uitvoerende gesag het en die staatshoof verkies wat op sy beurt die regering benoem, is die mag in die Hoogste Raad gekonsentreer.

Die huidige president van die Verenigde Arabiese Emirate is sedert 2022 Mohamed bin Zayed Al Nahyan, wat ook as emir van Aboe Dhabi dien. Die eerste minister is Mohammed bin Rashid Al Maktoum, gelyktydig heerser van Doebai.

Ekonomie

Hoofkenmerke

Al-Ain is een van min plekke in die VAE waar landbou beoefen kan word

Etihad Airways, vlagdraer van die Verenigde Arabiese Emirate

Emirates is een van die grootste lugrederye ter wêreld

Die Verenigde Arabiese Emirate is die agtste grootste ruolieprodusent en beskik oor die wêreld se sesde grootste herwinbare ruolie- en die sewende grootste aardgasreserwes. Met 'n per capita-inkomste van sowat VSA-$ 50 000, bestendige ekonomiese groei en internasionale beleggingsbates ter waarde van enkele honderd miljard VSA-$ word die Emirate, wat as 'n ontwikkelende hoër-inkomste-ekonomie geklassifiseer word, van die welvarendste lande en grootste internasionale beleggers gereken. Die VAE se ekonomiese vryemarkbeleid plaas min beperkings op die privaat sektor, internasionale handel en kapitaalbewegings.

Volgens die Economist Intelligence Unit het die Emiratiese ekonomie in 2012 met drie persent gegroei, terwyl vir 2013 – afhangende van die beweging in die olieprys – tussen drie en vier persent voorspel word. Inflasie is onder beheer met minder as twee persent (0,9 persent in 2011 en 0,7 persent in 2012). Die relatief hoë olieprys verseker 'n hoë staatsinkomste en stabiele ekonomie groei. Die Emirate is besig om hul olieproduksie van sowat drie miljoen vate per dag op te stoot tot die maksimum van 3,5 miljoen vate.

Die VAE se ekonomiese beleid, wat veral deur die emiraat Aboe Dhabi finansieel gesteun word, is desondanks gemik op die diversifisering van die ekonomiese basis. Nuwe sleutelsektore sluit logistiek, handel, die organisering van handelskoue, toerisme en finansiële dienste (veral met betrekking tot Doebai) in, maar ook kapitaal- en energieintensiewe nywerheidsbedrywe soos staal- en aluminiumvervaardiging en petrochemie en hoë-tegnologiesektore (hernubare energie en die vervaardiging van mikroskyfies). Daarnaas speel ook lugvaart 'n belangrike rol en lewer intussen byna 'n vyfde van die VAE se bruto binnelandse produk op. Doebai en Aboe Dhabi het vanweë hul gunstige geografiese ligging en strukturele voordele tot twee van die wêreld se voorste lugvaartsentrums ontwikkel: Die Aboe Dhabi Internasionale Lughawe en die Doebai Internasionale Lughawe.

Energiebedryf

'n Tradisionele huis in Doebai met windtorings, barjeel genoem

Die VAE is besig om hul energievoorsiening te diversifiseer, veral omdat die kragverbruik met jaarliks sewe persent skerp styging toon. Vanweë die relatief lae kragkoste, maar ook omdat die baie warm en dikwels vogtige klimaat lugreëling in geboue noodsaaklik maak, het die per capita-elektrisiteitsverbruik reeds 'n internasionale rekordvlak van jaarliks 12 000 kilowatt-ure bereik.

Naas konvensionele gasturbine-kragsentrales (wat dikwels as komplekse met meerdere kragsentrales bedryf en met seewaterontsoutingsaanlegte gekombineer word, soos onder meer in Al Taweelah in Aboe Dhabi en in Djabal Ali in Doebai) en kernaanlegte (vanaf 2017) word ook steeds meer in hernubare energiebronne belê. Duursame energiebronne sal omstreeks 2020 na verwagting in tenminste sewe persent van die plaaslike energiebehoefte voorsien. 'n Belangrike internasionale agentskap vir hernubare energiebronne, die Verenigde Nasies se International Renewable Energy Agency (IRENA), is in Aboe Dhabi gesetel.

'n Suid-Koreaanse konsortium onder leiding van die Korea Electric Power Corporation (KEPCO) het in 2009 opdrag gekry om vier APR-1400-kernreaktors (elkeen met 'n kraglewering van 1 400 MWe) ter waarde van VSA-$ 30 miljard op te rig. Boubedrywighede vir die eerste twee reaktors van die Barākah-aanleg in die uiterste weste van Aboe Dhabi het op 17 Maart 2011 begin. Die kernaanlegte sal in 'n kwart van die Emirate se kragbehoefte voorsien en na verwagting tussen 2017 en 2020 voltooi en in 2021 in bedryf gestel word.^[11]

Demografie

'n Tradisionele souk in Deira, Doebai

Meer as 50 persent van die inwoners is nie in die land gebore nie (in die omgang "expats" genoem). Weens die werkgeleenthede daar woon meer as twee miljoen mense van Suid-Asië soos Indiërs en Pakistanis in die Verenigde Arabiese Emirate; so ook baie duisende Suid-Afrikaners.

Godsdiens

Meer as 70 persent van die land se inwoners is Moslems terwyl ongeveer tussen vyf en tien persent Rooms-Katolieke is wat van die Filippyne (wat hoofsaaklik Katolieke is) geïmmigreer het. 'n Verdere tien persent is Hindoes wat van Suid-Asië geïmmigreer het. 'n Groot mate van godsdiensvryheid bestaan; tot die mate dat Doebai 'n kerk spesifiek gerig op Suid-Afrikaners, die 'Afrikaanse Kerk van Doebai', huisves.

Sport

Tradisionele valkery in die woestyn

Wedstryd tussen Indië en die Verenigde Arabiese Emirate tydens die Krieketwêreldbeker 2015 in Perth

Motorsport

Formule Een is die gewildste toeskouersport in die Verenigde Arabiese Emirate. Die Aboe Dhabi Grand Prix vorm sedert 2009 deel van die Formule Een-kalender en word op die Yas Marina-renbaan op die Yas-eiland beslis. Ander gewilde sportsoorte sluit in kameelwedrenne, valkery, uithouritte en tennis.^[12]

Sokker

Sokker is die gewildste sportsoort in die Verenigde Arabiese Emirate. Die nasionale sokkerspan het tot dusver een keer vir die FIFA Sokker-Wêreldbeker kwalifiseer en aan die FIFA Sokker-Wêreldbekertoernooi in 1990 deelgeneem, saam met Egipte. Dit was die derde agtereenvolgende toernooi waartydens twee Arabiese nasionale sokkerspanne kon deelneem, ná die FIFA Sokker-Wêreldbekertoernooi in 1982 met Algerië en Koeweit, gevolg deur die FIFA Sokker-Wêreldbekertoernooi in 1986 met Algerië, Irak en Marokko. Na die Asiatiese Beker van 1996 het die VAE weer die Asiatiese Beker in 2019 aangebied.

Krieket

Krieket is een van die gewildste sportsoorte in die Verenigde Arabiese Emirate, veral te danke aan die uitgewekene bevolking uit Suid-Asiatiese lande, die Verenigde Koninkryk en Australië. Doebai huisves kantore van die Internasionale Krieketraad, terwyl die hoofkantoor steeds in Londen se Lord’s-krieketveld gesetel is. Die Verenigde Arabiese Emirate se nasionale krieketspan het tot dusver vir twee krieketwêreldbekertoernooie gekwalifiseer en aan dié toernooie van 1996 en 2015 deelgeneem, maar nie tot die uitklopfase deurgedring nie. Hulle het ook twee keer aan 'n T20I-wêreldbekertoernooi deelgeneem, in 2014 en 2022, maar nie die tweede rondte gehaal nie. In 2021 het die Verenigde Arabiese Emirate saam met Oman vir die eerste keer 'n belangrike kriekettoernooi – die T20I-wêreldbeker – aangebied. Dit was die eerste vername kriekettoernooi wat geheel en al deur IKR-assosiaatlede gehuisves is.^[13] Die Verenigde Arabiese Emirate se nasionale krieketspan het egter nie daarin geslaag om vir dié toernooi te kwalifiseer nie.

Verwysings

↑ (en) Dona J. Stewart (2013). The Middle East Today: Political, Geographical and Cultural Perspectives. London and New York: Routledge. p. 155. ISBN 978-0415782432.
↑ (en) Alan John Day (1996). Political Parties of The World. Stockton. p. 599. ISBN 1561591440.
↑ (en) "United Arab Emirates Constitution". UAE Ministry of Justice. Besoek op 10 Oktober 2018.
↑ (en) "United Arab Emirates Population (2020)". u.ae.
↑ ^5,0 ^5,1 ^5,2 ^5,3 (en) "United Arab Emirates". Internasionale Monetêre Fonds. April 2022. Besoek op 15 Mei 2022.
↑ (en) "Human Development Report 2020" (PDF). United Nations Development Programme. 2020. Besoek op 15 Mei 2022.
↑ (en) "Gini Index". Wêreldbank. Besoek op 15 Mei 2022.
↑ (de) Dieter Matthew Schlesinger en Gabriele Katharina Scheuring (reds.): Vereinigte Arabische Emirate. Wirtschaft, kultur und geographische Strukturen. WRU-Berichte, Heft 34. Materialien und Forschungsberichte aus dem Lehrstuhl für Wirtschaftsgeographie der Universität München. München 2008, bl. 1. Teks aanlyn beskikbaar: VAE^{[dooie skakel]}
↑ (en) "Census 2008". Ministry of Economy and Planning, Government of the United Arab Emirates. 2008. Geargiveer vanaf die oorspronklike op 9 Oktober 2019. Besoek op 18 Mei 2018.
↑ (de) Sabine Wimberger: Dubai, Reiseziel der Zukunft. Eine kritische Betrachtung der Tourismusentwicklung aus ökonomischer, gesellschaftlicher und ökologischer Sicht. Proefskrif. Hamburg: Diplomica Verlag 2008, bl. 5
↑ (de) Germany Trade and Invest, 30 April 2012: Aktuelle Trends aus den Vereinigten Arabischen Emiraten. Besoek op 1 Desember 2013 Geargiveer 17 September 2013 op Wayback Machine
↑ (en) "UAE Sports". Uae.gov.ae. Geargiveer vanaf die oorspronklike op 11 Junie 2008.
↑ (en) Paul Radley (29 Junie 2021). "T20 World Cup will move to UAE and Oman, confirms ICC". The National. Besoek op 23 November 2021.

Bronnelys

Algemeen

(en) "United Arab Emirates". Encyclopædia Britannica. Besoek op 15 Mei 2022.
(en) "United Arab Emirates". Central Intelligence Agency. Besoek op 15 Mei 2022.

Eksterne skakels

(en) Toerisme-inligting oor Verenigde Arabiese Emirate op Wikivoyage
(en) www.uaeinteract.com – Nuus en inligting oor die Verenigde Arabiese Emirate Geargiveer 18 September 2010 op Wayback Machine
(en) Die Verenigde Arabiese Emirate se Jaarboek 2013 Geargiveer 8 Desember 2013 op Wayback Machine

[1] (en) Dona J. Stewart (2013). The Middle East Today: Political, Geographical and Cultural Perspectives. London and New York: Routledge. p. 155. ISBN 978-0415782432.

[2] (en) Alan John Day (1996). Political Parties of The World. Stockton. p. 599. ISBN 1561591440.

[3] (en) "United Arab Emirates Constitution". UAE Ministry of Justice. Besoek op 10 Oktober 2018.

[4] (en) "United Arab Emirates Population (2020)". u.ae.

[imf2-5] 5,0 ^5,1 ^5,2 ^5,3 (en) "United Arab Emirates". Internasionale Monetêre Fonds. April 2022. Besoek op 15 Mei 2022.

[6] (en) "Human Development Report 2020" (PDF). United Nations Development Programme. 2020. Besoek op 15 Mei 2022.

[7] (en) "Gini Index". Wêreldbank. Besoek op 15 Mei 2022.

[8] (de) Dieter Matthew Schlesinger en Gabriele Katharina Scheuring (reds.): Vereinigte Arabische Emirate. Wirtschaft, kultur und geographische Strukturen. WRU-Berichte, Heft 34. Materialien und Forschungsberichte aus dem Lehrstuhl für Wirtschaftsgeographie der Universität München. München 2008, bl. 1. Teks aanlyn beskikbaar: VAE^{[dooie skakel]}

[9] (en) "Census 2008". Ministry of Economy and Planning, Government of the United Arab Emirates. 2008. Geargiveer vanaf die oorspronklike op 9 Oktober 2019. Besoek op 18 Mei 2018.

[10] (de) Sabine Wimberger: Dubai, Reiseziel der Zukunft. Eine kritische Betrachtung der Tourismusentwicklung aus ökonomischer, gesellschaftlicher und ökologischer Sicht. Proefskrif. Hamburg: Diplomica Verlag 2008, bl. 5

[11] (de) Germany Trade and Invest, 30 April 2012: Aktuelle Trends aus den Vereinigten Arabischen Emiraten. Besoek op 1 Desember 2013 Geargiveer 17 September 2013 op Wayback Machine

[12] (en) "UAE Sports". Uae.gov.ae. Geargiveer vanaf die oorspronklike op 11 Junie 2008.

[13] (en) Paul Radley (29 Junie 2021). "T20 World Cup will move to UAE and Oman, confirms ICC". The National. Besoek op 23 November 2021.

[1]

[2]

[3]

[4]

[5]

[6]

[7]

[8]

[9]

[10]

[11]

[12]

[13]