Wikipedia

Ugandese nasionale krieketspan

Die Ugandese nasionale krieketspan (Engels: Uganda national cricket team; Swahili: Timu ya kriketi ya Uganda), met die bynaam “Cricket Cranes”, is die nasionale krieketspan wat Uganda in internasionale krieket verteenwoordig. Krieket word in Uganda deur die Ugandese Krieketvereniging (UCA, van Engels: Uganda Cricket Association) beheer. Uganda is sedert 1998 ’n assosiaatlid van die Internasionale Krieketraad (IKR).[4] Saam met Kenia en Namibië is Uganda tradisioneel een van die sterker nasionale Afrikakrieketspanne na die toetslande Suid-Afrika en Zimbabwe.

Uganda
Kenteken van die Ugandese nasionale krieketspan
BynaamCricket Cranes
KonferensieUgandese Krieketvereniging (UCA)
Personeel
KapteinBrian Masaba
AfrigterVlag van Indië Abhay Sharma
Internasionale Krieketraad
IKR-statusAssosiaatlid met T20I-status (1998)
IKR-streekAKV (Afrika)
IKR-ranglys Tans[1] Beste rang tot dusver
T20I21ste21ste (op 5 Junie 2024)
Krieketwêreldbeker-verskynings0/13
Kampioenetrofee-verskynings0/9
Twintig20s
Eerste T20It Vlag van Botswana Botswana op Lugogo-stadion, Kampala; 20 Mei 2019
Laaste T20It Vlag van Nieu-Seeland Nieu-Seeland op Brian Lara-krieketakademie, San Fernando; 14 Junie 2024
T20Is Gespeel Gewen/Verloor
Algeheel[2]9570/22 (73,68%)
(0 gelykop, 3 onbeslis)
Vanjaar[3]84/4
(0 gelykop, 0 onbeslis)
T20I-wêreldbeker-verskynings1/9 (eerste in 2024)
Beste uitslagEerste rondte (in 2024)
T20I-wêreldbeker-
kwalifiserings		5 (eerste in 2013)
Beste uitslagNaaswenner (in 2023)
T20I-klere

Uganda het al vroeg in 1914 met ’n internasionale span teen die Oos-Afrikaanse Protektoraat te staan gekom, maar hulle het eers van die vroeë 1950’s af gereeld teen ander spanne begin speel[5] en gereeld reekse teen die plaaslike mededingers Kenia en Tanzanië (destyds Tanganjika) beslis.[6] Van 1966 af het Uganda spelers beskikbaar gestel vir die gesamentlike Oos-Afrikaanse span wat in 1989 die Oos- en Sentraal-Afrikaanse span geword het.

Tydens die IKR-trofee 2001 in Kanada het die land op sy eie deelgeneem. Uganda het aan die volgende drie toernooie deelgeneem, wat later in krieketwêreldbekerkwalifisering hernoem is, maar hulle kon nie vir ’n krieketwêreldbekertoernooi kwalifiseer nie. Tydens die Wêreldkrieketliga het Uganda drie keer die Wêreldkrieketliga se afdeling twee gehaal, maar hulle het elke keer na afdeling drie teruggeval. Die span het ook drie keer aan die T20I-wêreldbekerkwalifisering deelgeneem en die 2023-kwalifisering as naaswenner ná Namibië afgesluit, waarmee hulle vir die T20I-wêreldbeker 2024 kon kwalifiseer, hul eerste deelname aan dié toernooi.[7] In dié proses kon hulle onder andere die volle lid Zimbabwe vir die eerste keer klop. Daarmee het hulle ná die volle lede Suid-Afrika en Zimbabwe, asook die assosiaatlede Namibië en Kenia die vyfde Afrikaland geword wat vir ’n internasionale kriekettoernooi kon kwalifiseer. Tydens die T20I-wêreldbeker 2024 kon Uganda Papoea-Nieu-Guinee klop, gelyk aan hul eerste T20I-wêreldbekeroorwinning en eerste oorwinning in enige IKR-toernooi ooit.[8]

In April 2018 het die IKR besluit om aan al sy lede volle T20I-status toe te ken. Vervolgens sal al die T20I-wedstryde wat Uganda ná 1 Januarie 2019 teen ander IKR-lede speel, as ’n volle T20I erken word.[9] Uganda is tans (Junie 2024) 21ste op die Twintig20-wêreldranglys.[10]

Beheerliggaam

wysig
Die hoofartikel vir hierdie afdeling is: Ugandese Krieketvereniging.

Die Ugandese Krieketvereniging (Engels: Uganda Cricket Association, UCA) is in 1952 gestig en verantwoordelik vir die reëling van krieket in Uganda.[11] In 1998 het hulle as ’n assosiaatlid by die Internasionale Krieketraad (IKR) aangesluit.[4][12] In dieselfde jaar het hulle by die Afrikakrieketvereniging (Africa Cricket Association, “ACA”) aangesluit.[13]

Die Ugandese Krieketvereniging bestuur al die Uganda-verteenwoordigende nasionale spanne, insluitende die mans, vroue en jeug. Hulle is ook verantwoordelik vir die bestuur en organisasie van T20I-reekse teen ander spanne, en die reëling van internasionale wedstryde tuis. Daarbenewens is die UCA verantwoordelik vir inkomsteverkryging deur die verkoop van kaartjies, borgskappe en uitsaairegte, veral in verband met die Ugandese span.

Kinders en jongmense word reeds op skool aan krieket bekend gestel en na gelang van hul belangstelling en talent begin hul met hul afrigting. Net soos ander krieketlande beskik Uganda oor ’n o/19-nasionale span wat aan die o/19-krieketwêreldbeker deelneem.[14]

Geskiedenis

wysig

Beginjare

wysig

Britse koloniste het krieket aan die einde van die 19de eeu saam na Uganda gebring. In 1900 is vir die eerste keer krieket in Uganda gespeel.[15] Nasionale wedstryde (“Amptenare t Settlers”) is van 1910 tot in 1964 gereeld uitgespeel, maar geen interterritoriale wedstryde is beslis nie. In 1914 is vir die eerste keer ’n Keniaanse span in Uganda verwelkom en hulle het in Entebbe met vyf paaltjies gewen. Ná die toestroom van Indiese arbeiders na Afrika om die streek se spoornetwerk op te rig het die gewildheid van krieket toegeneem en aan die einde van die Tweede Wêreldoorlog was dit een van die mees uitgeoefende sportsoorte in die streek.[16]

Oos-Afrikaanse span

wysig
Die hoofartikel vir hierdie afdeling is: Oos-Afrikaanse krieketspan.
 
Vlag van die Oos-Afrikaanse nasionale krieketspan, later Oos- en Sentraal-Afrika

In 1951 is die Oos-Afrikaanse Krieketkonferensie (Engels: East Africa Cricket Conference, EACC; later die Oos- en Sentraal-Afrikaanse Krieketkonferensie, East and Central Africa Cricket Conference, ECACC) gestig as die beheerliggaam van krieket in die streek. Dit het toesig gehou oor die interkoloniale wedstryde tussen sy drie stigtingslede Kenia, Uganda en Tanganjika.[17] Later in dieselfde jaar het ’n saamgestelde Oos-Afrikaanse span Rhodesië gehuisves.[18] In 1952 is die Ugandese Krieketvereniging (Engels: Uganda Cricket Association, UCA) gestig en in dieselfde jaar het ’n Ugandese span vir die eerste keer in ’n driehoekige toernooi teen Kenia en Tanganjika gespeel. Een jaar later het Uganda sy eerste oorwinning aangeteken en kon Tanganjika met vyf paaltjies klop.[15]

Oos-Afrika se volgende opgetekende wedstryd was in 1956 teen ’n besoekende Pakistanse span. Onder die kapteinskap van Denis Dawson (die broer van die Suid-Afrikaanse toetsspeler Ossie Dawson) het die Oos-Afrikane die driedaagse wedstryd met agt paaltjies verloor.[19] In die volgende jaar is die Oos-Afrikane deur die besoekende Sunder-krieketklub met nege paaltjies verslaan.[20] In 1958 het ’n Suid-Afrikaanse span met spelers van nie-Europese herkoms na die streek getoer en een wedstryd teen Oos-Afrika in Nairobi gespeel. Onder hul kaptein Malcolm Ronaldson, ’n voormalige eersterangse speler vir die Oostelike Provinsie is Oos-Afrika in dié wedstryd deur die Suid-Afrikane met sewe paaltjies verslaan.[15][21]

Gedurende die 1960’s het Oos-Afrika verskeie toerende spanne ontmoet. In 1962 het hulle twee wedstryde teen die Statebond se krieketspan gespeel. In die eerste wedstryd in Nairobi (10 tot 12 Februarie 1962) is die Oos-Afrikane met 20 lopies geklop.[22] Dié wedstryd word veral onthou vir ’n vinnige honderdtal deur Basil D'Oliveira in die Statebondspan se tweede beurt.[23] In die tweede wedstryd in Oktober, ook in Nairobi, het die Statebondspan Oos-Afrika met 118 lopies geklop.[24] Die besoekende Marylebone-krieketklub (MKK) het in 1963/64 drie wedstryde in Uganda gespeel, een in Tanganjika en sewe in Kenia. Een van dié wedstryde teen die Oos-Afrikaanse span in Kampala het die MKK met ’n beurt en 71 lopies gewen.[25] Die Oos-Afrikaanse span het vyf Ugandese ingesluit.[15] In 1966 het Oos-Afrika by die Internasionale Krieketkonferensie (IKK; nou Internasionale Krieketraad, IKR) as ’n assosiaatlid aangesluit.[15][26] In dieselfde jaar het Zambië by die jaarlikse toernooi aangesluit, wat daarmee ’n vierhoekige toernooi geword het.[15] In Augustus 1967 het die besoekende Indië teen Uganda met ses paaltjies en een driedaagse eersterangse wedstryd teen Oos-Afrika, wat ses Ugandese ingesluit het, met agt paaltjies gewen.[15][27] In 1968 het ’n internasionale span van Engelse eersterangse spelers in ’n driedaagse wedstryd teen Oos-Afrika in Nairobi onbeslis gespeel.[28] In dieselfde jaar het Warwickshire in Uganda ook onbeslis gespeel en later het Uganda in Nairobi teen Kenia met 436 lopies sy hoogste telling ooit aangeteken.[15]

In Junie en Julie 1972 het Oos-Afrika Engeland vir 18 wedstryde teen plaaslike spanne besoek en ’n oorwinning oor Noord-Wallis aangeteken. Geen van dié wedstryde het eersterangse status geniet nie.[29] Die MCC het in 1973/74 weer Oos-Afrika besoek. In Desember 1973 het hulle twee wedstryde in Zambië gespeel, gevolg deur twee verdere in Tanzanië en toe vier in Kenia. Hul enigste wedstryd teen die volle Oos-Afrikaanse span, wat oor eersterangse status beskik het, is deur die MCC met 237 lopies gewen.[30]

Oos-Afrika is genooi om aan die eerste Krieketwêreldbeker 1975 deel te neem. Hulle was naas Sri Lanka een van twee nietoetspanne wat vir dié toernooi genooi is.[31] Kenia het die helfte van die span se 14 spelers gestel.[32] Voor dié toernooi is die span se deelname egter bevraagteken, nadat Tanzanië gedreig het om spelers te verbied om na Engeland te toer in protes teen die Britse en Ierse Leeus-rugbyspan se toer na Suid-Afrika onder Apartheid in 1974.[33] Die insluiting van Oos-Afrika is as ’n belangrike stap vir die toernooi beskou, aangesien die deelname van ’n Afrikaspan as nodig geag is om van dit ’n ware wêreldbekertoernooi te maak. Die twee sterkste krieketlande in Afrika, Suid-Afrika en Rhodesië, het hul spelers op grond van ras gekeur en is uitgesluit as deel van die sport boikot teen Suid-Afrika, waarvolgens Oos-Afrika as Afrika verteenwoordiger deelgeneem het. Ná opwarmingswedstryde teen Somerset, Wallis, Glamorgan en verskeie ander klubspanne, het hulle in die eerste rondte teen Engeland, Indië en Nieu-Seeland gespeel, maar al drie sy wedstryde verloor.[31][34] Die krieketwêreldbekertoernooi is opgevolg deur ’n eersterangse wedstryd teen Sri Lanka op die County Ground in Taunton.[35]

In 1978 het die Minor Counties Krieketvereniging Kenia besoek vir sewe wedstryde, waaronder twee teen Oos-Afrika. Die eerste wedstryd met 60 boulbeurte het die Minor Counties met agt paaltjies gewen.[36] ’n Beplande driedaagse wedstryd is afgelas sonder dat ’n bal geboul is.[37] Oos-Afrika het aan die IKR-trofeë 1979,[38] 1982[39] en 1986,[40] maar hulle kon nie vir die krieketwêreldbekertoernooie in 1979, 1983 en 1987 kwalifiseer nie.

Die jaarlikse toernooi teen Kenia en Tanganjika is voortgesit, hoewel Kenia in 1981 van die Oos-Afrikaanse span weggebreek het en voorts deur sy eie nasionale span verteenwoordig is.[41] In 1966 is die driehoekige toernooi in ’n vierhoekige een verander, nadat Zambië toegetree het. Tot in 1980 kon Uganda dié toernooi slegs een keer wen.[6]

Oos- en Sentraal-Afrikaanse span

wysig
Die hoofartikel vir hierdie afdeling is: Oos- en Sentraal-Afrikaanse krieketspan.

In 1989 het die Oos-Afrikaanse span homself aan die IKR onttrek[26] en is in dieselfde jaar deur die Oos- en Sentraal-Afrikaanse krieketspan vervang.[15][42] Dié nuwe span was ’n gesamentlike span van Malawi, Tanzanië, Uganda en Zambië, en hulle het in 1990 vir die eerste keer aan die IKR-trofee deelgeneem, en daarna in 1994, 1997 en 2001, maar hulle kon nie vir die krieketwêreldbekertoernooie in 1992, 1996, 1999 en 2003 kwalifiseer nie.[43]

IKR-lidmaatskap

wysig

Uganda het homself aan die Oos- en Sentraal-Afrikaanse span onttrek en in 1998 en op sy eie as ’n assosiaatlid by die IKR aangesluit. Hul eerste internasionale toernooi was die IKR-trofee 2001.[15] Nadat hulle al hul wedstryde tydens die eerste rondte kon wen, het hulle hul uitspeelwedstryd teen die Verenigde Arabiese Emirate verloor en sodoende die tweede rondte, asook die Krieketwêreldbeker 2003 misgeloop.[44] In die daaropvolgende jaar het hulle die derde plek beklee in hul groep tydens die Afrikabeker.[15][45]

In 2004 het Uganda tydens die Interkontinentale Beker sy eerste internasionale wedstryde teen Kenia en Namibië gespeel en teen laasgenoemde gewen.[15][46] In Augustus dieselfde jaar het hulle die Afrika-krieketvereniging Kampioenskap in Zambië as naaswenner ná Namibië afgesluit.[15][47] Daarmee het hulle gekwalifiseer vir die daaropvolgende jare se IKR-trofee wat hulle in die twaalfde en laaste plek afgesluit het,[15] nadat hulle in die laaste uitspeelwedstryd deur Papoea-Nieu-Guinee verslaan is, waarmee hulle nie vir die Krieketwêreldbeker 2007 kon kwalifiseer nie.[48] Vroeg in dieselfde jaar het hulle tydens die Interkontinentale Beker teen Namibië en Kenia te staan gekom, maar albei wedstryde verloor.[49]

Deelname aan wêreldbekerkwalifiseringstoernooie

wysig
 
Joel Olwenyi, voormalige kaptein van die Ugandese nasionale span
 
Uganda vier hul oorwinning tydens die Wêreldkrieketliga se afdeling drie in 2007

In Januarie 2007 het Uganda te staan gekom teen Bermuda[50] en Kanada,[51] toe albei spanne besig was met voorbereidings op die Wêreldkrieketliga se afdeling een in Nairobi.[52] Daarmee kon Uganda homself ook voorberei op die afdeling drie van dieselfde toernooi in Darwin, Australië. Uganda het sy wedstryde in Groep B teen die Kaaimanseilande, Hongkong en Tanzanië gewen, voordat hulle Papoea-Nieu-Guinee in die halfeindstryd[53] en Argentinië in die eindstryd geklop het.[15][54] Daarmee het hulle ’n plek by die IKR se Hoëprestasieprogram bespreek,[55] en is bevorder na afdeling twee.

Uganda het voor die T20I-wêreldbeker 2007 aan ’n vierhoekige toernooi in Nairobi met Bangladesj, Kenia en Pakistan deelgeneem. Soos verwag is hulle deur Pakistan en Bangladesj geklop, voordat hulle die mededinger Kenia verrassend met twee paaltjies kon klop.[15][56] Daarop het in Oktober 2007 twee eendaagse wedstryde teen Bermuda gevolg, ook in Nairobi. Hulle het hul meer ervare opponent verras en met slegs sewe lopies verloor nadat Nandikishore Patel ’n vyftigtal aangeteken het,[57] voordat hulle die tweede wedstryd met 43 lopies kon wen nadat Joel Olwenyi ook ’n vyftigtal gemoker het.[58] In November 2007 het Uganda Windhoek besoek om aan die Wêreldkrieketliga se afdeling twee deel te neem. Uganda is deur Denemarke, Namibië, Oman en die Verenigde Arabiese Emirate verslaan, maar hulle kon Argentinië en hul uitspeelwedstryd wen en het sodoende in die vyfde plek geëindig.[59] Met sy voorlaaste plek is Uganda na afdeling drie 2009 afgeskakel.[60] In 2008 het Uganda die besoekende MKK in ’n eendaagse wedstryd verslaan, terwyl die driedaagse wedstryd onbeslis geëindig het.[15]

In Januarie 2009 kon Uganda vier van sy vyf groepwedstryde in Buenos Aires wen en het met Afghanistan en Papoea-Nieu-Guinee gelyk aan punte geëindig, en met ’n beter lopietempo die laaste plek by die Krieketwêreldbekerkwalifisering 2009 bespreek.[15][61] In April 2009 het Uganda Suid-Afrika vir die Krieketwêreldbekerkwalifisering 2009 besoek. Ondanks sy eerste oorwinning oor Namibië het Uganda al sy oorblywende wedstryde in Groep A verloor en die Super Agt misgeloop, waarmee hulle nie vir die Krieketwêreldbeker 2011 kon kwalifiseer nie.[62] Uganda het die tiende plek behaal, nadat hulle Denemarke kon klop, maar die uitspeelwedstryde teen Bermuda verloor het, waarmee hulle na die Wêreldkrieketliga se afdeling drie 2013 afgeskakel is.[63] Daarmee het Uganda ’n plek by die Krieketwêreldbekerkwalifisering 2014 vir die Krieketwêreldbeker 2015 bespreek, maar hulle is reeds in die eerste rondte uitgeskakel.[64] Daarmee is die Ugandese na die Wêreldkrieketliga 2012–18 se afdeling drie 2014 afgeskakel.

In 2012 het die Ugandese vir die eerste keer die T20I-wêreldbekerkwalifisering gehaal, maar hulle is reeds in die eerste rondte uitgeskakel en het sodoende die T20I-wêreldbeker 2012 versuim.[65] Die T20I-wêreldbekerkwalifisering 2013 het op ’n soortgelyke manier verloop, waardeur Uganda die T20I-wêreldbeker 2014 misgeloop het.[66] In die daaropvolgende kwalifiseringsfase het hulle nie die T20I-wêreldbekerkwalifisering 2015 vir die T20I-wêreldbeker 2016 gehaal nie.

In afdeling 2014 drie het hulle die eindstryd gehaal, maar hulle is deur Nepal met 62 lopies verslaan.[67] Met hul verskyning in die eindstryd het hulle ’n plek by die afdeling twee 2015 bespreek, waar hulle reeds in die eerste rondte uitgeskakel is en sodoende na afdeling drie 2017 afgeskakel is. Dit het die Ugandese in die vyfde plek afgesluit, waardeur hulle na afdeling vier 2018 afgeskakel is en die Krieketwêreldbeker 2019 misgeloop het.[68] In dié toernooi het hulle die regstreekse bevordering na afdeling drie 2018 behaal.[69]

In Augustus 2018 het Uganda Ghana tydens die Afrika T20I-beker vervang, nadat Ghana Krieket Suid-Afrika se uitnodiging van die hand gewys het; vir Uganda het dié toernooi ook as ’n voorbereiding op die afdeling drie 2018 gedien.[70] In die afdeling drie 2018 het die Ugandese die laaste plek behaal en is na die Krieketwêreldbeker-uitdaagliga 2019–2022 afgeskakel.[71]

Onlangse ontwikkeling

wysig
 
Die Rwandese en Ugandese nasionale krieketspanne in Desember 2020

Uganda het aan die T20I-wêreldbeker 2021 se Afrikakwalifisering 2019 deelgeneem en in die vierde plek geëindig. Tydens die T20I-wêreldbekerkwalifisering B het die Ugandese die uitspeelwedstryd om die vyfde plek behaal, waarmee hulle nie vir die T20I-wêreldbeker 2022 kon kwalifiseer nie.[72]

Ná April 2019 het Uganda deelgeneem aan die Krieketwêreldbeker-uitdaagliga 2019–2022 vir die Krieketwêreldbeker 2023.[73][74] In dié toernooi het die Ugandese die tweede plek in hul groep behaal, waarmee hulle die Krieketwêreldbeker-uitspeelrondte 2023 misgeloop het.[75] Daartussen het Uganda die eindstryd van die Afrika T20I-beker teen Tanzanië met agt paaltjies gewen.[76] In Desember 2022 het die Ugandese die Oos-Afrikaanse T20I-reeks gewen, waaraan ook Rwanda en Tanzanië deelgeneem het.[77] In Junie 2023 het hulle die eindstryd van die Kontinentbeker T20I Afrika 2023 gehaal, waarin hulle Kenia met een lopie kon klop.[78] Twee maande later het Uganda die Oos-Afrikaanse T20I-beker 2023 teen Rwanda en Tanzanië beklink.[79]

Op 26 November 2023 het Uganda sy eerste oorwinning oor ’n volle lid aangeteken, nadat hulle Zimbabwe tydens die T20I-wêreldbeker se Afrikakwalifisering 2023 in Namibië kon klop.[80] Nadat Uganda vyf van sy ses wedstryde kon wen, het hulle vir die T20I-wêreldbeker 2024 gekwalifiseer, gelyk aan hul eerste deelname aan ’n internasionale kriekettoernooi nog.[81] Voorheen kon die o/19-nasionale span al vir drie krieketwêreldbekertoernooie kwalifiseer.[82] Tydens die hooftoernooi het die span swak nederlae gely teen die volle lede Afghanistan (met 125 lopies),[83] Wes-Indië (met 134 lopies)[84] en Nieu-Seeland (met nege paaltjies),[85] maar hulle kon daarin slaag om Papoea-Nieu-Guinee (met drie paaltjies) te klop, gelyk aan hul eerste T20I-wêreldbekeroorwinning en eerste oorwinning in enige IKR-toernooi ooit.[86]

Kleure

wysig

In T20I-krieket dra Uganda geel truie met ’n rooi kleuraksent, ’n swart V-halslyn en geel broeke. Veldspelers dra ’n geel bofbalpet of ’n geel sonhoed. Die kolwers se helms is ook geel geverf. Gedurende IKR-toernooie verskyn die borg se embleem op die regter mou en die belettering UGANDA verskyn op die middel van die trui.

Die Ugandese nasionale krieketspan se bynaam is Cricket Cranes.[87] Die Ugandese Krieketvereniging se kenteken toon derhalwe ’n mahem.

Tuisstadions

wysig
Ligging van Ugandese krieketstadions

Uganda beskik oor geen amptelike tuisstadion vir sy nasionale span nie. Die Ugandese nasionale krieketspan span vir hul krieketwedstryde eerder ’n verskeidenheid stadions dwarsdeur Uganda in:

No. Stadion Plek Eerste wedstryd
1 Lugogo-stadion Kampala 20 Mei 2019
2 Kyambogo-krieketovaal Kampala 20 Mei 2019
3 Entebbe-krieketovaal Entebbe 10 September 2021

Spelers

wysig

Spelerstatistieke

wysig

Altesaam het vir Uganda 36 spelers T20I-krieket gespeel. Vervolgens die spelers, wat vir die Ugandese span die meeste lopies aangeteken en die meeste paaltjies geneem het.

Lopies

wysig
T20I
Speler Tydperk T20Is Lopies
Simon Ssesazi 2021–hede 82 2 081
Riazat Ali Shah 2019–hede 61 1 261
Roger Mukasa 2019–hede 58 1 186
Dinesh Nakrani 2019–hede 60 0891
Ronak Patel 2021–hede 42 0805
Korrek teen: 15 Junie 2024[88]

Paaltjies

wysig
T20I
Speler Tydperk T20Is Paaltjies
Henry Ssenyondo 2019–hede 78 94
Alpesh Ramjani 2022–hede 43 74
Dinesh Nakrani 2019–hede 60 68
Bilal Hassun 2021–hede 46 65
Frank Nsubuga 2019–hede 56 57
Korrek teen: 15 Junie 2024[89]

Spankapteins

wysig

Tot op hede was ses spelers reeds die kaptein vir Uganda tydens ’n T20I-wedstryd.[90]

T20I[91]
No. Naam Tydperk
1 Roger Mukasa 2019–2023
2 Arnold Otwani 2020–2021
3 Brian Masaba 2021–hede
4 Deusdedit Muhumuza 2021
5 Kenneth Waiswa 2022–2024
6 Riazat Ali Shah 2023

Rekords

wysig

Krieketwêreldbekerrekord

wysig
Jaar Uitslag
1975 Sien   Oos-Afrika
1979 Sien   Oos-Afrika
1983 Sien   Oos-Afrika
1987 Sien   Oos-Afrika
1992 Nie ’n IKR-lid nie
1996 Nie ’n IKR-lid nie
1999 Nie ’n IKR-lid nie
2003 Nie gekwalifiseer nie
2007 Nie gekwalifiseer nie
2011 Nie gekwalifiseer nie
2015 Nie gekwalifiseer nie
2019 Nie gekwalifiseer nie
2023 Nie gekwalifiseer nie
2027 N.v.t.
2031 N.v.t.

Kampioenetrofeerekord

wysig
Jaar Uitslag
1998 Nie ’n IKR-lid nie
2000 Nie gekwalifiseer nie
2002 Nie gekwalifiseer nie
2004 Nie gekwalifiseer nie
2006 Nie gekwalifiseer nie
2009 Nie gekwalifiseer nie
2013 Nie gekwalifiseer nie
2017 Nie gekwalifiseer nie
2025 Nie gekwalifiseer nie
2029 N.v.t.

T20I-rekord teen ander lande

wysig
Teenstander Wedstryde Gewen Verloor Gelykop Onbeslis % Gewen Eerste T20I-oorwinning
t. Toetslande
  Afghanistan 1 0 1 0 0 0,00 –
  Nieu-Seeland 1 0 1 0 0 0,00 –
  Wes-Indië 1 0 1 0 0 0,00 –
  Zimbabwe 1 1 0 0 0 100,00 26 November 2023
t. Assosiaatlede
  Botswana 6 6 0 0 0 100,00 20 Mei 2019
  Eswatini 1 1 0 0 0 100,00 19 Oktober 2021
  Ghana 4 4 0 0 0 100,00 23 Mei 2019
  Hongkong 2 2 0 0 0 100,00 11 Julie 2022
  Jersey 1 1 0 0 0 100,00 15 Julie 2022
  Katar 3 1 2 0 0 33,33 15 Februarie 2020
  Kenia 16 11 4 0 1 68,75 15 September 2021
  Lesotho 1 1 0 0 0 100,00 19 Oktober 2021
  Malawi 2 2 0 0 0 100,00 16 Oktober 2021
  Mosambiek 2 2 0 0 0 100,00 18 September 2022
  Namibië 9 1 8 0 0 11,11 9 April 2022
  Nederland 1 0 1 0 0 0,00 –
  Nigerië 6 6 0 0 0 100,00 11 September 2021
  Papoea-Nieu-Guinee 2 1 1 0 0 50,00 5 Junie 2024
  Rwanda 18 17 1 0 0 94,44 17 Oktober 2021
  Seychelle 1 1 0 0 0 100,00 22 Oktober 2021
  Tanzanië 16 12 2 0 2 75,00 18 November 2021
Algeheel 95 70 22 0 3 73,68 20 Mei 2019
Rekords volledig tot en met T20I #2685 op 15 Junie 2024. Gelykop verwys na wedstryde wat deur ’n valbyl (soos ’n Superboulbeurt) beslis is. Wenpersentasies sluit onbesliste wedstryde uit en gelykop as ’n halwe oorwinning (ongeag die valbyl).[92]

T20I-wêreldbekerrekord

wysig
Jaar Uitslag
2007 Nie gekwalifiseer nie
2009 Nie gekwalifiseer nie
2010 Nie gekwalifiseer nie
2012 Nie gekwalifiseer nie
2014 Nie gekwalifiseer nie
2016 Nie gekwalifiseer nie
2021 Nie gekwalifiseer nie
2022 Nie gekwalifiseer nie
2024 Eerste rondte
2026 N.v.t.
2028 N.v.t.
2030 N.v.t.

Sien ook

wysig
  Krieketportaal

Verwysings

wysig
  1. ↑ (en) "ICC Rankings". Internasionale Krieketraad.
  2. ↑ (en) "T20I matches – Team records". ESPNcricinfo.
  3. ↑ (en) "T20I matches – 2024 Team records". ESPNcricinfo.
  4. ↑ 4,0 4,1 (en) "Uganda". Cricket Archive. Geargiveer vanaf die oorspronklike op 9 Augustus 2022. Besoek op 9 Augustus 2022.
  5. ↑ (en) "Other matches played by Uganda". Cricket Archive. Geargiveer vanaf die oorspronklike op 22 November 2018. Besoek op 22 November 2018.
  6. ↑ 6,0 6,1 (en) "History of Kenyan cricket". Geargiveer vanaf die oorspronklike op 24 Julie 2008. Besoek op 24 Julie 2008.
  7. ↑ (en) Divy Tripathi (30 November 2023). "A historic first for Uganda as side joins Namibia into T20WC 2024". Internasionale Krieketraad. Besoek op 15 Junie 2024.
  8. ↑ (en) "'Doesn't get more special' – Uganda celebrate first win". BBC. 6 Junie 2024. Besoek op 15 Junie 2024.
  9. ↑ (en) "All T20 matches between ICC members to get international status". Internasionale Krieketraad. 26 April 2018. Besoek op 29 November 2023.
  10. ↑ (en) "Men's T20I Team Rankings". Internasionale Krieketraad. 12 Junie 2024. Besoek op 15 Junie 2024.
  11. ↑ (en) "U.C.A Constitution". Ugandese Krieketvereniging. Besoek op 15 Junie 2024.
  12. ↑ (en) "Uganda Cricket Association". Internasionale Krieketraad. Besoek op 15 Junie 2024.
  13. ↑ (en) "Members". Afrikakrieketvereniging. Besoek op 15 Junie 2024.
  14. ↑ (en) Martin Williamson (11 Januarie 2006). "The Under-19 World Cup". ESPNcricinfo. Besoek op 15 Junie 2024.
  15. ↑ 15,00 15,01 15,02 15,03 15,04 15,05 15,06 15,07 15,08 15,09 15,10 15,11 15,12 15,13 15,14 15,15 15,16 15,17 (en) "A Timeline of Uganda Cricket". Europese Krieketraad. Geargiveer vanaf die oorspronklike op 17 Februarie 2011. Besoek op 17 Februarie 2011.
  16. ↑ (en) Rowland Bowen (1970). Cricket: a History of Its Growth and Development Throughout the World. Londen: Eyre & Spottiswoode. p. 194. ISBN 978-0-413-27860-9.
  17. ↑ (en) Rowland Bowen (1970). Cricket: a History of Its Growth and Development Throughout the World. Londen: Eyre & Spottiswoode. p. 361. ISBN 978-0-413-27860-9.
  18. ↑ (en) Rowland Bowen (1970). Cricket: a History of Its Growth and Development Throughout the World. Londen: Eyre & Spottiswoode. p. 359. ISBN 978-0-413-27860-9.
  19. ↑ (en) "East Africa v Pakistan Cricket Writers' XI". Cricket Archive. Geargiveer vanaf die oorspronklike op 1 Mei 2010. Besoek op 1 Mei 2010.
  20. ↑ (en) "East Africa v Sunder Cricket Club". Cricket Archive. Geargiveer vanaf die oorspronklike op 13 November 2012. Besoek op 13 November 2012.
  21. ↑ (en) "East Africa v South African Non-Europeans". Cricket Archive. Geargiveer vanaf die oorspronklike op 19 November 2022. Besoek op 19 November 2022.
  22. ↑ (en) "East Africa v International XI". Cricket Archive. Geargiveer vanaf die oorspronklike op 7 Januarie 2019. Besoek op 7 Januarie 2019.
  23. ↑ (en) "D'Oliviera Hits Out". The Press. 13 Februarie 1962. p. 15.
  24. ↑ (en) "Century". The Press. 3 Oktober 1962. p. 19.
  25. ↑ (en) "East African Invitation XI v Marylebone Cricket Club". Cricket Archive. Geargiveer vanaf die oorspronklike op 9 Maart 2016. Besoek op 9 Maart 2016.
  26. ↑ 26,0 26,1 (en) "East Africa". Cricket Archive. Geargiveer vanaf die oorspronklike op 4 Februarie 2020.
  27. ↑ (en) "East Africa v Indians". Cricket Archive. Geargiveer vanaf die oorspronklike op 26 Januarie 2018. Besoek op 26 Januarie 2018.
  28. ↑ (en) "East Africa v International XI". Cricket Archive. Geargiveer vanaf die oorspronklike op 4 Januarie 2022. Besoek op 4 Januarie 2022.
  29. ↑ (en) "North Wales v East Africa". Cricket Archive. Geargiveer vanaf die oorspronklike op 5 November 2012. Besoek op 5 November 2012.
  30. ↑ (en) "East Africa v Marylebone Cricket Club". ESPNcricinfo. Besoek op 15 Junie 2024.
  31. ↑ 31,0 31,1 (en) "World Cup 1975". Cricket Archive. Geargiveer vanaf die oorspronklike op 1 Oktober 2012.
  32. ↑ (en) "A history of Kenyan cricket". Friends of Kenya Cricket. Geargiveer vanaf die oorspronklike op 24 Julie 2008.
  33. ↑ (en) "N.Z. cricketers to play E. Africa". The Press. 26 Julie 1974. p. 20.
  34. ↑ (en) Tony Cozier. "West Indies victory heralds a new era". ESPNcricinfo. Besoek op 15 Junie 2024.
  35. ↑ (en) "Scorecard of East Africa v Sri Lanka match, 23 June 1975". Cricket Archive. Geargiveer vanaf die oorspronklike op 4 Februarie 2020.
  36. ↑ (en) "East Africa Cricket Conference v Minor Counties". Cricket Archive. Geargiveer vanaf die oorspronklike op 11 Maart 2016. Besoek op 11 Maart 2016.
  37. ↑ (en) "East Africa Cricket Conference v Minor Counties". Cricket Archive. Geargiveer vanaf die oorspronklike op 7 Oktober 2008. Besoek op 7 Oktober 2008.
  38. ↑ (en) "1979 ICC Trophy". ESPNcricinfo. Besoek op 15 Junie 2024.
  39. ↑ (en) "1982 ICC Trophy". ESPNcricinfo. Besoek op 15 Junie 2024.
  40. ↑ (en) "1986 ICC Trophy". ESPNcricinfo. Besoek op 15 Junie 2024.
  41. ↑ (en) "Kenya". Cricket Archive. Geargiveer vanaf die oorspronklike op 4 Februarie 2020. Besoek op 4 Februarie 2020.
  42. ↑ (en) "East and Central Africa". Cricket Archive. Geargiveer vanaf die oorspronklike op 3 Maart 2016. Besoek op 3 Maart 2016.
  43. ↑ (en) "ICC Trophy matches played by East and Central Africa". Cricket Archive. Geargiveer vanaf die oorspronklike op 9 Oktober 2012. Besoek op 9 Oktober 2012.
  44. ↑ (en) "2001 ICC Trophy". ESPNcricinfo. Besoek op 15 Junie 2024.
  45. ↑ (en) "2002 Africa Cup". Europese Krieketraad. Geargiveer vanaf die oorspronklike op 20 Maart 2012. Besoek op 20 Maart 2012.
  46. ↑ (en) "2004 ICC Intercontinental Cup". Europese Krieketraad. Geargiveer vanaf die oorspronklike op 25 Februarie 2013. Besoek op 25 Februarie 2013.
  47. ↑ (en) "African qualifying for the 2005 ICC Trophy". Europese Krieketraad. Geargiveer vanaf die oorspronklike op 4 Januarie 2014. Besoek op 4 Januarie 2014.
  48. ↑ (en) "2005 ICC Trophy". ESPNcricinfo. Besoek op 15 Junie 2024.
  49. ↑ (en) "2005 ICC Intercontinental Cup". Europese Krieketraad. Geargiveer vanaf die oorspronklike op 2 Februarie 2014. Besoek op 2 Februarie 2014.
  50. ↑ (en) "Scorecard of Bermuda v Uganda, 27 January 2007". Cricket Archive. Geargiveer vanaf die oorspronklike op 3 Maart 2016. Besoek op 3 Maart 2016.
  51. ↑ (en) "Scorecard of Canada v Uganda, 28 January 2007". Cricket Archive. Geargiveer vanaf die oorspronklike op 25 Januarie 2018. Besoek op 25 Januarie 2018.
  52. ↑ (en) "2007 ICC World Cricket League Division One". Cricket Archive. Geargiveer vanaf die oorspronklike op 24 September 2015. Besoek op 24 September 2015.
  53. ↑ (en) "2007 ICC World Cricket League Division Three". Europese Krieketraad. Geargiveer vanaf die oorspronklike op 3 Oktober 2012. Besoek op 3 Oktober 2012.
  54. ↑ (en) Andrew Nixon (2 Junie 2007). "Uganda lift Division Three title". Europese Krieketraad. Geargiveer vanaf die oorspronklike op 27 September 2013. Besoek op 27 September 2013.
  55. ↑ (en) "Denmark added to ICC High Performance Program". ICC Europe Media Release. Europese Krieketraad. 20 Desember 2006. Geargiveer vanaf die oorspronklike op 27 September 2007. Besoek op 27 September 2007.
  56. ↑ (en) "Uganda Win All-African Clash As Kenya Disappoint". Cricketworld. 2 September 2007. Besoek op 15 Junie 2024.
  57. ↑ (en) "Bermuda Hang On To Clinch Narrow Win Over Uganda". Cricketworld.com. 23 Oktober 2007. Besoek op 15 Junie 2024.
  58. ↑ (en) "Uganda Hit Back With 43-Run Win Over Bermuda". Cricketworld.com. 24 Oktober 2007. Besoek op 15 Junie 2024.
  59. ↑ (en) "ICC WORLD CRICKET LEAGUE". ESPNcricinfo. Besoek op 15 Junie 2024.
  60. ↑ (en) "World Cricket League structure" (PDF). Internasionale Krieketraad. Geargiveer vanaf die oorspronklike (PDF) op 29 September 2007. Besoek op 29 September 2007.
  61. ↑ (en) "ICC World Cricket League". ESPNcricinfo. Besoek op 15 Junie 2024.
  62. ↑ (en) "Cricket World Cup Qualifiers 2009". ESPNcricinfo. Besoek op 15 Junie 2024.
  63. ↑ (en) "Ireland ease closer to 2011 World Cup". ESPNcricinfo. 13 April 2009. Besoek op 15 Junie 2024.
  64. ↑ (en) "Netherlands, Kenya and Canada lose ODI status". ESPNcricinfo. 1 Februarie 2014. Besoek op 15 Junie 2024.
  65. ↑ (en) "Scotland claim fifth in dramatic finish". ESPNcricinfo. 23 Maart 2012. Besoek op 15 Junie 2024.
  66. ↑ (en) "Ahmed five-for helps USA avoid last-place finish". ESPNcricinfo. 26 November 2013. Besoek op 15 Junie 2024.
  67. ↑ (en) "Pun, Malla and Budhaayer shine as Nepal wins Pepsi ICC World Cricket League Division 3". Internasionale Krieketraad. Geargiveer vanaf die oorspronklike op 2 Julie 2016. Besoek op 2 Julie 2016.
  68. ↑ (en) Peter Della Penna (30 Mei 2017). "Oman WCL Division Three champions after rain spoils final". ESPNcricinfo. Besoek op 15 Junie 2024.
  69. ↑ (en) Peter Della Penna (6 Mei 2018). "The Cranes defend 90 to save the Danes". ESPNcricinfo. Besoek op 15 Junie 2024.
  70. ↑ (en) "Uganda replaces Ghana in upcoming Africa T20 Cup". Krieket Suid-Afrika. 28 Augustus 2018. Geargiveer vanaf die oorspronklike op 22 Januarie 2021. Besoek op 22 Januarie 2021.
  71. ↑ (en) "ICC launches the road to India 2023". Internasionale Krieketraad. 12 Augustus 2019. Besoek op 15 Junie 2024.
  72. ↑ (en) Peter Della Penna (17 Julie 2022). "Raza takes 4 for 8 as Zimbabwe win T20 World Cup Qualifier". ESPNcricinfo. Besoek op 15 Junie 2024.
  73. ↑ (en) "All to play for in last ever World Cricket League tournament". Internasionale Krieketraad. 11 April 2019. Besoek op 15 Junie 2024.
  74. ↑ (en) "Uganda cricket team departs today for South Africa". Big Eye. 6 Januarie 2015. Besoek op 15 Junie 2024.
  75. ↑ (en) Andrew Nixon (14 Augustus 2022). "Jersey lose, but claim Challenge League B crown". Europese Krieketraad. Geargiveer vanaf die oorspronklike op 2 Oktober 2022. Besoek op 2 Oktober 2022.
  76. ↑ (en) Tom Grunshaw (26 September 2022). "Uganda win ACA Africa T20 Cup after Shah blitz". Emerging Cricket. Besoek op 15 Junie 2024.
  77. ↑ (en) Andrew Nixon (24 Desember 2022). "Uganda win mammoth tri-series in Rwanda". Europese Krieketraad. Geargiveer vanaf die oorspronklike op 24 Desember 2022. Besoek op 24 Desember 2022.
  78. ↑ (en) Victor Otieno (21 Junie 2023). "Cricket: Uganda pip Kenya to lift Continent Cup". Nation. Besoek op 15 Junie 2024.
  79. ↑ (en) "Cricket Cranes retain East Africa T20 Cup in Kigali". Kawowo. 31 Augustus 2023. Besoek op 15 Junie 2024.
  80. ↑ (en) "Uganda stuns Zimbabwe to throw T20 WC Africa Region Qualifier open". Internasionale Krieketraad. 26 November 2023. Besoek op 15 Junie 2024.
  81. ↑ (en) "Uganda: T20 World Cup qualification 'a dream come true', says captain Brian Masaba". BBC. 30 November 2023. Besoek op 15 Junie 2024.
  82. ↑ (en) Will Macpherson (30 November 2023). "'Cricket Cranes' Uganda qualify for World Cup for first time". Daily Telegraph. Besoek op 15 Junie 2024.
  83. ↑ (en) Mohammad Isam (4 Junie 2024). "Gurbaz, Ibrahim and Farooqi hand Uganda a thrashing". ESPNcricinfo. Besoek op 15 Junie 2024.
  84. ↑ (en) Andrew Fidel Fernando (9 Junie 2024). "Five-star Hosein helps West Indies blow Uganda away". ESPNcricinfo. Besoek op 15 Junie 2024.
  85. ↑ (en) Andrew Fidel Fernando (15 Junie 2024). "NZ win big after blowing away Uganda for 40". ESPNcricinfo. Besoek op 15 Junie 2024.
  86. ↑ (en) Mohammad Isam (5 Junie 2024). "Uganda's bowlers and Riazat seal their first win in T20 World Cup history". ESPNcricinfo. Besoek op 15 Junie 2024.
  87. ↑ (en) "Cricket Cranes make history with T20 World Cup qualification". Kawowo Sports. Besoek op 15 Junie 2024.
  88. ↑ (en) "Records / Uganda / Twenty20 Internationals / Most Runs". ESPNcricinfo. Besoek op 15 Junie 2024.
  89. ↑ (en) "Records / Uganda / Twenty20 Internationals / Most Wickets". ESPNcricinfo. Besoek op 15 Junie 2024.
  90. ↑ Die tydperk verwys na die ooreenstemmende krieketseisoen waarin die eerste of laaste wedstryd van die tyd as kaptein gespeel is.
  91. ↑ (en) "Records / Uganda / Twenty20 Internationals / List of Captains". ESPNcricinfo. Besoek op 15 Junie 2024.
  92. ↑ (en) "Records / Uganda / Twenty20 Internationals / Result summary". ESPNcricinfo. 15 Junie 2024. Besoek op 15 Junie 2024.

Eksterne skakels

wysig
Ontsluit van "https://af.wikipedia.org/w/index.php?title=Ugandese_nasionale_krieketspan&oldid=2679477"