Wikipedia

Tell Brak

Tell Brak was ’n antieke stad in Sirië waarvan die ruïnes ’n tell bevat. Dit was geleë naby die moderne dorp Tell Brak, 50 kilometer noordoos van die stad Al-Hasaka. Die stad se oorspronklike naam is onbekend.[1] Tydens die tweede helfte van die 3de millennium v.C. was dit as Nagar[2] bekend en later as Nawar.[3]

Tell Brak
(Nagar, Nawar)
Tell Brak van ver af gesien, met verskeie uitgrawingsterreine sigbaar.
Tell Brak van ver af gesien, met verskeie uitgrawingsterreine sigbaar.
Land Vlag van Sirië Sirië
Soort Nedersetting
Streek Mesopotamië
Geskiedenis
Gestig 7de millennium v.C.
Tydperk Neolitikum, Bronstydperk
Kulture Halaf, Obeid, Uruk, Kisj, Horiete
Uitgrawings 1937-1938, 1976-2011

Geskiedenis wysig

Tell Brak het in die 7de millennium v.C.[4] as ’n dorpie ontstaan en in die 4de millennium v.C. in een van die grootste stede in Bo-Mesopotamië ontwikkel.[5] Dit het interaksies met die kulture van Suid-Mesopotamië gehad.[6] Aan die begin van die 3de millennium v.C., aan die einde van die Uruk-tydperk, het die stad kleiner geword, maar weer omstreeks 2600 v.C. begin uitbrei. Dit het toe bekend geword as Nagar en was die hoofstad van ’n streekskoninkryk wat die Khaburriviervallei beheer het.

 
Die paleis van Naram-Sin van Akkad, wat by Tell Brak ontdek is.

Nagar is omstreeks 2300 v.C. vernietig en het onder die bewind van die Akkadiese Ryk beland. Daarna het dit ’n tyd van onafhanklikheid beleef as ’n Horitiese stadstaat,[7] voordat dit weer aan die begin van die 2de millennium v.C. kleiner geword het. Teen die 19de eeu v.C. het dit weer vooruitgegaan en onder die bewind van verskillende streeksmagte beland. Omstreeks 1500 v.C. was Tell Brak as Nawar ’n sentrum in Mitanni voordat dit omstreeks 1300 v.C. deur Assirië verwoes is. Die stad het nooit weer sy voormalige belangrikheid herwin nie en ’n klein nedersetting gebly. Dit is die een of ander tyd verlate gelos en het tydens die vroeë Abbasidiese tydperk uit die rekords verdwyn.

Verskillende volke het die stad bewoon, onder andere Semiete en Horiete. Tell Brak was van sy vroegste tydperke af ’n godsdienssentrum; sy broemde Oogtempel[8] was uniek in die Vrugbare Halfmaan en sy hoofgod, Belet-Nagar, is in die hele Khaburstreek aanbid. Die stad was dus ’n belangrike terrein vir pelgrimstogte. Sy kultuur is bepaal deur die verskillende beskawings wat dit bewoon het, maar dit was bekend vir sy steengravering,[9] perdagtiges en glas.[10]

Toe die stad onafhanklik was, is dit deur ’n plaaslike vergadering of ’n koning regeer. Dit was ’n handelsentrum danksy sy ligging tussen Anatolië, die Levant en Suid-Mesopotamië. Uitgrawings is in 1937 en 1938 gedoen deur sir Max Mallowan, die man van Agatha Christie,[11] en tussen 1979 en 2011 gereeld deur verskillende spanne, totdat werk stopgesit is weens die Siriese Burgeroorlog.[12]

Verwysings wysig

  1. ↑ Bertman 2005, p. 31.
  2. ↑ Eidem 1998, p. 75.
  3. ↑ Bryce 2009, p. 493.
  4. ↑ Ur, Karsgaard & Oates 2011, p. 4, 5.
  5. ↑ Glassner 2003, p. 31.
  6. ↑ Ur, Karsgaard & Oates 2011, p. 8.
  7. ↑ Ristvet 2014, p. 217.
  8. ↑ Akkermans & Schwartz 2003, p. 199.
  9. ↑ Peyronel 2006, p. 408.
  10. ↑ Evans 2008, p. 195.
  11. ↑ Oates 1982, p. 62.
  12. ↑ Bowden 2012, p. 51.

Bronne wysig

  • Akkermans, Peter M. M. G.; Schwartz, Glenn M. (2003). The Archaeology of Syria: From Complex Hunter-Gatherers to Early Urban Societies (c.16,000-300 BC). Cambridge University Press. ISBN 978-0-521-79666-8.
  • Bertman, Stephen (2005) [2003]. Handbook to Life in Ancient Mesopotamia. Oxford University Press. ISBN 978-0-19-518364-1.
  • Biga, Maria Giovanna (2014). "Inherited Space – Third Millennium Political and Cultural Landscape". In Cancik-Kirschbaum, Eva; Brisch, Nicole; Eidem, Jesper (reds.). Constituent, Confederate, and Conquered Space: The Emergence of the Mittani State. Walter de Gruyter. ISBN 978-3-11-026641-2.
  • Bowden, James (2012). "The Voices of Tell Brak". Archaeological Diggings. Hornsby, N.S.W.; Down D.K. 19 (4). ISSN 1322-6525. OCLC 47261199.
  • Bryce, Trevor (2009). The Routledge Handbook of the Peoples and Places of Ancient Western Asia. Routledge. ISBN 978-1-134-15908-6.
  • Evans, Jean M. (2008). "The Mitanni State". In Aruz, Joan; Benzel, Kim; Evans, Jean M. (reds.). Beyond Babylon: Art, Trade, and Diplomacy in the Second Millennium B.C.. Metropolitan Museum of Art. ISBN 978-1-58839-295-4.
  • Glassner, Jean-Jacques (2003) [2000]. The Invention of Cuneiform: Writing in Sumer. Vertaal deur Bahrani, Zainab; Van de Mieroop, Marc. Johns Hopkins University Press. ISBN 978-0-8018-7389-8.
  • Oates, David (1982). "Tell Brak". In Curtis, John (red.). Fifty Years of Mesopotamian Discovery, the Work of the British School of Archaeology in Iraq, 1932–1982. British School of Archaeology in Iraq. ISBN 978-0-903472-05-0.
  • Peyronel, Luca (2006). "Excavations at Tell Brak, Vol. 2: Nagar in the Third Millennium BC". Orientalia. Pontificium Institutum Biblicum. 75 (4). OCLC 557711946.
  • Ristvet, Lauren (2014). Ritual, Performance, and Politics in the Ancient Near East. Cambridge University Press. ISBN 978-1-316-19503-1.
  • Ur, Jason; Karsgaard, Philip; Oates, Joan (2011). "The Spatial Dimensions of Early Mesopotamian Urbanism: The Tell Brak Suburban Survey, 2003–2006". IRAQ. Cambridge University Press - On Behalf of The British Institute for the Study of Iraq (Gertrude Bell Memorial). 73. ISSN 0021-0889.

Skakels wysig

Ontsluit van "https://af.wikipedia.org/w/index.php?title=Tell_Brak&oldid=2384853"