Tokyo Sexwale
Mosima Gabriel Sexwale (5 Maart 1953), beter bekend as Tokyo Sexwale, is 'n sakeman, 'n voormalige Suid-Afrikaanse minister vir menslike nedersettings en voormalige anti-apartheid-aktivis en politieke gevangene. Hy is ’n charismatiese leier en was ’n gevangene op Robbeneiland saam met mense soos Nelson Mandela vir sy anti-apartheid-bedrywighede. Ná die eerste demokratiese verkiesing in Suid-Afrika in 1994 word Sexwale die eerste premier van die Gauteng-provinsie. Hy tree in 1998 uit die politiek en het ’n gerekende sakeleier geword. In 2009 word hy aangestel as minister vir menslike nedersettings vir 'n vierjaartermyn. Hy is getroud met Judy Moon en het twee kinders, Gabrielle en Chris.
| Tokyo Sexwale | |
 Tokyo Sexwale tydens die Wêreld Ekonomiese Forum | |
Minister vir Menslike Nedersettings
| |
| Ampstermyn 10 Mei 2009 – 9 Julie 2013 | |
| President | Jacob Zuma |
|---|---|
| Voorafgegaan deur | Lindiwe Sisulu |
| Opgevolg deur | Connie September |
1ste Premier van Gauteng
| |
| Ampstermyn 7 Mei 1994 – 19 Januarie 1998 | |
| Opgevolg deur | Mathole Motshekga |
Persoonlike besonderhede
| |
| Gebore | 5 Maart 1953 Transvaal |
| Politieke party | African National Congress |
Vroeë lewe
wysigSexwale is in die township Orlando-Wes in Soweto gebore. In 1973 matrikuleer hy aan die Hoërskool Orlando-Wes. In die laat sestigerjare word hy lid van Steve Biko se Swartbewussynsbeweging en leier van die radikale Suid-Afrikaanse Studentebeweging. In die vroeë sewentigerjare sluit hy aan by die ANC se militêre vleuel, Umkhonto we Sizwe ("Spies van die Volk"). Terwyl hy in Swaziland (nou eSwatini) )is, behaal hy ’n diploma in bedryfsleer aan die Universiteit van Botswana, Lesotho en eSwatini. In 1975 verlaat Sexwale die land en ondergaan ’n militêre offisierskursus in die Sowjetunie, waar hy in militêre ingenieurswese spesialiseer.
Gevangenskap
wysigToe hy in 1976 na Suid-Afrika terugkeer, word Sexwale in hegtenis geneem ná ’n skermutseling met die Suid-Afrikaanse Veiligheidsmag en word hy saam met elf ander aangekla en later skuldig bevind aan terrorisme en sameswering om die regering omver te werp. In 1977 word hy vir agttien jaar na Robbeneiland gestuur. Daar studeer hy vir ’n B.Com.-graad aan Unisa. Hy word in Junie 1990 vrygelaat ná dertien jaar in die tronk.
Politieke loopbaan
wysigNá die Suid-Afrikaanse verkiesing in April 1994 word Sexwale verkies tot eerste premier van die nuwe PWV-provinsie (wat in 1994 na Gauteng hernoem is). Hy bewerkstellig vrede in verskeie polities plofbare swartwoongebiede. In 1998 verlaat hy die politiek en sluit by die korporatiewe sektor aan.
Van 2007 af het die media begin gis dat Sexwale as ANC-leier sal staan (en dus vir die amp van president) voor die algemene verkiesing van 2009. Hy het voorheen erken dat "verskeie mense” hom probeer oorhaal om hom as ANC-leier beskikbaar te stel.
Vanaf 10 Mei 2009 tot 9 Julie 2013 dien hy in president Jacob Zuma se kabinet as minister vir menslike nedersettings.