Vadertjie Langbeen
Vadertjie Langbeen is 'n swart en wit Afrikaanse rolprent wat op 25 Februarie 1955 uitgereik is. Dit moet nie met die gelyknamige Nederlandse rolprent (1955) en Nederlandse TV-film (1964) verwar word nie.
| Vadertjie Langbeen | |
|---|---|
| Regisseur | Pierre de Wet |
| Met | Rita Bornmann Bob Griffiths Yvonne Theron |
| Kinematografie | John C. Brown |
| Redigeerder | Dennis Gurney |
| Uitgereik | 25 Februarie 1955 |
| Speeltyd | 1 uur, 7 minute |
| Land | Suid-Afrika |
| Taal | Afrikaans |
| IMDb-profiel | |
Genre
wysigDie rolprent is 'n romantiese drama.
Hoofrolspelers
wysig- Rita Bornmann as Trudi Adendorff
- Bob Griffiths as Jacques de Villiers die weldoener
- Yvonne Theron as Martie Cilliers
- Patrick Mynhardt as Barry Cilliers
- Wynona Cheyney as Gloria de Villiers
- Paula Styger as Paula de Villiers
- Albie van der Bijl as Bruyns
- Joan Viljoen
- Hester van Niekerk
- Vlokkie du Toit
- Francis Coertze as Tant Sarie
- Esther Mentz as Mrs. de Beer
- Hildegarde Botha
- Paddy Norval as Katie
- Gert van den Bergh as Jacques (stem) (nie gekrediteer nie)
Die verhaal van die rolprent
wysigTrudi Adendorff woon haar lewe lank in ’n kinderhuis, tot die dag toe sy haar matriek voltooi en ’n onbekende weldoener haar universiteit toe stuur. Hy is Jacques de Villiers, 'n skatryk sakeman, en sy enigste vereistes is: sy mag nie sy naam weet nie en sy moet gereeld vir hom skryf oor haar vordering. Hy skryf egter nooit terug nie.
Sy ontmoet later haar "Vadertjie Langbeen", soos sy hom begin noem het omdat 'n langbeen-skaduwee teen 'n muur en sy vlugtige inklimmery in 'n motor al was wat sy ooit van hom gesien het. Maar sy besef hoegenaamd nie dat dié Jacques wat sy ontmoet het, eintlik Vadertjie Langbeen is nie en glo vas dat haar gawe weldoener 'n bleskop en stokou man moet wees.
Deur haar eensydige korrespondensie met haar onbekende voog ontstaan daar by Trudi 'n tere liefdesband met die enigste soort ouerfiguur wat sy ooit geken het, maar 'n liefde op 'n romantiese vlak ontwikkel ook tussen haar en Jacques de Villiers. Weens 'n misverstand vlieg Jacques egter die land uit vir 'n jaar, vas onder die indruk dat daar 'n ander man in haar lewe is. Met haar gradeplegtigheid keer hy egter terug en ontdek hy dat daar in der waarheid niemand anders as hy vir Trudi was nie.
Die rolprent eindig waar sy uiteindelik 'n kamer binnestap om van aangesig tot aangesig met haar Vadertjie Langbeen kennis te maak—en Jacques daar vind, wat haar in sy arms neem. "Dan is JY Vadertjie Langbeen!" sê sy verras. "Kon jy nooit raai nie?" sê-vra hy. 'n Skaduweebeeld teen 'n muur toon hoe Vadertjie Langbeen en die meisie van sy hart mekaar soen.
