Vlag van Somaliland

Die vlag van Somaliland is op 14 Oktober 1996 amptelik in gebruik geneem. Die vlag vertoon ’n horisontale driekleur met ewe wye bane in (van bo na onder) groen, wit en rooi met die Sjahada in wit op die groen baan en ’n vyfpuntige swart ster in die wit baan.

Vlag van Somaliland

Vlag van Somaliland
Gebruik	Nasionale vlag
Verhouding	1:2
Goedgekeur	14 Oktober 1996
Ontwerp	’n Horisontale driekleur in groen, wit en rooi met die Sjahada in wit op die groen baan en ’n swart ster in die wit baan.

In 1991 is ’n eie plaaslike regering in Somalië gevestig maar die gebied se self-verklaarde onafhanklikheid word deur geen land of internasionale organisasie erken nie.

Die Grondwet van Somaliland, soos goedgekeur deur ’n referendum op 31 Mei 2001:

Artikel 7: Die Vlag, die Embleem en die Nasionale Lied

1. Die vlag van die Republiek van Somaliland sal bestaan uit drie horisontale, parallelle en gelyke seksies, die boonste seksie, wat groen is, het in die middel daarvan in Arabies die Sjahada: La Ilaha Ill-Allah, Muhammadan Rasulullah (أشهد أن لا إله إلاَّ الله و أشهد أن محمد رسول الله, Daar is geen ander God behalwe Allah nie, Muhammed is die Boodskapper van Allah); die middel seksie is wit en het in die middel ’n swart ster; die onderste seksie is rooi.

Simboliek

Die groen stel vooruitgang voor, die wit stel vrede voor, die rooi stel die bloed voor van die helde wat gesterf het vir vryheid, die Sjahada stel Islam voor en die swart ster stel die ondergang van die droom van Groter Somalië voor.

Ontwerp

Die vlag maak gebruik van die Pan-Arabiese kleure (groen, swart wit en rooi). Op die groen baan is die Sjahada in wit, soortgelyk aan die vlag van Saoedi-Arabië.

Alhoewel die bogenoemde artikel 7 duidelik stel dat die onderste baan rooi moet wees, is baie weergawes gesien met ’n duidelike oranje baan. ’n Ander variasie is die oriëntasie van die ster; baie Somaliland vlae het die ster wat onderstebo op die vlag is en dit word wyd gebruik.

Sommige vlae het ’n groen baan waarvan die Sjahada verwyder is en kan dus uitgesonder word van die reëls i.v.m. die halfmas hang van die vlag en nog ander het die Sjahada oor die hele lengte van die groen baan geskryf.

Die meeste van Somaliland se vlae is in die verhouding van 1:2. Afbeeldings van vlae op die internet gebruik dikwels verkeerdelik ’n verhouding van 2:3 vir die vlag.

Ander vlae

• 
  Die Union Jack was tot 1903 die amptelike vlag van Somaliland
• 
  Die vlag van Brits-Somaliland, 1903 tot 1950
• 
  Die vlag van Brits-Somaliland, 1950 tot 26 Junie 1960
• 
  Die vlag van Somalië was van 26 Junie 1960 tot 18 Mei 1991 die vlag van Somaliland
• 
  Die vlag van Somaliland, 18 Mei 1991 tot 14 Oktober 1996
• 
  Die rooi baan word soms met ’n oranje baan vervang

Vlae van Brits-Somaliland

1903–1950

Toe die Britte in 1903 die area waarin Somaliland geleë is, beset het, het hulle ’n protektoraat gevestig en dit deel van die Britse Ryk gemaak. Die Britte het ’n nuwe vlag vir die gebied aanvaar en dit Brits-Somaliland genoem. Soos baie lande van die Britse Statebond was die vlag ’n blou Britse vaandel met die embleem op die wapperkant van die vlag. In hierdie geval was dit ’n koedoe op ’n wit skyf. Die vlag is gebruik in die Somaliese vloot en op staatsgeboue in Brits-Somaliland.

1950–1960

In 1950 het die embleem van die Protektoraat van Brits-Somaliland verander, en daarmee saam die vlae waarop dit was. Die kop en skouers van die koedoe is behou en bo-op ’n skild geplaas. Die kop van die koedoe is gedraai sodat dit reguit kyk en in die middel van die horings van die bok is die Britse Kroon om die Britse koninklike familie asook die Britse Ryk voor te stel. Onder die bokkop is ’n wapenskild geplaas.

Toe Brits-Somaliland onafhanklikheid verkry het op 26 Junie 1960 en op 1 Julie 1960 met Italiaans-Somaliland saamgesmelt het, het die vlag in onbruik verval.

Soortgelyke vlae

• 
  Vlag van die Arabiese Demokratiese Republiek Sahara
• 
  Vlag van Egipte
• 
  Vlag van Irak
• 
  Vlag van Jemen
• 
  Vlag van Jordanië
• 
  Vlag van Koeweit
• 
  Vlag van Palestina
• 
  Vlag van Sirië (regering)
• 
  Vlag van Sirië (1932–1958, 1961–1963, opposisie sedert 2011)
• 
  Vlag van Soedan
• 
  Vlag van die Verenigde Arabiese Emirate

Protokol

Die regering het beginsels vasgestel vir die gebruik van die vlag. Dit behoort met respek hanteer te word asook baie versigtig en sensitief. Weens die belangrikheid van die Sjahada vir Islam is daar spesiaal regulasies gemaak oor die gebruik van die vlag.

Halfmas

Die is verbode vir Somali’s om die vlag op halfmas te hang omdat dit die Sjahada bevat (wat in Arabies lui: Daar is geen ander God buiten Allah nie, Muhammed is die Boodskapper van Allah) wat beteken dat dit on-Islamities en disrespekvol sal wees om die vlag so te gebruik. Selfs indien die president of iemand met ’n hoë regeringstatus in Somaliland sterf word die vlag nie halfmas gehang nie. Toe die tweede President van Somaliland, Muhammad Haji Ibrahim Egal oorlede is het hy ’n staatsbegrafnis gekry en baie Somali’s het die begrafnis bygewoon maar die vlag bo gehang, in plaas van die gebruiklike halfmas-gebaar. Indien ’n persoon gevang word dat die vlag halfmas gehang word kan hy tronkstraf kry of in die hof verskyn op ’n kriminele aanklag. Eenderse reëls, weens dieselfde redes, geld vir die vlag van Saoedi-Arabië.

Eksterne skakels

• (en) Somaliland by Flags of the World.

Hierdie artikel is in sy geheel of gedeeltelik vanuit die Engelse Wikipedia vertaal.