Willie Neethling
Ds. William James (Willie) Neethling (Stellenbosch, Kaapkolonie, 29 Mei 1866 – Mochudi, Betsjoeanaland, 18 Februarie 1897) was 'n sendeling van die Nederduitse Gereformeerde Kerk van wie hoë verwagtinge gekoester is, maar wat skaars 10 maande op die sendingstasie Mochudi gewerk het voor hy dood is in die ouderdom van 23 jaar.
Willie Neethling was die agtste van die 12 kinders van ds. J.H. Neethling van Stellenbosch. Willie se broer Christie (1871–1926) was predikant in drie NG gemeentes. Neethling ontvang sy skool- en universiteitsopleiding op Stellenbosch en word op 27 September 1894 as predikant gelegitimeer. Daarna volg hy met die oog op sendingwerk 'n kort kursus in geneeskunde aan die Livingstone-kollege in Londen en onderneem 'n reis deur Europa.
By sy terugkeer in 1895 is hy deur die Buitelandse Sendingkommissie van die Kaapse Kerk gevra om as opvolger van eerw. E.B. Beyer as sendeling onder die Bakgatla-stam van Mochudi in Betsjoeanaland te gaan werk, pleks van na Masjonaland te gaan soos oorspronklik sy plan was. Sy ordening het op 23 Februarie 1896 op sy tuisdorp plaasgevind.
Enkele dae later vertrek hy in die geselskap van sy suster Maria Susanna (Mimie) Neethling en die jong sendingkandidaat Daniel Johannes Joubert (1870–1944) na die sendingveld. Ná heelwat oponthoud het die geselskap Mochudi aan die begin van Mei bereik in ’n tydperk van groot hongersnood onder die Bakgatla weens runderpes en langdurige droogte. Die jong sendeling het sy taak met ywer aangepak en spoedig die vertroue van die Christen-opperhoof Lentswe gewen.
Ds. Neethling se dienstyd was egter van korte duur. Skaars nege maande ná sy koms het hy een stormnag na die gewel van die sendingkerk gaan kyk om te sien of die wind skade aangerig het. Volgens een bron was hy bo-op die gewel toe dit ineenstort en volgens ’n ander het dit bo-op hom ingeval. Drie uur later het hy aan sy ernstige beserings gesterf.
W.L. Maree in die Suid-Afrikaanse Biografiese Woordeboek beskryf hom as ’n toegewyde jong sendeling van wie besonder hoë verwagtinge gekoester is. Sy dood het talle jong mense so aangegryp dat hulle besluit het om hul lewe aan die sending te wy. Jare ná sy dood het stamlede van die Bakgatla steeds na hom as hul geliefde leraar verwys. Ná sy dood het sy suster op Mochudi agtergebly en in die volgende twee jaar ’n reusewerk verrig ter verligting van die hongersnood. Sy het later die tweede vrou van ds. Henri Gonin die ouere geword. Ds. Neethling se opvolger op Mochudi was ds. Pieter Stofberg wat daar gebly het van 1898 tot sy dood in 1907 aan 'n geheimsinnige kwaal.
Bronne
wysig- (nl) Dreyer, eerw. Andries 1910. Historisch Album van De Nederduitsche Gereformeerde Kerk in Zuid Afrika. Kaapstad: Cape Times Beperkt.
- (nl) Dreyer, eerw. Andries. 1924. Eeuwfeest-Album van de Nederduits Gereformeerde-Kerk in Zuid-Afrika, 1824–1924. Kaapstad: Publikatie-Kommissie van de Z.A. Bijbelvereniging.
- (af) De Kock, W.J. (hoofred.) 1968. Suid-Afrikaanse Biografiese Woordeboek deel I. Kaapstad: Nasionale Boekhandel Beperk.
- (en) Murray, ds. H. Murray in Potgieter, D.J. (hoofred.) 1974. Standard Encyclopaedia of Southern Africa vol. 10. Cape Town: Nasionale Opvoedkundige Uitgewery.