Christie Neethling

Ds. Christoffel Albertyn (Christie) Neethling (Stellenbosch, 3 April 1871 – Bronkhorstspruit (vermoedelik), 26 Augustus 1926) was ’n predikant in drie gemeentes van die Nederduitse Gereformeerde Kerk.

Ds. C.A. Neethling, in die tyd toe hy Eloffsdal se eerste leraar was.

Die NG kerk op Nieuwoudtville is tydens ds. Neethling se dienstyd ingewy op 23 April 1907. Die argitek was John Gaisford.

Ds. Neethling en sy gesin op Nieuwoudtville.

Die Holy Brigade, in 1896 die Victoria-kollege se heel eerste rugbytoerspan, so genoem omdat hulle nooit 'n druppel drank oor hul lippe laat gaan het nie. Agter: D. Kloppers, (later ds.) C.V. Nel, P.A. Bergh, (later ds.) H.D. van Broekhuizen, Paul de Waal, (later ds.) P.K. Albertyn, A.L. Hofmeyr, Ebbe Dommisse, C.A. Neethling, H.R. Kemsley. Middel: (later ds.) M.S. Daneel, H.J. Bergh, (later ds.) J.M. Hofmeyr (kaptein), D. Morkel, G. Chapman. Voor: (later ds.) A.M. McGregor, Piet de Vos, C. Gonin, P.A.M. de Vos.

Neethling was op Stellenbosch lid van die Unie-Debatsvereniging. Hierdie foto van die ampsdraers en joernaliste is in 1895 geneem. Agter: Cornelis Nel, J. Radloff, Andrew Rowan, M.S. Daneel en Christie Neethling. Voor: Dawie Mostert, Henri Gonin, D.F. Malan, E.T.F. Malan (voorsitter), C.H. Murray en George Rudman. Sover vasgestel kon word, het Nel, Daneel, Neethling, Gonin, D.F. Malan, Murray en Rudman predikant in die NG Kerk geword.

Christie Neethling is gebore in Stellenbosch se ou pastorie, waar sy vader, ds. J.H. Neethling, predikant was. Sy moeder was Maria Murray, oudste suster van ds. Andrew Murray. Hy was die tiende kind van sy ouers. Twee van sy ouer broers het ook predikant geword, Hendrik, in Lydenburg, Transvaal, en die onvergeetlike Willie wat begrawe lê te Mochudi, waar hy gearbei het onder die Bakhatla.

Christie Neethling het sy skoolopleiding op Stellenbosch geniet; sy B.A. het hy met lof behaal aan die ou Victoria-kollege en daarna sy predikantseksamen met die hoogste onderskeiding. Terwyl hy in die Kweekskool was, is dit hom toegestaan om saam te gaan met sy oudste broer, ds. Hendrik Neethling, wat deur die Transvaalse Sinode opdrag gekry het om die uitgeweke lidmate van ons kerk in Humpata, Portugees-Wes-Afrika, te besoek en bearbei.

Ná voltooiing van sy studie einde 1897 is hy na Europa saam met sy goeie universiteitsvriend Herman van Broekhuizen en met die terugreis het hy Egipte en Palestina besoek. Laasgenoemde het 'n blywende indruk op hom gemaak. Onderwyl hy weg was, is 'n beroep na Nieuwoudtville op hom uitbring, wat hy ná sy terugkoms aangeneem het. Meer as 10 jaar het hy daar gearbei, en daarna net solank in NG gemeente Eloffsdal, Transvaal. Die Pretoriase voorstad Eloffsdal is genoem na dr. Herman van Broekhuizen se vermoënde skoonvader, Ryk Freek Eloff, wat die dorpsgebied in 1896 laat uitlê het op 'n gedeelte van die plaas Daspoort, wat hy vir dié doel gekoop het.

Ds. Neethling se laaste standplaas was Erasmus, waarvan die middelpunt destyds was naby die plek waar de Bronkhorstspruit-slag in die Eerste Transvaalse Vryheidsoorlog plaasgevind het. As leraar van Jopie Fourie het ds. Neethling die laaste nag saam met die veroordeelde deurgebring voor sy teregstelling kort ná vyf op die Sondagoggend van 20 Desember 1914.

Ná 'n kort lyding van agt dae is ds. Neethling op 24 Augustus 1926 in die ouderdom van 55 jaar oorlede.

Bronne

• (af) J.M.N. Breedt, ds. 1947. Gedenkboek van die Nederduitse Gereformeerde Kerk Nieuwoudtville 1897–1947. Nieuwoudtville: NG Kerkraad.
• (en) Potgieter, D.J. 1971. Standard Encyclopaedia of Southern Africa Deel 11. Cape Town: Nasionale Opvoedkundige Uitgewery Ltd.