AfriForum

AfriForum, ’n onafhanklike inisiatief van die vakbond Solidariteit, is ’n organisasie sonder winsoogmerk wat daarna streef om wat die organisasie beskou as die aktiewe en passiewe onttrekking van minderhede uit die openbare sake van Suid-Afrika teen te werk, en maak daarop aanspraak om minderhede in Suid-Afrika op ’n openbare forum te verteenwoordig.

AfriForum
Tipe	Sonder winsbejag
Gestig	7 September 2006 in Pretoria, Gauteng
Hoofkantoor	Centurion, Gauteng, Suid-Afrika
Sleutelpersone	Kallie Kriel Ernst Roets Alana Bailey
Dienste	Beskerming van Burgerregte
Moedermaatskappy	Solidariteit
Webwerf	afriforum.co.za

'n AfriForum-betoging in Pretoria oor die vernietiging van die Groot Trek-gedenkplaat in Standerton.

AfriForum se manifes stel dit so: “Ons – die opstellers en ondersteuners van hierdie manifes – oefen die doelbewuste keuse uit om sinvol as Afrikaners voort te bestaan, met ons diepgewortelde basis aan die suidpunt van Afrika.”

AfriForum stuur veldtogte van stapel om burgerregte – soos in die Suid-Afrikaanse Grondwet en in internasionale konvensies oor die kollektiewe regte van minderheidsgemeenskappe omskryf – te beskerm en uit te bou.  Spesifieke sake waaroor AfriForum hul kommer uitgespreek het, sluit onder meer in die politieke inmenging deur die regering in privaat areas, asook rasgedrewe beleide en meertaligheid. Ander fokusareas sluit in misdaad, plaasmoorde en die ondeurdagte pleknaamveranderinge, asook onderwys en burgerregte. AfriForum het teen Januarie 2022 'n aktiewe ledetal van meer as 295 000 betalende lede gehad. Kallie Kriel is die uitvoerende hoof van AfriForum.

Geskiedenis

AfriForum is in 2006 gestig. Die organisasie se wortels kan teruggetrek word na die aktiewe maatskaplike rol wat Solidariteit in die Suid-Afrikaanse politieke landskap gespeel het. AfriForum se burgerregtemanifes is amptelik op 7 September 2006 tydens ’n besprekingsforum in Pretoria deur die organisasie aangeneem.

Politieke posisionering  

AfriForum is ’n burgerregte organisasie wat gemik is op die beskerming van minderhede in Suid-Afrika. Dit fokus egter op die regte en belange van Afrikaanssprekendes. Volgens AfriForum se uitvoerende hoof, Kallie Kriel, is AfriForum ’n burgerregte-inisiatief om die burgergemeenskap en spesifiek die minderheidsgemeenskappe te mobiliseer om ook aan die demokratiese debat deel te neem.

Kriel meld ook dat AfriForum graag balans in Suid-Afrika wil bring. “Ware demokrasie het alternatiewe stemme nodig om suksesvol te wees. Hoewel ons nie ’n politieke party is nie, maak ons alternatiewe idees en voorstelle waar nodig tot die regering se standpunte.”

Veldtogte

Veldtog teen Nasionale gesondheidsversekering (NGV)

AfriForum staan Nasionale Gesondheidsversekering (NGV) teen.

Plaasmoordeveldtog

AfriForum maak jaarliks sy eie statistiek rondom verifieerbare plaasmoorde en -aanvalle bekend wat met die syfers van die SAPD vergelyk word.

Korrupsieveldtog

AfriForum se teenkorrupsie-eenheid het in 2016 tot stand gekom en is amptelik in Oktober 2016 bekend gestel. Die eenheid het ten doel om korrupsie onder hooggeplaaste regeringsamptenare te identifiseer, korrupsieklagtes deur ervare ondersoekers te laat ondersoek, te verseker dat strafregtelike klagtes ingedien word, druk vir vervolging toe te pas deur korrupsie in die openbaar te ontbloot, asook om openbare veldtogte teen korrupsie te voer.

Privaat vervolging

AfriForum het ’n privaatvervolgingseenheid gestig onder leiding van adv. Gerrie Nel. Hierdie eenheid het ten doel om vervolging in te stel wanneer die Nasionale Vervolgingsgesag (NVG) sonder geldige redes versuim om persone (veral met politieke verbindings en hoë profiele) te vervolg.

---

Onteieningsveldtog

AfriForum staan die ANC-regering se voorgestelde wysiging van art 25 van die Grondwet (wat handel oor eiendomsreg) teen, asook die voorgestelde onteieningswetsontwerp. AfriForum is van mening dat hierdie beleid tot die skending van privaat eiendomsreg in die land sal lei.

---

Teenboelieveldtog

AfriForum dryf ’n teenboelieveldtogwat ten doel het om afknouery in skole hok te slaan. Die organisasie het in 2018 ʼn Teenboeliegids bekendgestel wat op ouers, leerlinge en onderwysers gemik is. As deel van die veldtog besoek AfriForum gereeld verskillende skole om oor afknouery te praat

---

Misdaad en korrupsie

Die organisasie het die regering by verskeie geleenthede gekritiseer oor die gebrek aan bereidwilligheid om die plaasmoordkwessie op te los. AfriForum het die standpunt gehuldig dat plaasmoorde as ’n prioriteitsmisdaad verklaar moet word. AfriForum het in Mei 2017 ’n PAIA-aansoek in die Pretoriase hooggeregshof bekom wat die Suid-Afrikaanse Polisiediens gedwing het om die syfers van gesteelde of verlore polisiewapens tussen 2009 en 2014 bekend te maak. AfriForum het tans 140 aktiewe buurt- en plaaswagte reg oor Suid-Afrika

Trauma-ondersteuningseenheid

AfriForum se trauma-ondersteuningseenheid bied ondersteuning aan slagoffers van geweldmisdaad, waaronder plaasaanvalslagoffers.

Onderwys, taal en kultuur

---

Twee van AfriForum en AfriForum Jeug se kerndoelwitte is die bevordering van veeltaligheid en moedertaalonderrig in Suid-Afrika, asook dat die jeug van regstellende aksie vrygestel moet word. AfriForum dryf deurlopende aksies teen eentalige Engelse onderwysinstellings. AfriForum se videoveldtog Slim poog ook om moedertaalonderrig te bevorder. AfriForum se inisiatief Wêreldwyd is ʼn platform waarop Suid-Afrikaners in die buiteland op hoogte kan bly van nuusgebeure in Suid-Afrika, advies kan bekom en ervarings kan deel.

AfriForum het ook ʼn tweeledige inisiatief van stapel gestuur met die doel om Afrikaanse ondernemings te bevorder naamlik Afrikaans-Vriendelik en AfriForum Netwerk. Afrikaans-Vriendelik lys en beloon ondernemings wat in Afrikaans handeldryf terwyl AfriForum Netwerk ʼn databasis van ondernemings wat deur AfriForum-lede besit of bestuur word beskikbaar stel. AfriForum se navorsingsinstituut ANI doen onder meer navorsing oor taalbehoeftes in verskillende sektore (bv. onder regslui en in die gesondheidsektor).

Grond

AfriForum staan onteiening sonder vergoeding teen en is van mening dat dit ’n beleid is wat destruktiewe, oneerlike, a-historiese, rasgebaseerde diefstal daarstel.

In Augustus 2018 het AfriForum ʼn lys van plase op sy webblad bekend gemaak wat klaarblyklik deur die regering geïdentifiseer is sonder vergoeding onteien te word. Dít het gevolg nadat die regerende ANC gesê het dat die party 139 plase vir hierdie doel geïdentifiseer het. Die lys van plase was egter vertroulik en nóg die party, nóg die regering was bereid om dit bekend te maak. AfriForum het egter ’n dokument bekom wat deur die departement van landelike ontwikkeling en grondhervorming gesirkuleer word as ’n lys van plase wat vir hierdie doel as toetssake sal dien. Die dokument bevat egter nie die besonderhede van 139 plase nie, maar wel 190 eiendomme.

Minderheidsregte

AfriForum is gereeld op soek na internasionale platforms om die internasionale gemeenskap oor die situasie van minderheidsregte in Suid-Afrika in te lig. AfriForum het die Verenigde Nasies se forums van die Raad vir Menseregteforums vir Minderheidskwessies in Genève, Switserland oor minderheidsregte in Suid-Afrika toegespreek. AfriForum was ook ’n afgevaardigde na die VN se Raad vir Menseregte oor die voorkoming van aanhitsing van haatspraak op grond van nasionaliteit, ras of geloof.

Gemeenskapsake

Plaaslikeregeringsake

Indien munisipaliteite versuim om dienslewering aan gemeenskappe te verbeter, nader die organisasie howe om dienslewering af te dwing. AfriForum poog om in te gryp waar die plaaslike regering nie basiese dienste aan inwoners lewer nie.

Gemeenskapveiligheid

AfriForum se afdeling vir gemeenskapsveiligheid neem deel aan pogings om die veiligheid van burgers in gemeenskappe te bevorder. Daar word groot klem geplaas om gemeenskappe en buurte by te staan om veiligheidstrukture te stig. Strukture sluit in buurtwagte, plaaswagte, radionetwerke en gemeenskapsforums.

In 2011 het AfriForum prof. Rudolph Zinn van UNISA opdrag gegee om navorsing oor suksesvolle gemeenskapsveiligheidstrukture in Suid-Afrika na te vors. Dié navorsing het gelei tot die saamstel van ’n gemeenskapsveiligheidshandboek wat in alle AfriForum-takke landwyd toegepas word.

Die afdeling fokus ook op die rol van die regering in veral wetstoepassingsagentskappe en tree as drukgroep op om te verseker dat burgers die beste veiligheid en sekuriteit moontlik geniet.

Omgewing

AfriForum het in Februarie 2019 ʼn Ankerdorp-projek van stapel gestuur waartydens daar deur die loop van die jaar op die verbetering van uitgesoekte woonbuurte en verskeie omgewingsaksies gefokus is.

AfriForum en die Treasure the Karoo Action Group (TKAG) se appèlaansoek teen die ministers van minerale hulpbronne en omgewingsake vir die tersydestelling van die regulasies oor petroleumeksplorasie en produksie – soos afgekondig in 2015 en wat vir hidrobreking in Suid-Afrika voorsiening maak – het in Julie 2019 geslaag. AfriForum en die TKAG was reeds jare lank saam in litigasie gewikkel om die inwerkingstelling van hidrobreking vir gasontginning in die Karoo te verhoed. AfriForum het in September 2019 in samewerking met Solidariteit en Helpende Hand 500 bome in Orania geplant as deel van nasionale boomplantmaand.

AfriForum toets elke jaar water in dorpe waar gevestigde AfriForum-takke is waarna die jaarlikse Blou-en-groendruppelverslag bekend gemaak word. Dié verslag dui die toestand van dorpe se drink- en rioolwater aan.

AfriForum oudit elke jaar vulisterreine in dorpe waar AfriForum-takke gevestig is.

Kritiek

Die organisasie is veral gekritiseer deur die regerende ANC-party, mediahuise soos City Press, insluitend die koerantredakteur Ferial Haffajee, en akademici soos professor Pierre de Vos van die Universiteit van Kaapstad.  Oorleweringsgroepe soos die Kommandokorps het die organisasie ook al gekritiseer en beweer dat die groep te matig is in hul benadering tot die probleme wat Suid-Afrika in die gesig staar.

’n Hoofstuk 9-instelling genaamd die Kommissie vir die Bevordering en Beskerming van die Regte van Kulturele, Religieuse en Linguistiese Gemeenskappe het ’n aanval in die media geloods op AfriForum se veldtog om skole met Afrikaans as onderrigmedium te beskerm. AfriForum het aanvaar dat dié kommissie doelbewus teen sy mandaat opgetree het wat in Afdeling 185 van die Grondwet gegee word, wat die vermoede laat ontstaan het dat die kommissie as ’n verlenging van die regerende party optree.

Eksterne skakels

• Amptelike webtuiste (af)
• AfriForum se Twitter-blad (af)