Alwyn du Plessis
Ds. Alwyn Johannes du Plessis (distrik Clanwilliam, Kaapprovinsie, 12 Augustus 1932 – 10 Junie 2021) was van 1958 tot sy emeritering in 1997 predikant in vyf gemeentes van die Gereformeerde Kerke in Suid-Afrika, waarvan drie in die destydse Kaapland, een in die Vrystaat en een in Transvaal.
| Ds. Alwyn du Plessis | |
| |
Ds. Alwyn du Plessis
| |
| Naam | Alwyn Johannes du Plessis |
|---|---|
| Geboorte | 12 Augustus 1932 Distrik Clanwilliam Kaapprovinsie |
| Sterfte | 10 Junie 2021 |
| Kerkverband | Gereformeerd |
| Gemeente(s) | Steynsburg (1958–'61) Virginia (1961–'64) Bellville (1964–'74) Potchefstroom-Noord (1974–'87) Stellenbosch (1987–'97) |
| Jare aktief | 1958–1997 |
| Kweekskool | Potchefstroom |
Ds. Du Plessis het in 2018 vertel hy in die Christelike huis waarin hy grootgeword het en "waar die Here deur sy Woord en Gees beslissend was, het ek van jongs af met die Skrif omgegaan. Ek het nie op ’n dag ’n stem gehoor wat my roep nie, maar tog innerlik ryp geword om in st. 9 reeds te weet dat ek predikant wou word."
Sy lewensfilosofie het hy soos volg opgesom: "Dat ek mag lewe is vir my ’n geskenk van God, maar terselfdertyd ’n opdrag om Hom en my medemens lief te hê."
Herkoms
wysig
Alwyn du Plessis is op die plaas Aggenbagskraal gebore as ’n seun van Gerrit Nieuwoudt du Plessis (22 Desember 1892 – 26 April 1960) en Alida Wilhelmina (née Van der Merwe, 25 Januarie 1895 – 10 Augustus 1969). Sy moeder het 10 kinders in die wêreld gebring, sewe seuns en drie dogters, van wie ’n dogtertjie tydens die Griepepidemie van 1918 gesterf het. Almal was teen begin 2018 reeds oorlede, die seuns almal weens kroonaarvernouing.
Opleiding
wysigHy was kort rukkies in twee plaasskooltjies en vanaf 1941 in die primêre en toe sekondêre afdeling van die Hoërskool Clanwilliam, waar hy in 1950 gematrikuleer het, toe hy ook die duxleerling was. In 1951 is hy Potchefstroom toe vir studie as predikant aan die Potchefstroomse Universiteit vir Christelike Hoër Onderwys en die Teologiese Skool van die Gereformeerde Kerke in SA.
Hy het die B.A. in 1953 geslaag met Grieks en Hebreeus as hoofvakke, en die teologiese graad Th.B. in 1957.
Bediening
wysigDs. Du Plessis het in 2018 oor sy gemeentelike bediening gesê hy het nooit ten opsigte van hoogte- en laagtepunte of uitdagings daaraan gedink nie: "Die gemeentes waarin ek gedien het, het elkeen sy eiesoortige karakter gehad wat in die bediening beantwoord moes word: Steynsburg (1958–1961); Virginia (1961–1964), Bellville (1964–1974), Potchefstroom-Noord (1974–1987) en Stellenbosch (1987–1997).
Skryfwerk en belangstellings
wysigDs. Du Plessis het geskrewe bydraes gelewer oor ’n groot verskeidenheid onderwerpe: ’n nuwe benadering tot die diakendiens in die kerk, die vrou in die kerklike amp, kremasie, versoening in die samelewing, wedergeboorte, waar die kerk moet reformeer, die uitbreiding van ons liedereskat met Skrifgetrouheid as riglyn en so meer.
Hy het nie "stokperdjies" as sodanig gehad nie, maar het intens belanggestel in die natuur (veral ongerep): plantegroei, veral bome, diere, om hom, sowel as in afgeleë gebiede. Hy het graag gehalte-literatuur in sy vrye tyd gelees.
Gesinslewe
wysigDr. Bouke Spoelstra het ds. Du Plessis op 4 Oktober 1958 in die Gereformeerde kerk Kaapstad in die huwelik bevestig met Elizabeth Magdalena (Bessie) de Milander, wat hy al van skooldae op Clanwilliam af geken het. Sy het haar vir die onderwys bekwaam. Haar ouers was Frederik Albrecht de Milander en Maria Magdalena (née Theart), wat op die plaas Compagniesdrift naby Lambertsbaai geboer het. Uit hul huwelik is vier kinders gebore: Gerrit Nieuwoudt (9 Augustus 1959), Frederik Albrecht (18 Julie 1961), Maria Magdalena (25 November 1962) en Charl Francois (14 Januarie 1966).
Bronne
wysig- E-posonderhoud gevoer in Januarie 2018.