Austin Roberts-voëlreservaat

Die Austin Roberts-voëlreservaat in Nieuw-Muckleneuk, Pretoria, is vernoem na Austin Roberts, 'n bekende Suid-Afrikaanse dierkundige en ornitoloog. Roberts is in 1883 in Pretoria gebore en het in Potchefstroom grootgeword as die seun van 'n predikant.[1]

Austin Roberts-voëlreservaat
Austin Roberts-voëlreservaat, dam en skuiling
Austin Roberts-voëlreservaat, dam en skuiling
Land Suid-Afrika
Provinsie Gauteng
Naaste dorp in Pretoria
Ligging van Austin Roberts-voëlreservaat op 'n kaart (Gauteng)
Austin Roberts-voëlreservaat
Austin Roberts-voëlreservaat
Koördinate: 25°46′13″S 28°13′40″O / 25.77028°S 28.22778°O / -25.77028; 28.22778Koördinate: 25°46′13″S 28°13′40″O / 25.77028°S 28.22778°O / -25.77028; 28.22778
Oppervlak 18 ha
Openingsjaar 1956
Bestuursliggaam Tshwane Metropolitaanse Munisipaliteit
Webblad Austin Roberts-voëlreservaat

Hierdie 11.8 ha voëlreservaat is deur die destydse burgemeester van Pretoria, mnr. W.J. Seymore op 27 Oktober 1956 geopen, en amptelik as 'n natuurreservaat geproklameer op 26 Februarie 1958.[2]

Diorama by die besoekersingang na die Austin Roberts-voëlreservaat wat sekere soogdier- en voëlspesies uitbeeld.

Toegang tot die voëlskuiling is gratis en kan in die somer van 6:00 tot 18:00 besoek word. Dit is aan die noordelike grens van die reservaat by 'n klein uitstalruimte geleë. Begeleide staptogte kan teen 'n fooi van R55 per persoon vir groepe van tot 12 mense gereël word. Die reservaat is vanweë sy ontspannings- en opvoedkundige waarde as 'n provinsiale erfenisterrein verklaar.[3]

Die dam het ontstaan nadat 'n voormalige kleigroef by die samevloeiing van Walker- en Argospruite met water gevul is. Eksotiese bome is om die dam geplant. Nege klein standhoudende damme met vleiland is geskep, sommige met kunsmatige eilande, om watervoëls en -diere te akkommodeer. Die natuurlike veldtipe in die reservaat is gemengde bosveld.

'n Kleinwitreier naby die voëlskuiling.

Meer as 170 inheemse voëlspesies is al hier opgemerk, maar sommige het as gevolg van verstedeliking en ander faktore reeds die gebied verlaat.[4] Van die inwonende of besoekende sangvoëls sluit in: dikbekwewer,[4] rooivink, kleinrietsanger, Kaapse vleisanger en Kaapse rietsanger. Van die reiers wat hier voorkom is: gewone nagreier, kleinrietreier, groenrugreier, rooireier, swartreier en kleinwitreier. Van die ander algemene watervoëls wat hier voorkom is: bleshoender, fluiteend, kolgans, nonnetjie-eend, teeleend en bruineend. Bloukraanvoëls en mahems is in die reservaat losgelaat en 'n paar eksotiese eendspesies is ook teenwoordig.

Ingang na die voëlskuiling.

Verwysings wysig

  1. "Austin Roberts Memorial Bird Sanctuary" (in Engels). www.tshwane.gov.za. Geargiveer vanaf die oorspronklike op 2 Desember 2014. Besoek op 21 Junie 2014.
  2. "Austin Roberts Memorial Bird Sanctuary" (in Engels). www.southafricaexplorer.co.za. Geargiveer vanaf die oorspronklike op 24 Oktober 2019. Besoek op 21 Junie 2014.
  3. Suid-Afrikaanse Erfenishulpbronagentskap – Item: 29901, URL besoek op 21 Junie 2014
  4. 4,0 4,1 "Austin Roberts Bird Sanctuary Pretoria". Gauteng tourist attractions (in Engels). sa-venues.com. Geargiveer vanaf die oorspronklike op 28 November 2017. Besoek op 1 Desember 2013.

Eksterne skakels wysig