Nieuw-Muckleneuk
Nieuw-Muckleneuk is 'n gevestigde voorstad in die ooste van Pretoria in Gauteng, Suid-Afrika. Hierdie woongebied is in 1898 afgebaken, en het met verloop van tyd meer kommersiële en diplomatieke persele verkry. Dit word aan die weste-, ooste- en noordekant deur onderskeidelik Groenkloof, Brooklyn en Bailey's Muckleneuk begrens. In die weste grens dit aan Florence Ribeiro- (voormalige Koningin Wilhelminalaan), in die noorde aan Mackie-, in die ooste aan Fehrsen- en in die suide aan Mainstraat.
Nieuw-Muckleneuk | |
|---|---|
 Nieuw-Muckleneuk en Brooklyn voorstede | |
  Nieuw-Muckleneuk Nieuw-Muckleneuk se ligging in Gauteng | |
| Koördinate: 25°46′20″S 28°13′45″O / 25.77222°S 28.22917°OKoördinate: 25°46′20″S 28°13′45″O / 25.77222°S 28.22917°O | |
| Land |  Suid-Afrika |
| Provinsie | Gauteng |
| Munisipaliteit | Stad Tshwane |
| Oppervlak | |
| • Totaal | 1,15 km2 (0,44 vk. myl) |
| Bevolking (2011)[1] | |
| • Totaal | 1 288 |
| • Digtheid | 1 120/km2 (2 900/vk. myl) |
| Rasverdeling (2011) | |
| • Wit mense | 53.4% |
| • Indiërs/Asiërs | 6.6% |
| • Bruin mense | 3.1% |
| • Swart mense | 34.4% |
| • Ander | 2.5% |
| Taal (2011) | |
| • Afrikaans | 35.7% |
| • Engels | 36.0% |
| • Tswana | 4.1% |
| • Noord-Sotho | 2.7% |
| • Ander | 21.5% |
| Poskode (strate) | 0181 |
| Poskode (posbusse) | geen |
| Skakelkode | 012 |
Die naam van die buurt is afkomstig van 'n gedeelte van Elandspoort-plaas wat deur ene George Walker gekoop is, en dan herdoop is tot Muckleneuk. Muckleneuk beteken "groot hoek" of "inham" in Skotse omgangstaal, en herinner aan Walker se familie-eiendom in Skotland. Hierdie naam is behou om drie woonbuurte van Pretoria aan te dui, naamlik Muckleneuk, Nieuw-Muckleneuk en Bailey's Muckleneuk.
Die hoofaar is Middelstraat wat in die ooste eindig by die Brooklynverkeersirkel. Die Brooklynmall en -binneplein is hier in die ooste geleë, met ingange uit Vealestraat. Die kantore van die Suid-Afrikaanse Inkomstediens en Ouditeurgeneraal is ook in Vealestraat geleë, benewens die Switserse ambassade. Die Nederlandse, Franse, Nieu-Seelandse, Libanese, Irannese en Noord-Koreaanse ambassades het hulself aan die westekant van die voorstad gevestig. Laerskool Anton van Wouw en NG Gemeente Waterkloof is albei in Deystraat.
Etlike huise in die voorstad is deur bekende argitekte soos Gerard Moerdyk, Lockwood Hall en Herbert Baker ontwerp, en daar is verskillende restaurante in Dey- en Bronkhorststrate. Austin Roberts-voëlreservaat beslaan die sentrale gedeelte van die voorstad, en word van water voorsien deur die Walker- en Argospruite.
Demografie wysig
Volgens die 2011-sensus bestaan Nieuw-Muckleneuk uit meer as 1 288 inwoners, meestal uit die wit gemeenskap (53,82%).[2] Swart mense verteenwoordig 34,39% van die inwoners, terwyl die Kleurlinge en Indiërs net meer as 10% van die inwoners uitmaak.
Die moedertaal van inwoners is 36,05% Engels, 35,65% Afrikaans, 4,07% Tswana en 2,68% Sepedi.
Politiek wysig
Die omgewing van Nieuw-Muckleneuk word polities oorheers deur die Demokratiese Alliansie. In die Suid-Afrikaanse algemene verkiesing van 2014 het die DA meer as 73% van die stemme in die kiesafdeling verower, wat egter 'n deel van Brooklyn insluit, voor die African National Congress (meer as 15%).[3]
Verwysings wysig
- ↑ 1,0 1,1 1,2 1,3 "Subplek Nieuw-Muckleneuk". Sensus 2011.
- ↑ 2011-sensus
- ↑ "Verkiesingsuitslae in Pretoria (2014)". Geargiveer vanaf die oorspronklike op 16 Mei 2015. Besoek op 7 Februarie 2021.
Hierdie artikel omtrent 'n plek in Pretoria en omgewing is slegs ’n saadjie. Jy kan Wikipedia help deur dit uit te brei.