Bespreking:Politieke ekonomie van Suid-Afrika

Ek beplan om hierdie artikel geleidelik uit te bou om sodoende van die Afrikaanse Wikipedia 'n gesaghebbende een-stop-naslaanbron ten opsigte van die ekonomiese en politieke geskiedenis van Suid-Afrika te maak. Die artikel gaan net die hoofartikel in 'n hele reeks oor hierdie onderwerp wees. Ek sien uit na ander gebruikers se voorstelle en kritiek. --Voyageur 16:28, 22 September 2006 (UTC)

Hallo Voyager, dit lyk vir my na 'n goeie doel en kan na 'n ingteressante artikel ontwikkel. Dit sal dalk makliker wees om te help bydra as ons hier kan bespreek wat die verskillende afdelings gaan wees en so aan. Gaan jy bv hoofsaaklike 'n historiese tydlyn gebruik vir die struktuur? Laurens 06:28, 24 September 2006 (UTC)

Hallo Laurens, ek beplan om die artikel hoofsaaklik langs 'n historiese tydlyn te ontwikkel en wil graag gebruik maak van gesaghebbende bronne uit verskillende denkrigtings. 'n Aantal onderwerpe is eksemplaries van aard en regverdig dan ook 'n meer uitvoerige behandeling (soos SA se ontwikkeling van 'n agrariese tot 'n half-geïndustrialiserde ekonomie). Anders as by die "Ekonomie van SA"-artikel sal ons hier 'n bietjie op die sosio-ekonomiese en politieke oorsake van ekonomiese ontwikkelings en vraagstukke kan toespits.

Ek is tans nog besig om my eie vakliteratuur te bekyk (en ander gebruikers het beslis nog meer materiaal ter beskikking, wat hulle moontlik wil byvoeg), maar ek het al 'n aantal onderwerpe saamgestel soos byvoorbeeld: Suid-Afrika as 'n uitvoergerigte goudland, die institusionalisering van trekarbeid, die begin van die tuisland-stelsel, die industrialisering van SA, die "organiese krisis" van die Suid-Afrikaanse ekonomie (konsentrasie van kapitaal, invoervervanging, ekonomiese beskermmaatreëls en hulle uitwerkings op SA se mededingendheid op internasionale markte; vergelyk ook die Italiaanse Marxis Antonio Gramsci se stellings), SA se ontwikkeling van 'n half-geïndustrialiseerde land terug na 'n ontwikkelende Afrikaland, die ekologiese, ekonomiese en sosio-ekonomiese krisis van die landbousektor, die ekonomiese koste van apartheid, die uitwerking van ekonomiese sanksies, "Bothanomics", ekonomiese hervoming, Swart bemagtiging, regstellende aksie esv. Die artikel gaan op die gemiddelde leser gemik wees, sodat dit ook geskik sal wees as 'n aanleiding vir ondersoek ivm skoolprojekte.

Die politieke ekonomie van SA is beslis 'n boeiende onderwerp, en ons moet ook vraagstukke, wat Afrikaanstaliges deesdae werklik pla, soos misdaad en plaasmoorde, aanpak. As ek die literatuur goed bekyk, is die meeste navorsers nog nie bereid om die ekonomiese en sosiale "waarhede" in SA te aanvaar nie, byvoorbeeld die aanwesigheid van 'n groot Swart proletariaat, wat nóg deur verstedeliking nóg deur landhervorming enigsins geïntegreer sal word nie (veral die Marxistiese skrywers het hier dalk nou 'n reuseprobleem). Hierdie verarmde mense het geen kennis van landbou nie en is ook nie in staat om 'n heenkome in bestaansboerdery te vind nie (vergelyk die situasie in Brasilië).

Die diskussie oor plaasmoorde by die Engelse Wikipedia-artikel bevat 'n aantal stellings van linkse Suid-Afrikaners wat beweer dat geïnstitusionaliseerde geweldpleging op die platteland die oorsaak van die plaasmoord-fenomeen kan wees. Daar is dalk boere wat in die verlede op 'n paternalistiese manier teenoor hulle plaaswerkers opgetree het, maar dit verklaar hoegenaamd nie die huidige geweldpleging nie. Die moordenaars is dikwels jong, het nooit op 'n plaas gewerk nie en behoort moontlik ook eerder tot die stedelike Swart proletariaat. Ek sou hier graag 'n beter Afrikaanse behandeling van die onderwerp wou sien.

'n Ander vraagstuk is die ekonomiese en demografiese toekoms van SA, wat tans deur baie deskundiges met uiters pessimistiese senarios uitgebeeld word. Voorbeeld: As gevolg van die VIGS-epidemie sal die land se bevolking teen die jaar 2050 moontlik tot net 30 miljoen mense kan daal. --Voyageur 10:37, 24 September 2006 (UTC)

Afrikaners

As 'n mens van Europeërs praat, is die veronderstelling darem seker mense wat hulle uit Europa hier kom vestig het. Ek dink nie Afrikaners kom uit Europa nie, want dit was eers hier in Suid-Afrika dat Europeërs Afrikaners kon word. Morne (kontak) 08:07, 29 Januarie 2012 (UTC)

Die outeur van die bronteks het na die Groot Trek en die uitbreiding van Afrikaners in gebiede buite die oorspronklike Kaapkolonie verwys. --Voyageur (kontak) 14:06, 29 Januarie 2012 (UTC)