Gereformeerde kerk Randfontein

Die Gereformeerde kerk Randfontein was die oudste gemeente van die GKSA op die Wes-Randse dorp Randfontein.

Die ou gemeente Randfontein se kerkgebou is ook die verenigde gemeente Wesrand s'n.

Ds. I.J. van der Walt, leraar van 1955 tot 1969.

Die Gereformeerde kerk Randfontein het op 4 Junie 1950 van die Gereformeerde kerk Krugersdorp afgestig en aan die begin eredienste in die saal van die Laerskool Randfontein gehou. Vir Nagmaal het die lidmate in die plaaslike NG kerk byeengekom.

’n Kerkerf is van die stadsraad bekom, maar die kerkraad was ontevrede met die ligging daarvan en het dit vir twee beter erwe verruil. Die erf langsaan is ook gekoop. Beyers Hartman het die planne vir die nuwe kerk opgestel. Ou Mutual was bereid om ’n lening toe te staan en ’n lidmaat het ’n lening van Germiston-begrafnisondernemings bekom. Binne vier jaar van die gemeente se bestaan is die kerk opgerig en op 6 Maart 1954 het ds. C.J. van Vuuren die hoeksteen gelê. Dié gebou, in die destyds so gewilde tentstyl, is op 13 Maart 1954 ingewy.

Die binnemure is met houtpanele bedek. Maar alles het nie glad verloop nie, want die galery se eerste ry sitplekke was so laag dat lidmate wat daar gesit het, in die reling vasgekyk het. Eers ’n paar jaar later is die vloer gelig sodat die kerkgangers wat daar wou sit, oor die reling kon sien.

Op 7 Augustus 1983 het die gemeentes se noordelike wyke as die Gereformeerde kerk Randfontein-Noord afgestig en mettertyd ’n eie kerkgebou opgerig by Robinaweg 16, Greenhills. In 2005 het dié gemeente ontbind en met die Gereformeerde kerk Randfontein herenig onder die nuwe naam Wesrand. Die oorspronklike gebou dien as die verenigde gemeente se kerk.

In 1960 het Randfontein 435 en belydende en 447 dooplidmate gehad, in 1997 het die twee gemeentes se belydende lidmate saam 484 getel en die dooplidmate 171 en einde 2015 was daar 209 belydende en 36 dooplidmate in die gemeente Wesrand, vergeleke met 290 en 63 vyf jaar vantevore.

Predikante

1. Janse Van Vuuren, Cornelius Marthinus, 1952 – 1954
2. Van der Walt, Izak Jacobus, 1955 – 1969 (aanvaar sy emeritaat)
3. Mulder, Arnoldus Henderikus, 1969 – 1974
4. Smit, dr. Cornelis Johannes, 1975 – 1979
5. Venter, Jacobus Johannes, 1980 – 1982
6. Coetzee, Louis Johannes Jacobus, 1981 – 2003 (in kombinasie met Magaliesburg; aanvaar sy emeritaat)

Bronne

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
• (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• (af) Venter, ds. A.A. (hoofred.) 1960. Almanak van die Gereformeerde Kerk in Suid-Afrika vir die jaar 1961. Potchefstroom: Administratiewe Buro.
• (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.
• (af) Vogel, Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.