Groenvlei
Groenvlei is 'n strandmeer geleë oos van Sedgefield aan die suidekant van die N2-nasionale pad in die rigting van Knysna in die Wes-Kaap, Suid-Afrika. Dit is een van die mere (plaaslik bekend as Die Vleie) tussen George en Knysna en vorm deel van die Goukamma-natuurreservaat.
Groenvlei is ongeveer 20 000 jaar gelede gevorm toe dit deur skuiwende duine van Swartvlei en die see geskei is en het dit ‘n varswatermeer geword. Geen standhoudende riviere voed die meer nie en sy enigste noemenswaardige bron is reënwater. Fluitjiesriet en papkuil groei in die vlei. Alge gee die water ‘n groenerige kleur.
Die meer se hele lengte van 4 km vorm die suidwestelike grens van die Goukammma-natuurreservaat. Ses vissoorte kom in die vlei voor. Slegs die Kaapse spierinkie en die rivier-rondeharing is inheems. In die 1930’s is die Amerikaanse grootbekswartbaars vir hengeldoeleindes in die vlei geplaas.
Aan die water aan die suidekant is ‘n hotel en aan die westekant ‘n kampeerterrein. Die vlei en direkte omgewing word in beperkte mate vir ontspanningsdoeleindes benut. ‘n Grondpad loop oor die duine na die see by Platbank.
