Hans Christian Gram

Hans Christian Joachim Gram (13 September 1853 – 14 November 1938) was 'n Deense bakterioloog bekend vir sy ontwikkeling van die Gramvlek, steeds 'n standaardtegniek om bakterieë te klassifiseer en meer sigbaar onder 'n mikroskoop te maak.

Hans Christian Gram
Portret van Hans Christian Gram deur Hansen & Weller
Portret van Hans Christian Gram deur Hansen & Weller
Gebore (1853-09-13)13 September 1853
Kopenhagen, Denemarke
Oorlede 14 November 1938 (op 85)
Kopenhagen, Denemarke
Alma mater Universiteit van Kopenhagen
Bekend vir Ontwikkeling van die Gramvlek
Vakgebied Bakteriologie
Instellings Universiteit van Kopenhagen
Profskriftoesighouer Japetus Steenstrup

Vroeë lewe en opvoeding wysig

Gram was die seun van Frederik Terkel Julius Gram, 'n professor in regswetenskap, en Louise Christiane Roulund.

Hy het aan die Universiteit van Kopenhagen gestudeer, en was 'n assistent vir plantkunde van die dierkundige Japetus Steenstrup. Sy studie van plante het hom bekendgestel aan die basiese beginsels van farmakologie[Nota 1] en die gebruik van die mikroskoop.

Gram het in 1878 met mediese skool begin en in 1883 gegradueer. Hy het tussen 1878 en 1885 deur Europa gereis.

Beroep wysig

Gramvlek wysig

In Berlyn, in 1884, het Gram 'n metode ontwikkel om tussen twee hoofklasse bakterieë te onderskei.[1] Hierdie tegniek, bekend as 'n Gramvlek, is steeds 'n standaardprosedure van mediese mikrobiologie. Hierdie werk het Gram 'n internasionale reputasie verwerf. Die kleurmetode het later 'n groot rol gespeel in die klassifikasie van bakterieë. Gram was 'n beskeie man, en in sy aanvanklike publikasie het hy opgemerk: "Ek het dus die metode gepubliseer, hoewel ek bewus is dat dit nog baie gebrekkig en onvolmaak is; maar daar word gehoop dat dit ook in die hande van ander ondersoekers sal blyk nuttig te wees."

'n Gramvlek word gemaak met 'n primêre kleur van kristalviolet[Nota 2] en 'n teenkleur van safranien.[Nota 3] Bakterieë wat pers word wanneer dit gekleur word, word 'Gram-positief' genoem, terwyl dié wat rooi word wanneer dit teengekleur word, 'Gram-negatief' genoem word.

Ander werk wysig

Gram se aanvanklike werk het betrekking op die studie van menslike rooibloedselle. Hy was van die eerstes wat erken het dat makrosietose[Nota 4] kenmerkend is van pernisieuse anemie.[Nota 5]

Gedurende 1891 het Gram lesings in farmakologie gegee, en later daardie jaar is hy aangestel as professor aan die Universiteit van Kopenhagen. In 1900 het hy sy professoraat in farmakologie bedank om professor in medisyne te word.[2] As professor het hy vier volumes kliniese lesings gepubliseer wat wyd in Denemarke gebruik is. Hy het in 1923 by die Universiteit van Kopenhagen afgetree en het in 1938 gesterf.[2]

Gewilde erkenning wysig

Op 13 September 2019 het Google sy geboorte herdenk met 'n Doodle vir Kanada, Peru, Argentinië, Australië, Nieu-Seeland, Israel, Indië en sommige Europese lande.[3][4]

Persoonlike lewe wysig

Gram se agterkleindogter Lone Gram is 'n mikrobioloog wie by die Tegniese Universiteit van Denemarke werk.[5]

Aantekeninge wysig

  1. Farmakologie is 'n tak van medisyne, biologie en farmaseutiese wetenskappe wat met dwelm- of medikasie-aksie gemoeid is.
  2. Kristalviolet of gentiaanviolet is heksametielpararosanilienchloried, 'n triarielmetaan-kleurstof wat gebruik word as 'n histologiese vlek en in Gram se metode om bakterieë te klassifiseer.
  3. Safranien is 'n biologiese teenkleur wat in histologie en sitologie (selbiologie) gebruik word en wat selkerne rooi kleur.
  4. Makrositose is die vergroting van rooibloedselle met byna konstante hemoglobienkonsentrasie.
  5. Pernisieuse anemie is 'n tipe vitamien B12-tekortanemie, 'n siekte waarin nie genoeg rooibloedselle geproduseer word nie as gevolg van die wanabsorpsie van vitamien B12.

Verwysings wysig

  1. Gram, H.C. (1884). "Über die isolierte Färbung der Schizomyceten in Schnitt- und Trockenpräparaten" [Op die geïsoleerde kleuring van die Skizomisetes in gesnyde en droë preparate]. Fortschritte der Medizin (in Duits). 2: 185–189.
    'n Engelse vertaling is in Brock, T.D. (1999). Milestones in Microbiology 1546–1940 (in Engels) (2de uitg.). ASM Press. pp. 215–218. ISBN 1-55581-142-6.
    'n Engelse vertaling is ook in Brock, T.D. "Pioneers in Medical Laboratory Science: Christian Gram 1884" (in Engels). Hoslink. Geargiveer vanaf die oorspronklike op 10 Augustus 2016. Besoek op 10 Mei 2022.
  2. 2,0 2,1 Hardy, Jay. "Gram's Serendipitous Stain" (PDF) (in Engels). Geargiveer vanaf die oorspronklike (PDF) op 4 Maart 2016. Besoek op 10 Mei 2022.
  3. "Hans Christian Gram's 166th Birthday". Google.com (in Engels). 13 September 2019. Besoek op 10 Mei 2022.
  4. Michallon, Clémence (13 September 2019). "Who was Hans Christian Gram and what did the groundbreaking scientist discover?". Independent UK (in Engels). Geargiveer vanaf die oorspronklike op 9 Mei 2022. Besoek op 10 Mei 2022.
  5. Shekhar, Akarsh (22 Oktober 2020). "Hans Christian Gram: 8 Facts About The Man Who Invented the Famous 'Stain Technique'". DailyHawker (in Engels). Besoek op 10 Mei 2022.