Hopetown

Hopetown
Hopetown
	Dorp
	Hopetown
	Koördinate: 29°37′33″S 24°5′8″O / 29.62583°S 24.08556°O
Land	Suid-Afrika
Provinsie	Noord-Kaap
Distriksmunisipaliteit	Pixley ka Seme
Plaaslike Munisipaliteit	Thembelihle
Stigtingsdatum	1853
Oppervlak
• Totaal	73,86 km2 (28,52 vk. myl)
Bevolking
• Totaal	10 259
• Digtheid	140/km2 (400/vk. myl)
Tydsone	UTC+2 (SAST)
Poskode	8750
Skakelkodes	053

Hierdie artikel handel oor die dorp "Hopetown", in die Noord-Kaap. Sien asseblief Hoopstad vir die gelyknamige dorp in die Vrystaat.

Hopetown is 'n Noord-Kaapse dorp 133 km noordoos van Britstown en 134 km suidwes van Kimberley aan die N12 nasionale pad geleë. Die dorp is 'n sentrum van skaap-, bees- en vrugteboerdery danksy besproeiing uit die nabygeleë damme.

Geskiedenis

Hopetown is in 1853 of 1854 gestig en het munisipale status in 1858 verwerf. Daar word algemeen aanvaar dat dit na majoor William Hope vernoem is, ouditeur-generaal en waarnemende sekretaris van die Kaap, maar daar is 'n staaltjie wat die naam verbind met 'n anker, simbool van hoop, wat die weduwee van die eienaar van die plaas De Kalk gedra het. 'n Werker van die plaas het na bewering 'n blikreplika daarvan gemaak en teen die plaas se ingang vasgespyker. Die eerste diamant, Eureka is in 1866 hier op die oewers van die Oranjerivier deur die jong Erasmus Jacobs ontdek en die beroemde Ster van Suid-Afrika van 83,5 karaat is in 1869 op die plaas Zandfontein ontdek. Hoewel die diamante hier baie ontwykend was en nooit grootskaals ontgin is nie, het belangstelling in die diamante tot die ontdekking van diamante by Kimberley en Barkly-Wes gelei.

NG gemeente

Vir hoofartikel, sien NG gemeente Hopetown

Hopetown was voor 1854 deel van die NG gemeente Colesberg en het onder die Ring van Graaff-Reinet geressorteer. In 1853 ontvang die Sinodale Kommissie 'n brief van J.C. Wiid, eienaar van die plaas Duvenaarsfontein, waarin hy sy plaas vir die stigting van 'n aparte gemeente aanbied. In 'n afsonderlike brief vra 70 ondertekenaars vir die afstigting van sodanige gemeente.

Op 18 Februarie 1854 word 'n gemeente op die plaas Duvenaarsfontein gestig en gedoop Hopetown, of Hoopstad (sien Hoopstad, Vrystaat), soos dit in die begin bekend was. Dit is dus die oudste NG gemeente in die huidige sinode van Noord-Kaapland (sien Lys van eerste honderd NG gemeentes in Suid-Afrika), maar is slegs die sowat 55ste oudste in Suid-Afrika. Die eerste kerkraad is spoedig bevestig en dienste is eers in 'n tentkerk gehou voor die eerste kerkgebou in Februarie 1857 voltooi en ingewy is. 'n Nuwe kerkgebou is in Januarie 1914 ingewy nadat die oue krake begin toon het en baie ongerieflik vir die kerkgangers was. Danksy die ywer van sendelinge, onder wie J.H. Louw (1890 tot 1898 en weer van 1904 tot 1917) en eerw. J. de Villiers en eerw. G.C. Oosthuizen, is 'n sendinggemeente in 1922 gestig.

Die ontvolking deur NG lidmate van die platteland raak Hopetown se gemeente net soos dié van die meeste ander dorpe. In 1979 was die lidmaattal 750, maar in 2006 net oor die 500 en in 2012 458. (Sien NG Kerk se amptelike webblad vir nadere besonderhede oor die gemeente Geargiveer 27 September 2007 op Wayback Machine.)

Sien ook

Lys van dorpe in Suid-Afrika

Bekende boorlinge

Blaar Coetzee, kleurryke politikus en sakeman
Genl. ds. Paul Hendrik Roux.
F.A. Venter, Afrikaanse skrywer.

Eksterne skakel

Volledige inligting vir toeriste Geargiveer 22 Februarie 2014 op Wayback Machine
Die tydskrif Fairlady wys Hoërskool Hopetown aan as een van die top-50 staatshoërskole in die land. URL besoek op 5 Junie 2013.

Bronne

Raper, P.E. 1987. Dictionary of Southern African Place Names, Lowry Publishers, Johannesburg.
Mayhew, Vic (red.). 1980. Reader's Digest Illustrated Guide to Southern Africa, Reader's Digest Association, Cape Town.
Olivier, ds. P.L. (samesteller). 1952. Ons gemeentelike feesalbum. Kaapstad en Pretoria: N.G. Kerk-uitgewers.