Kindermonument

Die Kindermonument is ‘n gedenkteken in Bloemfontein ter ere van Afrikaner-jeughelde en is op 1 Oktober 1959 deur dr. H.F. Verwoerd onthul.

Ligging

Die monument is op die voorgewel van die Sondagskoolgebou van die NG Kerk in Maitlandstraat.

Sentrale beeldgroep

Dit bestaan uit ‘n ongeveer 2 m-hoë beeld van ‘n seun en ‘n meisie van elk ±15 jaar oud wat die landsvlag hys. Die seun simboliseer die krag waarop die land gebou is en die meisie die volksideale wat nog nagestreef word. Aan hul voete is ‘n oop Bybel met die teks “Laat my lammers wei”. Prof. G. Ricotti van Johannesburg was die kunstenaar.

Sypanele

Daar is 8 sypanele van elk naastenby 2 m breed en 1 m hoog. Op elkeen is ‘n kernaspek in die Afrikaner se ontwikkelingsgeskiedenis afgebeeld met ‘n verklarende byskrif.

• ”Eerste Doop, 1653”. Die eerste Christelike doop aan die Kaap word bedien aan Willem Wijlant, die eerste Nederlandse baba wat by Jan van Riebeeck se verversingstasie op 6 Junie 1652 gebore is. Hy was die seun van Willem Barendtszoon Wijlant, die eerste sieketrooster en onderwyser.
• ”Katkisasieklas, Trichardttrek”. Meester Daniël Pfeffer hou Sondagskool vir drie kinders in Januarie 1838.
• ”Petrus Bezuidenhout, 1838”. Dit toon die 14-jarige seun wat van die geveg met die Zoeloes by Bloukransrivier ontsnap.
• ”Rachel de Beer” (Racheltjie de Beer)
• ”Helena Lotrie, 1888” (Helena Lotrie)
• ”Japie Greyling, 1901” (Japie Greyling)
• ”Die Penkoppe, 1899-1902”. Twee onervare kindersoldate (penkoppe) dra ‘n gewonde burger na veiligheid, terwyl ‘n derde aanhou skiet en ‘n vierde die omgewing deur sy verkyker dophou.
• ”Boekevat”. Dit toon ‘n gesin tydens huisgodsdiens: die oudste seun gee die Statebybel aan, ‘n dogter sit voor die huisorreltjie, ‘n seun en dogter sit by die kombuistafel en die jongste kind sit op sy ma se skoot.

Al hierdie sypanele is die werk van Laurika Postma.

Bibliografie

• Ensiklopedie van die Wêreld, deel 6. Stellenbosch: Albertyn, 1991. ISBN 0-949948-20-9
• Standard Encyclopaedia of Southern Africa, deel 3. Kaapstad: Nasou, 1971