Linden
Linden is 'n voorstad van Johannesburg, Suid-Afrika en grens aan Randburg.
Linden | |
|---|---|
Voorstad | |
 Vierde Laan, tussen Sewende en Agtste Straat, met die uitsig suidoos op die middestad. | |
  Linden Linden se ligging in Gauteng | |
| Koördinate: 26°8′6″S 27°59′31″O / 26.13500°S 27.99194°O | |
| Land |  Suid-Afrika |
| Provinsie | Gauteng |
| Munisipaliteit | Stad Johannesburg |
| Oppervlak | |
| • Totaal | 4,04 km2 (1,56 vk. myl) |
| Bevolking (2011)[1] | |
| • Totaal | 8 629 |
| • Digtheid | 2 136/km2 (5 530/vk. myl) |
| Rasverdeling (2011) | |
| • Wit mense | 66,7% |
| • Indiërs/Asiërs | 7,9% |
| • Bruin mense | 2,5% |
| • Swart mense | 21,8% |
| • Ander | 1,2% |
| Taal (2011) | |
| • Engels | 49,7% |
| • Afrikaans | 30,3% |
| • Zoeloe | 3,7% |
| • Tswana | 3,6% |
| • Ander | 12,7% |
| Poskode (strate) | 2195 |
| Poskode (posbusse) | 2104 |
| Skakelkode | 011 |
Ligging en geriewe
wysigLinden word begrens deur die Randburgse voorstede Aldara Park en Darrenwood in die noordweste en Linden-uitbreiding in die noorde. Van Johannesburg se voorstede begrens Blairgowrie dit in die noordooste, Pierneef Park en Victory Park in die ooste, Emmarentia in die suide, Franklin Roosevelt Park in die suidweste en Montroux en Risidale in die weste. Linden is volgens 'n strak roosterpatroon uitgelê met Eerste tot Vyfde Laan wat van suidoos na noordwes loop en Eerste tot Elfde Straat van suidwes na noordoos. Al straat wat nie 'n nommer het nie, is Cosmosstraat in die noordwestelike uithoek. Die enigste twee staatsskole in Linden is albei Afrikaansmedium: die Laerskool Louw Geldenhuys en die Hoërskool Linden, onderskeidelik een van net vier Afrikaansmediumlaerskole en twee Afrikaansmediumhoërskole in Johannesburg.
Ontstaan
wysigLinden is in 1898 (of volgens 'n ander bron 1901) uitgelê op die plaas Klipfontein No. 479 en het gegrens aan die plaas Braamfontein in die suidooste en Waterval in die suidweste. Toe Linden uitgelê is, het die plaas blykbaar aan Johannes Jacobus Rabie van der Linde en Louw Geldenhuys behoort, wat saam besluit het om hul grond in standplase te laat opmeet. Oor die oorsprong van die naam Linden bestaan onsekerheid. Dit kan wees na aanleiding van die goudmynpionier Gert van der Linde of dan wel na Johannes van der Linde, wat die dorpsgebied saam met Geldenhuys aangelê het.[2] Nog 'n moontlikheid is waarskynlik 'n kombinasie van Van der Linde en Geldenhuys.
Uitbreiding
wysigLinden is 8 km van die middestad af geleë. Toe dit uitgelê is, was dit te ver van die sakekern om dadelik veel belangstelling te wek, maar teen die 1920's het die gebied die vorm begin aanneem van 'n versameling kleinhoewes, waar boorde floreer het en 'n groot privaat melkery bedryf is. Teen die 1950's het die hoewes begin plek maar vir residensiële standplase met enkelwonings daarop. Omdat meer gegoede Afrikaners hulle graag hier kom vestig het, het Linden die bynaam "Boere-Houghton" gekry - 'n verwysing na die oorwegend Engelse, gegoede Houghton Estate. Die rede hiervoor was blykbaar daty die Lindense erwe van ongeveer 2000 m2 byna vier keer so groot was as die deursnee-erf van 500 m2 in die sogenaamde "Dip" (Mayfair, Mayfair-Wes, Brixton en Fordsburg), waar die meeste Afrikaners in Johannesburg gewoon het.
Demografie
wysigTot omstreeks 1960 was die meeste van Linden se inwoners Afrikaanssprekend. Volgens die munisipale kieserslys was 93 van die kiesers in 1934 Afrikaans en 53 Engels. In 1949 was dit 808 Afrikaans en 606 Engels, maar teen 1961 het die Engelse kiesers die Afrikaanssprekendes verbygesteek: 1 699 vergeleke met 1 629. Volgens die sensus van 2011 was die taalverdeling Engels 49,8% (4 243) en Afrikaans 30,3% (2 582). Presies twee derde van 8 629 inwoners was Wit en net meer as 'n vyfde Swart.
Bronne
wysig- (en) Raper, Peter Edmund. 2004. New Dictionary of South African Place Names. Johannesburg & Cape Town: Jonathan Ball Publishers
- (af) Stals, prof. dr. E.L.P (red.). 1978. Afrikaners in die Goudstad. Deel 1. 1886 - 1924. Kaapstad en Pretoria: HAUM.
Verwysings
wysig- ↑ 1,0 1,1 1,2 1,3 "Subplek Linden". Sensus 2011.
- ↑ (en) Agtergrond van Rian Malan se My Traitor's Heart Geargiveer 22 Augustus 2017 op Wayback Machine. URL besoek op 13 Februarie 2018.