Cor du Plessis

Maria Cornelia du Plessis (noemnaam Cor, gebore De Klerk, Potchefstroom, 2 Junie 1904 – 23 November 1998) was van 1928 tot 1955 predikantsvrou in twee sendinggemeentes van die Gereformeerde Kerke in Suid-Afrika, waarna haar man van 1956 tot 1959 dosent was aan die Hammanskraalse Teologiese Skool en van 1959 tot sy dood op 28 Desember 1971 hoogleraar aan die Teologiese Skool Potchefstroom.

Prof. Hugo en mev. Cor du Plessis.

Prof. en mev. Du Plessis omstreeks 1960.

Prof. en mev. Du Plessis en hul gesin. Voor: C.M. (Cecilia) van der Walt met haar oudste dogter, Maria Cornelia (getroude van Van Rooy; noemnaam Corrie), prof. Du Plessis, mev. Du Plessis, Laurika Coetzee en Monica du Plessis. Agter: B.J. du Plessis, prof. I.J. van der Walt, M. van Rooyen, J.A. du Plessis en G.H.J. Coetzee.

Cor de Klerk was die dogter van Barend en Cecilia de Klerk van Potchefstroom. Sy was ’n tikster en snelskriftikster aan die PUK vir CHO voor haar huwelik. Later het sy gedien in die Boekekeurkomitee en was sy medewerker van die Gereformeerde Vroueblad vanaf 1956. Ook was sy voorsitter van die Gereformeerde Vrouesendingkring van Johannesburg sedert 1953, bestuurslid van die Gereformeerde Sendingwelsynsorganisasie van die Rand van 1955 af, instruktrise vir die opleiding van vroue van swart teologiese studente van 1956 af en ook in verband met welsynswerk was sy instruktrise in handwerk en godsdiens van swart buitekerklikes vanaf 1958.

Uit die huwelik is ses kinders gebore, onder wie Cecilia van der Walt, eggenote van dr. I.J. van der Walt (Johannesburg-Suid 1951–1958, Vanderbijlpark 1958–1967, sendeling van die vier Potchefstroomse kerke 1967–1977, professor aan die Teologiese Skool Potchefstroom 1978–1986; oorlede 28 Junie 1997).

Bronne

• (af) Die Gereformeerde Vroueblad. 1959. Die Gereformeerde vrou 1859-1959. Potchefstroom: Potchefstroom Herald.