Magalina Postma

Magalina Margaritha Postma (vroeër Uys, née Bronkhorst, Koedoespoort, Pretoria, Transvaal, 16 of 26 Desember 1868 – Pretoria, 7 Augustus 1955) was ’n skrywer en leidster in die Vroue-Nasionale Party.

Magalina Postma.

Magalina Postma se tweede man, ds. Dirk Postma jr.

Magalina Bronkhorst was ’n dogter van Philippus Karel Bronkhorst en sy vrou, Anna Elizabeth Zirka Jacoba Erasmus. Sy is op 7 Desember 1886 in Pretoria getroud met Daniel Jacobus Elardus Erasmus van Randjesfontein, Pretoria, wat in 1897 lid was van die kommando wat sir Leander Starr Jameson tydens die Jameson-inval aangekeer het. Op 26 Desember 1898 is sy getroud met Pieter Gysbert Steyn Uys, lid van die Volksraad van die Zuid-Afrikaansche Republiek. Hy is in 1907 in Italië oorlede. Op 20 Januarie 1911 is sy getroud met ds. Dirk Postma, die jongere, ’n seun van die stigter van die Gereformeerde Kerk in Suid-Afrika, ds. Dirk Postma. Ds. Postma jr. was van 1884 tot 1888 leraar van die Gereformeerde kerk Fauresmith, van 1889 tot 1890 van Humpata in Angola, van 1891 van die kombinasie Fauresmith-Petrusburg en van 1894 tot 1897 van Steynsburg. In laasgenoemde jaar het hy ’n beroep aangeneem na sy geboortedorp, Rustenburg, waar hy op 6 Mei 1897 as leraar van die plaaslike Gereformeerde kerk bevestig is. Weens insolvensie, wat deels toegeskryf kan word aan die spandabelheid van sy eerste vrou, neem hy op 30 Junie 1905 ontslag en word daarna as predikant afgesit. Hy het tevergeefs probeer om herstel te word en het intussen ’n bestaan gevoer as ’n reisende agent wat boeke en ander ware op die platteland verkoop het. Haar man het hom in enkele spekulatiewe transaksies begewe, maar in onbemiddelde omstandighede op Hopetown in die Karoo gesterf en is aldaar begrawe ná sy dood in 1919. Sy weduwee het blykbaar nie weer getrou het nie.

Magalina Uys was ten tyde van haar huwelik met ds. Postma ’n bekende inwoner van Middelburg, Transvaal. Hier het sy ’n tak van die Vroue- Nasionale Party gestig, waarvan sy voorsitster was. In die tyd ná die Rebellie het sy £100 tot die Helpmekaarfonds bygedra. Sy het deelgeneem aan die vrouedemonstrasie in Pretoria tydens die Rebellie om die regering om amnestie vir die rebelle te vra en het minstens ses jaar lank in die hoofbestuur van die Vroue-Nasionale Party gedien.

Twee versamelwerke het uit haar pen verskyn: Stemme uit die vrouekampe gedurende die Tweede Vryheidsoorlog tussen Boer en Brit van 1899 tot 1902 (Potchefstroom, 1925) en Stemme uit die verlede: ’n versameling van beëdigde verklarings van vroue wat tydens die Tweede Vryheidsoorlog in die konsentrasiekampe verkeer het (Johannesburg, 1939).

Bron

• (af) (en) Reitz, Hjalmar en Oost, Harm (reds.), Goodman, I.M. (samesteller). 1931. Die Nasionale Boek. 'n Geskiedenis van die ontstaan en groei van die Nasionale Party van Suid-Afrika en wat dit bereik het, tesaam met belangwekkende Artiekels in verband daarmee. Johannesburg: Nasionale Boek Maatskappy.