Marion Holm

Marion Holm is ’n Afrikaanse akteur en skrywer van toneelstukke.

Marion Holm
Nasionaliteit	Suid-Afrika
Beroep(e)	Aktrise
Internet-rolprentdatabasis-profiel

Lewe en werk

Marion Holm is die jongste van drie dogters en gaan skool aan die Laer Meisieskool Worcester, waarna sy matrikuleer aan die De Kuilenskool in Kuilsrivier in Kaapstad. Sy studeer daarna Drama aan die Universiteit van Stellenbosch, waar sy aan verskeie produksies deelneem. In 1983 wen sy die USAT-prys as beste byspeler vir haar rol in “In Camera”, terwyl sy in 1986 ’n Fleur du Cap-benoeming ontvang as mees belowende student. Hoewel sy al haar dramavakke afhandel, gradueer sy nie omdat sy nie ander vereiste vakke geslaag het nie. Na universiteit sluit sy in 1986 aan by die Kaapse Raad vir die Uitvoerende Kunste (KRUIK) en is hier betrokke by verskeie opvoerings, waaronder die omstrede “Piekniek by Dingaan” saam met onder andere Koos Kombuis, Johannes Kerkorrel en Nataniël, en “Panorama” van Pieter-Dirk Uys. Sy kry benoemings vir Fleur du Cap-pryse as beste aktrise in “Ubu Roi” in 1988 en as beste byspeler in “Tartuffe” in 1989.

Hierna sluit sy in 1989 by die Streeks Uitvoerende Kunsteraad van die Oranje-Vrystaat (SUKOVS) aan as voltydse akteur en verwerf die Cobus Rossouw-toekenning in 1990. In hierdie tyd doen sy ook heelwat radiowerk. Sy gaan werk dan in 1990 in Hermanus by die Ou Hawe Museum as ’n assistent, waarna sy Johannesburg toe trek en by Sukhulu Holdings, ’n in- en uitvoermaatskappy, ontvangsdame is en ook die skakelbord beman. Daarna gaan werk sy by Leads Artiste Agency as kunstenaarsagent. Dan skryf sy vir ’n ruk sinchronisasiebande vir oorklanking by die Suid-Afrikaanse Uitsaaikorporasie en werk daarna by Principal Casting as rolverdelingsregisseur. Mettertyd gaan dit so goed dat sy en ’n vennoot, Margie Fischer, die maatskappy koop en selfs ’n Kaapse tak oopmaak.

In 2000 verlaat sy hierdie werk en trek terug Kaap toe, waar sy enige vryskutwerk doen wat die huur kan betaal. So doen sy rekenaarwerk by Intec, warm die gehoor op by die program Liriekeraai, koördineer deelnemers by Liriekeraai en werf en keur deelnemers vir die televisieprogram “Greed”. As gevolg van hierdie produksiewerk bel Casper de Vries haar met die versoek om die produksie van die “Casper Rasper Show” waar te neem, waarvoor sy vir drie maande terugtrek Johannesburg toe. Sy speel in ’n paar tonele in hierdie reeks en ook die opvolgreeks en begin weer op die verhoog optree in produksies soos “Doller as kop-af”, “Jong Dames Dinamiet” en “Anna se Engel”. Die gevolg is dat sy weer voltyds terug is in die bedryf. Sy stig die beslote korporasie Handyminds in 1995 en bestuur dit saam met Marietjie Rossouw.

Hierdie veelsydige besigheid doen soos die naam aandui feitlik enigiets wat deur ’n flink brein bedink kan word. Aktiwiteite sluit in industriële teater, die reël van korporatiewe funksies, vervaardiging van teaterproduksies, regie, skryf of verwerking van teatertekste en optredes as seremoniemeester. Marion is ook baie betrokke by vervaardigingswerk vir die televisie.

Wanneer fibriomalgie by haar gediagnoseer word, is sy onseker oor die impak van hierdie siekte op haar loopbaan. Sy besluit dus om weer haar dramastudies te hervat, sodat sy kan klas gee as sy nie meer in staat is om op te tree nie. In die tyd wat sy die universiteit verlaat het, verander die leerplan egter ingrypend en het al haar krediete reeds verval. Sy moes dus van vooraf begin met haar studies vir die B.Drama-graad, wat sy in 2015 aan die Universiteit van Stellenbosch verwerf. Sy bly in Kraaifontein in Kaapstad.

Skryfwerk

Sy word veral bekend as skrywer en komediant wanneer sy haar bekende “Sussie”-stukke op kunstefeeste opvoer. “Sussie is nou suur”, die eerste een, debuteer in 2004 by die Klein Karoo Nasionale Kunstefees en word ook op DVD opgeneem. Daarna volg “Sussie rafel nou uit”, “Braaivleis, rugby, sunny skies en Sussie”, “Sussie: Survivor (Kuilsrivier)”, “Cirque du Sussie” en sy sluit hierdie karakter af met die opvoering van “Sussie: Cheers!” In laasgenoemde stuk kombineer sy die beste sketse uit haar vorige vertonings met enkele nuwe stukke.

Saam met Chris Vorster skryf sy die komedie “Met die Holm gebore”, wat in 2010 by die Klein Karoo Nasionale Kunstefees debuteer en daarna werk sy vir al haar opvolgende solostukke saam met hom. “Holmakiesie” debuteer by 2012 se KKNK en “Holm: Ge-Marionneer” by 2013 se KKNK. In laasgenoemde stuk word marinade suksesvol aangewend as ’n metafoor vir die lewe se uitdagings. “HOL Marion!”, ’n stuk wat handel oor die gejaagdheid van die lewe, word in 2015 benoem vir ’n Fiësta-toekenning vir beste solovertoning. Hierna volg “Die Kaap is weer Holms”, wat in 2015 by die KKNK debuteer. Die tema is dat mens verantwoordelik is vir eie geluk en het ’n fokus op die goeie dinge wat mense vergeet wanneer hulle negatief raak. “Marion Holm vir beginners” bevat hoofsaaklik outobiografiese materiaal, waarin sy haar en haar familielede se karakters en ervarings maar ook staaltjies oor persoonlikhede soos Nataniël met die gehoor deel.

Filmografie

• Lui maar op, Belinda; televisiereeks; vertolk die rol van 'n kliënt in die winkel (2019)
• Sara se Geheim; televisiereeks; vertolk die rol van Jamiel (

• Terug na Egipte; televisiereeks; vertolk die rol van Dot Volschenk (2015)

• Vlug na Egipte; televisiereeks; vertolk die rol van Dot Volschenk (2015)

• Totsiens, Pa; kort film; vertolk die rol van Mari (2014)

• Skoonheid; film; vertolk die rol van die tannie (2011)

• The Scorpion King: Rise of a Warrior (video); vertolk die rol van die kwaai vrou (2008)

• Haak & Steek; televisiereeks; vertolk die rol van Tilla Gelderblom (2003)

• Arende II: Moordenaars Karoo; televisiereeks; vertolk die rol van Magdalena Visser (1992)

• Dot en Kie; televisiereeks; vertolk die rol van Toetsie Dippenaar (1988)

Teater

Van Holm se jongste teaterproduksies:

• Operasie Holm; eenvrouvertoning; regie: Chris Vorster en Marion Holm

• Ag ek val sommer met die Holm in die huis; eenvrouvertoning; regie: Chris Vorster en Marion Holm

• Koöperasiestories; vertolk die rol van Mietie

• Marion Holm for Beginners; eenvrouvertoning; regie: Chris Vorster en Marion Holm

• Afrika in Afrikaans; behartig die aanbieding; 'n musiekvertoning met Timothy Maloi, Gloria Bosman en Anna Davel

• Die Kaap is weer Holms; eenvrouvertoning; regie: Chris Vorster en Marion Holm

• Koeitjies & Kalfies, Ditjies & Datjies; behartig die aanbieding

• Gedigte sonder grense; voorlesing van gedigte

• Hol Marion!; eenvrouvertoning; regie: Chris Vorster

• Bloemers & Roemers; vertolk die rol van Johanna; regie: Albert Maritz

• Holm: Gemarioneer; eenvrouvertoning; regie: Chris Vorster

• Die Aardes van die Grootoor; vertolk die rol van Dolla; regie: Albert Maritz

• Holmakiesie; eenvrouvertoning; regie: Chris Vorster

• Holm@iAfrica.com; eenvrouvertoning; regie: Chris Vorster

• Bloemers & Roemers 2; komedie improvisasie; regie: Marion Holm

• Caspernades; komedie improvisasie;

• Met die Holm gebore; eenvrouvertoning; regie: Chris Vorster

• Vrydag is Skeidag; vertolk die rol van die vrou; regie: Chris Vorster

• Sussie: Cheers!; eenvrouvertoning; regie: Chris Vorster

• Uit die Agterste Bank; vertolk een van 2 rolle

• Cirque du Sussie; eenvrouvertoning; regie: Hennie van Greunen

• Die Vrou Wat Haar Man Gekook Het; vertolk die rol van Hilary; regie: Lara Bey

• 48-uur Drukkoker Projek; vertolk die hoofrol; regie: Ilse van Heemert

• Sussie: Survivor (Kuilsrivier); eenvrouvertoning; regie: Hennie van Greunen

Toekennings

• Fiësta-nominasie: Beste solo vertoning, vir Die Kaap Is Weer Holms (2016)

• ATKV Mediaveertjie: Beste Aktrise in 'n televisiereeks, vir haar rol as Dot in Vlug na Egipte (2016)

• Tempo-nominasie: Beste Aktrise, vir haar rol as Dot in Vlug na Egipte (2015)

• Fiësta-nominasie: Beste solo vertoning vir Hol Marion! (2014)

• Fiësta-nominasie: Beste solo vertoning vir Met Die Holm Gebore (2011)

• Kanna-toekenning: Mees Gewilde Vertoning, vir Bloemers & Roemers (2010)

• Burgemeester-toekenning van Tlokwe: vir Bloemers & Roemers tydens die Aardklop Kunstefees (2010)

• Woordfees-trofee: Beste Aktrise, vir 48-uur Drukkoker Projek (2008)

• Cobus Rossouw-toekenning: Ontvang as deel van die SUKOVS teatergeselskap (1990)

• Fleur du Cap-nominasie: Beste Ondersteunende Aktrise, vir haar rol as Dorine in Tartruffe (1989)

• Fleur du Cap-nominasie: Beste Aktrise, vir haar rol as Ma Ubu in Ubu Roi (1988)

• Fleur du Cap-nominasie: Mees Belowende Student (1986)

Bronnelys

Tydskrifte en koerante

• Beeton, Marisa “Die kind is nou groot” “Rapport” 24 Junie 2007
• Bouwer, Anna-Retha “Sussie groet, maar lank lewe Marion!” “Plus” 21 Augustus 2009
• Burger, Kobus “As ek kan lag, gaan dit beter” “Plus” 17 Mei 2007
• Opperman, A.J. “Marion: Met haar ‘bakstene’ bou sy nuwe gehore” “Beeld” 15 Julie 2015
• Pople, Laetitia “Marion maak die Kaap ‘Holms’” “Beeld” 2 Maart 2015
• Van den Berg, Samantha “Komediant Holm vang ná 32 jaar graad” “Beeld” 10 Desember 2015
• Visser, Grethe “Sussie trek stroom op” “Wapad” 27 September 2006

Internet

• Blackburn, Cyril Maroela Media: http://maroelamedia.co.za/goeiegoed/goeie-nuus/luister-marion-holm-kry-dramagraad-op-50/
• Esat: http://esat.sun.ac.za/index.php/Marion_Holm
• Marion Holm: http://www.marionholm.co.za/
• Stellenbosch Universiteit: http://www.sun.ac.za/english/Lists/news/DispForm.aspx?ID=3299
• https://www.imdb.com/name/nm3102330/