NG gemeente Mufulira

Die geskiedenis van die NG gemeente Mufulira in die destydse Noord-Rhodesië kan teruggevoer word tot 1934 toe dr. M.W. Retief as medeleraar van die NG gemeente Nkana met werkkring Mufulira aangestel is.

Ds. Thomas Arnoldus Theron, eerste leraar van 1946 - 1950.

Daar is eers net elke eerste Sondag van die maand 'n diens gehou op Mufulira. Op 17 Oktober 1942 is die hoeksteen van die latere kerksaal deur ds. Retief gelê. Die dienste op die eerste Sondag het voortgegaan en op die ander Sondae het 'n ouderling 'n diens in die aand waargeneem.

In 1944 is dr. Retief op Nkana deur ds. D.J. Redelinghuys opgevolg, wat 'n tyd lank 'n hulpprediker, prop. Viviers, se hulp met as standplaas Mufulira gehad het. Op 15 September 1945 vergader die ringskommissie van die Ring van Bulawayo, in daardie stadium die enigste in die huidige Zambië en Zimbabwe, en besluit om Mufulira saam met Chingola tot onafhanklike gemeente binne die Vrystaatse Kerk af te stig. In 1946 ontvang die gemeente sy eerste leraar, ds. T.A. Theron. Hy het die gemeente tot 1950 bearbei en is toe, ná Chingola tien maande lank vakant was, daarheen as die gemeente se eerste leraar.

Mufulira het 'n bruidskat van £500 aan NG gemeente Chingola met daardie gemeente se afstigting in 1950 geskenk. Die tweede leraar, ds. P.J. Meiring, is op 17 Maart 1950 deur die gemeente ontvang.

Mufulira is omstreeks 1970 by die NG gemeente Nkana ingelyf, ná 'n drastiese afname in die getal Afrikaners in die land ná onafhanklikheid.

Enkele leraars

• Thomas Arnoldus Theron, 1946 - 1950.
• Dr. Philippus Josua Meiring, 1951 - 1954.
• Cornelius Uys Lourens Fick, 1954 - 1958.
• Daniël Christiaan Esterhuyse, 1954 - 1959.

Sien ook

• NG Kerk in Zambië
• Sinode van Midde-Afrika

Bronne

• Olivier, ds. P.L., Ons gemeentelike feesalbum. Kaapstad en Pretoria: N.G. Kerk-uitgewers, 1952.
• Gaum, dr. Frits (red.), Jaarboek van die Nederduitse Gereformeerde Kerke 1990, Pretoria: Tydskriftemaatskappy van die Nederduitse Gereformeerde Kerk, 1989.