NG gemeente Rosendal
Die NG gemeente Rosendal is die jongste gemeente in die Vrystaatse Sinode van die Nederduitse Gereformeerde Kerk se Ring van Lindley, al is dit reeds in 1913 gestig. In 2015 was hier 12 doop- en 64 belydende lidmate, vergeleke met onderskeidelik 68 en 175 in 1985, ’n afname in die sieletal van 69 persent binne 30 jaar.
Die dorpie Rosendal is geleë tussen die westelike voorheuwels van Visierskerf en Swartkrans, die tweede en derde hoogste spitse in die Vrystaat. Die omgewing is een van verfrissende en bekorende natuur skoon, maar daarby effens afgesonderd van die naaste dorpe. Dit was veral die ongerief van laasgenoemde wat aanleiding gegee het tot die proklamering van die dorp, waarvoor die plaas Leliefontein in 1911 aangekoop is. Op 15 Oktober 1913 word Rosendal-gemeente van Ficksburg, Senekal en Bethlehem afgestig.
’n Kenmerk van die pas gestigte gemeente die moeilike topografie, die klein getal lidmate (wat in die middel van die 20ste eeu darem amper 500 bereik het) en die feit dat die gemeenskap vir die grootste deel van sy bestaan byna uitsluitlik tot die NG Kerk behoort het. Ds. A.J. Troskie van Ficksburg het as konsulent opgetree. Weens vyf mislukte beroepe moes hy die gemeente byna drie jaar lei. Dat onder die gevolglik moeilike omstandighede die aanvangstake so deeglik verrig is, getuig van die bekwaamheid van die konsulent en die eerste kerkraad. Met groot feesvreugde is prop. H.G. Theron in April 1916 as eerste leraar ontvang; by hierdie geleentheid is ook die kerk ingewy. Gedurende die drie en 'n half jaar van sy bediening het die storms van die griep en rebellie oor die land gegaan, maar sonder ernstige storings in hierdie gemeente. In sy tyd is ook ’n sendingkerk gebou.
Ds. J.P.H. Steyn bedien vervolgens die gemeente tot 1925. In dié jare is die pastorie, 'n mooi, stewige klipgebou, aangebou. In April 1926 is prop. B.I.G. Viljoen hier georden. Ds. Viljoen lei die gemeente deur die moeilike depressiejare en daarna deur buitekerklike teenstand. Voor sy vertrek in 1946 was die onrus en skuld grootliks oorwin. Ds. J.P.J. van Rensburg se kort bediening van twee en 'n half jaar sal veral onthou word vir, naas sy geseënde bediening, die delging van die kerkskuld. In April 1950 is prop. S.I. du Toit georden. Destyds was 'n kerkkoshuis in aanbou, en is aan 'n taamlik omvattende plan gewerk vir die verfraaiing van die kerkperseel. Verder is indertyd uitgesien na die dag, dat 'n nuwe orrel en kerksaal 'n werklikheid sou word.
Bronne
wysig- (nl) Maeder, ds. G.A. en Zinn, Christian. 1917. Ons Kerk Album. Kaapstad: Ons Kerk Album Maatschappij Bpkt.
- (af) Olivier, ds. P.L., 1952. Ons gemeentelike feesalbum. Kaapstad en Pretoria: N.G. Kerk-uitgewers.
Eksterne skakels
wysig- (en) Foto's van die kerk, binne sowel as buite[dooie skakel]. URL besoek op 2 Maart 2016.