Plataleinae

Lepelaars (Plataleinae) is 'n subfamilie van voëls wat aan die familie van ibisse en lepelaars (Threskiornithidae) behoort. Slegs een genus Platalea hoort tot die subfamilie. Lepelaars is betreklike groot waadvoëls met lang pote en lang snawels wat in ʼn spatelvormige punt eindig. Van die ses spesies van die subfamilie, wat wêreldwyd in warm dele aangetref word, kom een, Platalea alba, in Suider-Afrika by binnelandse damme en riviere voor.

Lepelaars
Wetenskaplike klassifikasie
Domein:	Eukaryota
Koninkryk:	Animalia
Filum:	Chordata
Klas:	Aves
Orde:	Ciconiiformes
Familie:	Threskiornithidae
Subfamilie:	Plataleinae
Genera
Platalea

Indeling en bou

Wat voorkoms en gedrag betref, toon lepelaars baie ooreenkomste met die ibisse. Hoewel daar ornitoloë is wat lepelaars in 'n eie familie (Plataleidae) indeel, beskou die meeste wetenskaplikes lepelaars as 'n subfamilie (Plataleinae) van Threskiornithidae omdat die belangrikste verskil, die spatelvormige snawel, nie by lepelaarkuikens voorkom nie. Kuikens wat pas uitgebroei is, het ibisagtige snawels.

Ander verskille is dat lepelaars se pote langer is as die van ibisse en dat die meeste soorte spierwit is. Van die ses verskillende spesies kom een in Eurasië en Noord-Afrika voor, een in Oos-Asië, twee in Australië, een in Amerika en een in Suider-Afrika. Die Amerikaanse spesie (Platalea ajaja) verskil van die ander deurdat sy algemene kleur nie wit is nie, maar helderpienk.

Spesies

• Platalea ajaja – Roseate-lepelaar
• Platalea alba – Afrika-lepelaar
• Platalea flavipes
• Platalea leucorodia – Gewone lepelaar
• Platalea minor
• Platalea regia

Sien ook

• Alfabetiese lys van Suid-Afrikaanse voëls
• Lys van Suid-Afrikaanse voëls (gegroepeer)
• Lys van Suider-Afrikaanse voëls volgens wetenskaplike name

Bron

• Wêreldspektrum, 1982, ISBN 0908409583 band