Rugby Samoa
Rugby Samoa (Engels; Samoaans: Lakapi Samoa) is die bestuursliggaam wat rugby en sewesrugby in Samoa beheer. Die beheerliggaam is in 1924 gestig en in Apia gesetel. Sedert 1988 verteenwoordig dit Samoa by Wêreldrugby en sedert 2000 ook by Oseanië Rugby (“OR”).
| Rugby Samoa | |
|---|---|
 Kenteken van Rugby Samoa
| |
| Engelse naam | Rugby Samoa |
| Afkorting | RS |
| Land |  Samoa
|
| Sportsoorte | Rugby, Sewesrugby |
| Stigting | 1924 |
| Lid van | Wêreldrugby |
| Aangesluit in | 1988 |
| Vastelandse beheerliggaam | Oseanië Rugby |
| President | Tuila’epa Sa’ilele Malielegaoi |
| Setel | Apia, Samoa |
| Amptelike tale | Engels en Samoaans |
| Amptelike webwerf | lakapisamoa.com |
Geskiedenis
wysigRugby Samoa is in 1924 onder die naam Apia Rugbyvoetbalunie (Engels: Apia Rugby Football Union, die latere Wes-Samoaanse Rugbyvoetbalunie en die huidige Rugby Samoa) gestig en het in 1988, net ná die eerste rugbywêreldbekertoernooi, ’n volle lid van die Internasionale Rugbyvoetbalraad (IRVR; nou Wêreldrugby) geword.[1] Daarbenewens was Rugby Samoa in 2000 ’n stigtingslid van die Vereniging van Oseaniese Rugbyunies (Federation of Oceania Rugby Unions, FORU; nou Oseanië Rugby).[2]
Taak
wysigRugby Samoa organiseer verskeie nasionale spanne, insluitend Samoa se nasionale seniorrugbyspan vir mans (die Manu Samoa), vroue en jeug. Rugby Samoa hou ook toesig oor sewesrugby in Samoa en aangesien dit ’n Olimpiese sportsoort is, werk hulle met die Samoaanse Nasionale Olimpiese Komitee saam. Samoa is een van die min lande waar rugby die hoofsport is. Slegs die Cookeilande, Fidji, Nieu-Seeland, Tonga en Wallis kan soortgelyke bewerings maak.[3] Naas die amptelike nasionale span roep Rugby Samoa ook ander keurspanne byeen. Samoa A is die tweede nasionale span van Samoa en hulle neem aan Wêreldrugby se Stille Oseaan-uitdaagtoernooi deel. Die Samoa Sevens is die Samoaanse sewesrugbyspan en hulle neem aan internasionale toernooie soos Wêreldrugby se Sewesreeks, Sewesrugbywêreldbeker, Olimpiese Somerspele en die Statebondspele deel. Daarbenewens bestuur die beheerliggaam kinder- en jeugrugby in Samoa. Kinders en jongmense word reeds op skool aan rugby bekend gestel en na gelang van hul belangstelling en talent begin hul met hul afrigting. Net soos ander rugbylande beskik Samoa oor ’n o/20-nasionale span wat aan die Wêreldrugby o/20-kampioenskap deelneem.[4]
As deel van die Stille Oseaan-eilande Rugbyalliansie het die beheerliggaam van 2004 wedstryde gereël van die Stille Oseaan-eilanders, ’n gemeensame keurspan van die drie Stille Oseaan-eilandstate Fidji, Samoa en Tonga. Aangesien die Stille Oseaan-eilanders nie die gewenste inkomste vir die beheerliggame gegenereer het nie, het die Samoaanse beheerliggaam dié samewerking in 2009 beëindig.[5] Sedert 2022 word die Stille Oseaan-eilande (feitlik die Cookeilande, Fidji, Samoa en Tonga) in die internasionale Superrugbytoernooi verteenwoordig deur die gesamentlike professionele span Moana Pasifika, wat aan dié toernooi deelneem saam met spanne uit Australië, Nieu-Seeland en een uit Fidji.[6]
Die beheerliggaam reël ook die plaaslike kompetisies. Die hoogste rugbyliga in die land is die Samoa Nasionale Provinsiale Kampioenskap.
Kenteken
wysigRugby Samoa se kenteken toon die wapen van Samoa met die belettering Samoa Rugby Union daaronder. Die embleem toon die Suiderkruis, die nasionale simbool van Samoa.
Verwysings
wysig- ↑ (en) "Samoa". Wêreldrugby. Besoek op 27 Maart 2024.
- ↑ (en) Robert F. Dewey (2012). John Nauright, Charles Parrish (red.). Rugby Union Football, Pacific Islands. pp. 445–447. ISBN 978-1-59884-300-2.
{{cite book}}:|work=ignored (hulp) - ↑ (en) "Rugby History in Fiji". Teivovo. Geargiveer vanaf die oorspronklike op 14 November 2007. Besoek op 14 November 2007.
- ↑ (en) "World Rugby U20 Championship". Wêreldrugby. Besoek op 27 Maart 2024.
- ↑ (en) "Samoa quits Pacific Islands Rugby Alliance". Planet Rugby. 17 Julie 2009. Geargiveer vanaf die oorspronklike op 21 Julie 2009. Besoek op 21 Julie 2009.
- ↑ (en) "Reports: Agreement reached for 12-team Super Rugby from 2022". SA Rugby Magazine. Besoek op 27 Maart 2024.