Maak hoofkeuseskerm oop
Vlad III van Walachye.
Vlad geniet ’n maaltyd tussen lyke wat hy laat deurboor het.

Vlad III, ook bekend as Vlad die Deurboorder (Roemeens: Vlad Țepeș) of Vlad Dracula (1428/'31–1476/'77), was tussen 1448 en sy dood drie keer woiwode (prins of hertog) van Walachye. Hy was die tweede oudste seun van Vlad Dracul, wat in 1436 die heerser van Walachye geword het.

Inhoud

LeweWysig

Vlad en sy jonger broer, Radu, is van 1442 in die Ottomaanse Ryk as gyselaars aangehou om hul pa se lojaliteit te verseker. Vlad se pa en sy oudste broer, Mircea, is vermoor nadat John Hunyadi, regent-goewerneur van Hongarye, Walachye in 1447 binnegeval het. Hunyadi het Vlad se kleinneef, Vladislav II, as die nuwe woiwode aangestel.

Hunyadi het die Ottomaanse Ryk in 1448 aangeval, en Vladislav het hom vergesel. Vlad het Walachye in Oktober dié jaar met Ottomaanse hulp binnegeval, maar Vladislav het teruggekeer en Vlad het in die Ottomaanse Ryk gaan skuil. Vlad is in 1449 of 1450 na Moldowa en later na Hongarye. Hy het Walachye in 1456 met Hongaarse hulp binnegeval. Vladislav is dood terwyl hy teen hom geveg het. Vlad het ’n slagting onder die Walachyse bojare begin om sy posisie te versterk. Hy het teenstand gekry van die Transsilvaniese Saksers wat sy teenstanders, Vladislav se broers Dan en Basarab Laiotă, gesteun het asook Vlad se buite-egtelike halfbroer, Vlad die Monnik. Vlad het die Saksiese dorpies geplunder, die mense na Walachye geneem en daar aan pale laat hang nadat hy hulle deurboor het (vandaar sy bynaam). Die vrede is eers in 1460 herstel.

Die Ottomaanse sultan Mehmet II het Vlad gelas om aan hom persoonlik eer te betoon, maar Vlad het die sultan se twee afgevaardigdes laat vang en deurboor. In Februarie 1462 het hy die Ottomaanse Ryk aangeval en tienduisende Turke en Bulgare vermoor. Mehmet het ’n veldtog teen Walchye geloods om Vlad met sy jonger broer, Radu, te vervang. Hoewel dit nie geslaag het nie, het al hoe meer Walachyers na Radu se kant oorgeloop. Vlad is laat in 1462 na Transsilvanië om hulp te vra by die Hongaarse koning, Matthias Corvinus, maar Corvinus het hom gevange geneem en hom daarvan beskuldig dat hy en die sultan Hongarye in die geheim wou inval.

Vlad is van 1463 tot 1475 aangehou. In dié tyd het stories oor sy wreedheid na Duitsland en Italië versprei. Hy is op versoek van Stefanus III van Moldowa in die somer van 1475 vrygelaat. Hy het in Corvinus se leër teen die Ottomane geveg, en Hongaarse en Moldowiese soldate het hom gehelp om Basarab Laiotă (wat Vlad se broer Radu onttroon het) in November 1476 te laat vlug. In dieselfde jaar nog het Basarab teruggekeer met Ottomaanse hulp en Vlad is voor 10 Januarie 1477 vermoor. Boeke waarin vertel is van Vlad se wrede dade, was van die eerste topverkopers in Duitssprekende gebiede. Sy reputasie en patroniem (vadersnaam) het aanleiding gegee tot die naam van die vampier graaf Dracula in Bram Stoker se 1897-boek, Dracula.

NaamWysig

Vlad III se bynaam, Dracula, is soms ook Dracuglia of Drakula gespel.[1] Hy het self in die laat 1470's twee briewe onderteken as Drakulya.[2] Dit kom van sy pa se bynaam, Vlad Dracul ("Vlad die Draak"), wat hy gekry het nadat hy lid van die Orde van die Draak geword het.[3][4] Dracula is die Slawiese genitief van Dracul en beteken dus "(seun) van Dracul" of "van die Draak".[4][5] In moderne Roemeens beteken dracul "die duiwel", wat bygedra het tot Vlad se berugtheid.[5]

Vlad III is in Roemeens bekend as Vlad Țepeș ("Vlad die Deurboorder")[5] omdat hy sy vyande met pale laat deurboor het.[5]

VerwysingsWysig

  1. Nandriș 1991, p. 228.
  2. Nandriș 1991, p. 229.
  3. Treptow 2000, p. 8.
  4. 4,0 4,1 Nandriș 1991, p. 231.
  5. 5,0 5,1 5,2 5,3 Treptow 2000, p. 10.

BronneWysig

  • Nandriș, Grigore (1991). "A philological analysis of Dracula and Romanian place-names and masculine personal names in.a/ea". In Treptow, Kurt W. Dracula: Essays on the Life and Times of Vlad Țepeș. East European Monographs, Distributed by Columbia University Press. pp. 229–237. ISBN 0-88033-220-4. 
  • Treptow, Kurt W. (2000). Vlad III Dracula: The Life and Times of the Historical Dracula. The Center of Romanian Studies. ISBN 973-98392-2-3. 

Eksterne skakelsWysig