Drakensville

ATKV-Drakensville is 'n vakansieoord in die Noordelike Drakensberge op die R74-roete tussen Harrismith en Bergville (net oor die grens tussen die Vrystaat en KwaZulu-Natal). Die oord is 'n rapsie meer as drie uur se ry van Johannesburg en Bloemfontein en sowat twee en ’n halfuur van Durban af. ATKV-Drakensville lê naby die voetheuwels van die Drakensberg-amfiteater, ’n wêrelderfenisgebied, en het 'n aangename koel bergklimaat.

Drakensville
Vakansieoord
Drakensville
Koördinate: 28°36.711′S 29°7.590′O
Land	Suid-Afrika
Provinsie	KwaZulu-Natal
Distriksmunisipaliteit	uThukela
Plaaslike Munisipaliteit	Okhahlamba

Padbord by die hoofhek.

Glygeut en binnenshuise swembad.

Een van Drakensville se swembaddens.

Ontstaan

Die oord het sy ontstaan aan die Kilburndam en Eskom se bedrywighede in die omgewing te danke. Hulle het 'n plaas in die omgewing gehuur om werkers tydens die bou van die Drakensberg-pompopgaarskema te huisves. Dit het kort voor lank tot 'n klein dorpie gegroei. Toe die damprojek afgehandel is, het Eskom onttrek en hul infrastruktuur verkoop. Die oord is in 2006 deur die ATKV gekoop en word ook deur hulle bestuur.

Geriewe

Drakensville bied verhitte swembaddens, 'n waterglybaan, monsterskaak, stap-, perdry- en bergfietsroetes, foefieslaaid oor die dam, kapel vir troues, ens. Besoekers kan die kampeergeriewe gebruik of in die goedversorgde asbeshuisies tuisgaan.

In die omgewing

Boesmanrotskuns en die Drakensberg-amfiteater is binne gesig geleë. Daguitstappies per motor kan ook na die omgewing van die Sentrale Drakensberge (soos Cathedralpiek en Champagne Castle) onderneem word.

Sien ook

• Gereformeerde kerk Harrismith (die naaste dorp, Bergville, het nie 'n Gereformeerde Kerk nie).

Eksterne skakels

• Amptelike webtuiste