Fauresmith
Fauresmith is 'n dorp in Suid-Afrika. Dit is 130 km suidwes van Bloemfontein geleë. Die dorp, wat genoem is na ds. Phillip Faure en sir Harry Smith, is die tweede oudste dorp in die Vrystaat.
Fauresmith | |
|---|---|
 Hoofstraat met treinspore deur die dorp | |
  Fauresmith | |
| Koördinate: 29°45′0″S 25°19′0″O / 29.75000°S 25.31667°OKoördinate: 29°45′0″S 25°19′0″O / 29.75000°S 25.31667°O | |
| Land |  Suid-Afrika |
| Provinsie | Vrystaat |
| Distriksmunisipaliteit | Xhariep |
| Plaaslike Munisipaliteit | Kopanong |
| Stigting | 1842 |
| Oppervlak | |
| • Totaal | 53,2 km2 (20,5 vk. myl) |
| Bevolking | |
| • Totaal | 3 628 |
| • Digtheid | 68/km2 (180/vk. myl) |
| Tydsone | UTC+2 (SAST) |
| Poskode | 9978 |
| Skakelkodes | 051 |
| Webwerf | fauresmith.co.za |
Geskiedenis wysig
Met die vestiging van blankes in die omgewing het die behoefte vir 'n kerkplaas ontstaan. Na vele onderhandelinge met die Britse regering (sonder sukses), word daar eindelik 'n tydelike kerkie gebou op die plaas Sannahspoort - tans Fauresmith. Die kerkraad het daarna die plaas gekoop teen 14 000 ryksdalers (£1 050). Dadelik is daar begin om erwe te verkoop ten einde fondse te bekom om 'n permanente kerkgebou op te rig. Die verkoop van erwe was dan ook die gemeente se grootste bron van inkomste. Woonhuise, waarvan baie as kerkhuise gedien het (slegs gebruik as die eienaar kerk bywoon), het vinnig verrys. 'n Interessante verkoopsvoorwaarde was dat daar geen spiritualieë of ander sterk drank op enige van die erwe verkoop mag geword het nie. Die huidige gemeentes van Philippolis, Trompsburg, Edenburg, Petrusburg, Koffiefontein, Luckhoff en 'n groot deel van Jacobsdal het aan die gemeente behoort.
Twee jaar voor die stigting van die dorp het die inmenging van die Britse regering in die binneland gelei tot die daaropvolgende militêre botsing tussen Boer en Brit te Boomplaats, sowat 30 km van die huidige Fauresmith.
Op 30 Augustus 1851 is 'n vergadering gehou te Sannahspoort, maar bo-aan die notule staan die naam "Fauresmith".
Naas Bloemfontein was Fauresmith die belangrikste dorp en distrik in die Oranje Vrystaat. Die eerste volksraad moes tussen die twee kies om te besluit watter een die hoofstad van die Oranje Vrystaat sou wees. Met 'n meerderheid van twee stemme het die keuse op Bloemfontein geval.
Fauresmith het die twyfelagtige eer dat dit die Suid-Afrikaanse dorp is waar 'n gemeente van die Gereformeerde Kerk met die langste geskiedenis tot dusver ontbind het, want toe die plaaslike kerk in 2010 ophou bestaan, was dit 145 jaar oud.[2]
Omgewing wysig
Fauresmith is die enigste dorp in Suid-Afrika en een van slegs drie in die wêreld, waar die treinspoor in die middel van die hoofstraat loop.
Die dorp is welbekend in perdekringe vir die jaarlikse Internasionale Perde-uithourit wat in Julie plaasvind. Gedurende die uithourit voltooi die perde met hul ruiters 205 km oor die drie dae van kompetisie.
Die winters is baie koud met nagtemperature van onder vriespunt wat algemeen voorkom.
Bekende boorlinge wysig
- Nicolaas Havenga (1882-1957) - minister van finansies onder Eerste Ministers J. B. M. Hertzog (1929-1934) en D. F. Malan (1948-1954).
- Philippus Jacobus Olivier (1911-1958) - administrateur van Kaapland, na wie die Hoërskool PJ Olivier in Grahamstad genoem is.
Sien ook wysig
Verwysings wysig
- ↑ Som van die hoofplekke Ipopeng en Fauresmith tydens die 2011-sensus.
- ↑ Vogel, ds. W. 2013. Die Almanak van die Gereformeerde Kerke in Suid-Afrika vir die jaar 2013. Potchefstroom: Administratiewe Buro.