Fidjiaanse Rugbyunie
Die Fidjiaanse Rugbyunie (Engels: Fiji Rugby Union, afgekort “FRU”) is die bestuursliggaam wat rugby en sewesrugby in Fidji beheer. Die beheerliggaam is in 1913 gestig en in Suva gesetel. Sedert 1987 verteenwoordig dit Fidji by Wêreldrugby en sedert 2000 ook by Oseanië Rugby (“OR”).
| Fidjiaanse Rugbyunie | |
|---|---|
 Kenteken van die Fidjiaanse Rugbyunie
| |
| Engelse naam | Fiji Rugby Union |
| Afkorting | FRU |
| Land |  Fidji
|
| Sportsoorte | Rugby, Sewesrugby |
| Stigting | 1913 |
| Lid van | Wêreldrugby |
| Aangesluit in | 1987 |
| Vastelandse beheerliggaam | Oseanië Rugby |
| President | Filipe Q. Tuisawau |
| Setel | Suva, Fidji |
| Amptelike tale | Engels en Fidjiaans |
| Amptelike webwerf | fijirugby.com |
Geskiedenis wysig
Die Fidjiaanse Rugbyunie is in 1913 gestig onder die naam Fidjiaanse Rugbyvoetbalunie (Fiji Rugby Football Union, FRFU), maar tot in 1945 het ook die Fiji Native Union bestaan, wat in dié jaar in die FRFU geïntegreer is. In 1963 het die beheerliggaam sy huidige naam aanvaar. In 1987, net voor die eerste rugbywêreldbekertoernooi, het dit ’n volle lid van die Internasionale Rugbyvoetbalraad (IRVR; nou Wêreldrugby) geword.[1] Daarbenewens was die Fidjiaanse Rugbyunie in 2000 ’n stigtingslid van die Vereniging van Oseaniese Rugbyunies (Federation of Oceania Rugby Unions, FORU; nou Oseanië Rugby).[2]
Taak wysig
Die Fidjiaanse Rugbyunie organiseer verskeie nasionale spanne, insluitend Fidji se nasionale seniorrugbyspan vir mans (die Vlieënde Fidjiane), vroue en jeug. Die FRU hou ook toesig oor sewesrugby in Fidji en aangesien dit ’n Olimpiese sportsoort is, werk hulle met die Fidjiaanse Nasionale Olimpiese Komitee saam. Fidji is een van die min lande waar rugby die hoofsport is. Slegs die Cookeilande, Nieu-Seeland, Samoa, Tonga en Wallis kan soortgelyke bewerings maak.[3] Naas die amptelike nasionale span roep die Fidjiaanse Rugbyunie ook ander keurspanne byeen. Fiji Warriors is die tweede nasionale span van Fidji en hulle neem aan Wêreldrugby se Stille Oseaan-uitdaging deel. Die Fiji Sevens is die Fidjiaanse sewesrugbyspan en hulle neem aan internasionale toernooie soos Wêreldrugby se Sewesreeks, Sewesrugbywêreldbeker, Olimpiese Somerspele en die Statebondspele deel.[4] Daarbenewens bestuur die beheerliggaam kinder- en jeugrugby in Fidji. Kinders en jongmense word reeds op skool aan rugby bekend gestel en na gelang van hul belangstelling en talent begin hul met hul afrigting.[5] Net soos ander rugbylande beskik Fidji oor ’n o/20-nasionale span wat aan die Wêreldrugby o/20-kampioenskap deelneem.[6]
As deel van die Stille Oseaan-eilande Rugbyalliansie het die beheerliggaam van 2004 wedstryde gereël van die Stille Oseaan-eilanders, ’n gemeensame keurspan van die drie Stille Oseaan-eilandstate Fidji, Samoa en Tonga. Aangesien die Stille Oseaan-eilanders nie die gewenste inkomste vir die beheerliggame gegenereer het nie, het die Samoaanse beheerliggaam dié samewerking in 2009 beëindig.[7] Sedert 2022 word Fidji in die internasionale Superrugbytoernooi verteenwoordig deur die professionele span Fijian Drua, wat aan dié toernooi deelneem saam met spanne uit Australië, Nieu-Seeland en een uit die Stille Oseaan-eilande (feitlik die Cookeilande, Fidji, Samoa en Tonga).[8]
Die beheerliggaam reël ook die plaaslike kompetisies. Die hoogste rugbyliga in die land is die Skipperbeker wat in 1963 gestig is.
Kenteken wysig
Die Fidjiaanse Rugbyunie se kenteken toon ’n palmboom in wit voor ’n gestileerde rugbybal met ’n swart fraiing en die belettering Fiji Rugby daaronder. Die nasionale span se bynaam is Flying Fijians (“Vlieënde Fidjiane”).
Verwysings wysig
- ↑ (en) "Fiji". Wêreldrugby. Besoek op 27 Maart 2024.
- ↑ (en) Robert F. Dewey (2012). John Nauright, Charles Parrish (red.). Rugby Union Football, Pacific Islands. pp. 445–447. ISBN 978-1-59884-300-2.
{{cite book}}:|work=ignored (hulp) - ↑ (en) "Rugby History in Fiji". Teivovo. Geargiveer vanaf die oorspronklike op 14 November 2007. Besoek op 14 November 2007.
- ↑ (en) "National 15s". Fidjiaanse Rugbyunie. Besoek op 27 Maart 2024.
- ↑ (en) "Schools Rugby". Fidjiaanse Rugbyunie. Besoek op 27 Maart 2024.
- ↑ (en) "World Rugby U20 Championship". Wêreldrugby. Besoek op 27 Maart 2024.
- ↑ (en) "Samoa quits Pacific Islands Rugby Alliance". Planet Rugby. 17 Julie 2009. Geargiveer vanaf die oorspronklike op 21 Julie 2009. Besoek op 21 Julie 2009.
- ↑ (en) "Reports: Agreement reached for 12-team Super Rugby from 2022". SA Rugby Magazine. Besoek op 27 Maart 2024.