Gereformeerde kerk Andeon

Die Gereformeerde kerk Andeon is ’n gemeente van die Gereformeerde Kerk (GKSA) in die noordweste van Pretoria wat tot 1980 bekendgestaan het as die Gereformeerde kerk Pretoria-Booysens.

Gereformeerde Kerk
Andeon
Embleem van die Gereformeerde Kerke in Suid-Afrika.jpg
Vorige naam  Pretoria-Booysens
(tot 1980)
Sluit in  Booysens
Claremont (deels)
Kirkney
Denominasie  Gereformeerde Kerk
Klassis  Pretoria-Moot
Huidige predikant(e)  Cassie Aucamp
In kombinasie met  Bergsig
Belydende lidmate  148
Dooplidmate  28
Adres Hoewe 11, h.v. Fred Messenger- en Eldoretstraat, Andeon
Geskiedenis
Stigtingsdatum  28 November 1959
Afgestig van  Daspoort
Eerste predikant  M.A. Kruger (1963–1968)
Die Gereformeerde kerk Andeon.

Die gemeentegrense sluit, buiten die gelyknamige woonbuurt, ook Booysens, ’n gedeelte van Claremont en Kirkney in. Einde 2001 was hier 280 belydende en 89 dooplidmate, wat tot einde 2014 afgeneem het tot onderskeidelik 202 en 54. 'n Jaar later was dit 195 en 46.

Stigting en eerste kerkkompleksWysig

 
Die Nederduitsch Hervormde gemeente Wesmoot het Andeon se ou kerkkompleks in Booysens gekoop.

Die Gereformeerde kerk Andeon is op 28 November in die GKSA se eeufeesjaar (1959) van die Gereformeerde kerk Daspoort afgestig onder die naam Pretoria-Booysens. Aan die begin is dienste gesamentlik met Daspoort in hul kerkgebou gehou, maar later het Andeon oorgeskuif na die saal van die Laerskool Tuinrand. In 1961 het die gemeente sy eie gebouekompleks in Attiestraat begin bou en dit op 15 September 1962 in gebruik geneem. Hierdie A-raam-struktuur het groot gekleurde vensters voor en aan die kante wat tot op die grond afkom, ’n tipiese kappiekerk. Die Gereformeerde kerke Springs-Oos en Middelburg, Mpumalanga het later van die bouplanne oorgeneem. ’n Saal is aangrensend tot die kerk gebou, maar weens die vorm van albei dié geboue was dit moeilik om te vergroot.

Tweede kerkWysig

 
Ds. Lou van Wyk, leraar van 1972 tot 1977, hier afgeneem in sy laaste jaar aan die PU vir CHO, 1960.

Die gemeente het sy kerkgebou in 1979 aan die Nederduitsch Hervormde gemeente Wesmoot verkoop. Dié gemeente is op 6 Februarie 1954 gestig en het, heel ironies, einde 2014 ’n sieletal van 584 gehad, vergeleke met die Gereformeerde kerk wat die gebou verkoop het omdat dit nie vergroot kon word nie, se 256. Dis nie bekend waar Andeon intussen byeengekom het nie, maar vroeg in die tagtigerjare koop die kerkraad ’n kleinhoewe in Andeon en in 1980 verander die gemeente sy naam na die Gereformeerde kerk Andeon, pleks van Pretoria-Booysens.

Daar is dadelik beplan om ’n nuwe kerk op te rig. Die argitek Renier Roos het die dieselfde plan vir sowel Andeon as Akasia (net noord van Andeon) opgestel sodat die twee gemeentes die argiteksfooi kon deel. Die geboue is nie heeltemal eenders nie omdat hulle van verskillende steen (in Andeon se geval van Rosema- en Klawersteen) gebou is en die binneafwerking verskil. Aan albei kerkgeboue is ’n saal wat met voudeure van die kerkruimte geskei word, soos destyds die mode was.

Die gemeente het ’n orrel vir sy nuwe gebou van die NG gemeente Roodepoort aangekoop en dit laat ombou deur Ferne en Roelevelt. Die ou gebou se hoeksteen is verwyder en in die nuwe ingebou, saam met ’n nuwe hoeksteen. Die lidmate het self die banke gemaak van staal met mingerhout daarop.

In die laat 1970's is baie uitbreidings in die weste van Pretoria beplan en sou die lidmaattal ma verwagting drasties toeneem. Die gemeente se gebied bestaan uit omtrent 50% dorps- en 50% kleinhoewebewoners en dit het sin gemaak om eerder 'n groot gebou op te rig as om af te stig. Die nuwe kerkgebou was jare lank stampvol, maar baie van die uitbreidings het toe nie plaasgevind nie. Weens veroudering en verkleining van gesinne het die getalle afgeneem. Tans vind weer uitbreidings aan dié kant van die stad plaas, maar die bewoners daarvan is hoofsaaklik swart mense.

PredikanteWysig

  1. Pelser, dr. Hendrik Stephanus, 1960 – 1963 (aanvaar sy emeritaat)
  2. Hattingh, Gerhardus Arnoldus, 1964 – 1967
  3. Van der Merwe, Wynand Jacobus, 1968– 1971
  4. Van Wyk, Lourens Andries Stephanus, 1972 – 1977
  5. Heystek, dr. Nicolaas Philippus, 1977 – 1987
  6. Combrink, dr. Vorster, 1987 – 2005
  7. Aucamp, Casperus, 2005 – hede (tot 2018 in kombinasie met Bergsig)
  8. Steyn, Willem Jacobus, 2010 – 2012 (in kombinasie met Bergsig)
  9. Dednam, Antonie Johannes, 2015 – 2018 (in kombinasie met Bergsig)

BronneWysig

  • (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
  • (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
  • (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
  • (af) Venter, ds. A.A. (hoofred.) 1957. Almanak van die Gereformeerde Kerk in Suid-Afrika vir die jaar 1958. Potchefstroom: Administratiewe Buro.
  • (af) Venter, ds. A.A. (hoofred.) 1958. Almanak van die Gereformeerde Kerk in Suid-Afrika vir die jaar 1959. Potchefstroom: Administratiewe Buro.
  • (af) Vogel, Willem (red.). 2014. Die Almanak van die Kerke in Suid-Afrika vir die jaar 2015. Potchefstroom: Administratiewe Buro.

Sien ookWysig