Gereformeerde kerk Windhoek

Die Gereformeerde kerk Windhoek is die oudste van die drie Gereformeerde gemeentes in die Namibiese hoofstad, Windhoek.

Gereformeerde Kerk Windhoek
Sluit in	Windhoek en omgewing
Denominasie	Gereformeerde Kerk
Klassis	Etosha
Huidige predikant(e)	Henning Venter
Belydende lidmate	152
Dooplidmate	51
Adres	Lutherstraat 3 Eros Windhoek, Namibië
Geskiedenis
Stigtingsdatum	1937
Afgestig van	Gobabis
Eerste predikant	Demps van der Merwe 1950–'57

Die kerkgebou, 2017.

Die Gereformeerde kerk Windhoek was met sy stigting in 1937 die sesde gemeente in die destydse Suidwes-Afrika. In die distrik Windhoek, naby aan die dorpie Dordabis, het van 1935 af ook nog die gemeente Bitterwater bestaan, maar hy het in 1964 ontbind nadat daar vyf jaar vantevore reeds net 14 belydende en 13 dooplidmate was. Windhoek is dus die vyfde oudste Gereformeerde gemeente wat nog bestaan. Ook in die NG Kerk is sy Windhoekse gemeente die vyfde oudste. Dis ook die geval in die Hervormde Kerk, hoewel die Hervormde gemeente Windhoek eers op 25 November 1950 gestig is, 21 jaar ná die plaaslike NG gemeente en 13 jaar ná die Gereformeerde.

Aanvanklik het die lidmate op Windhoek op verskeie plekke eredienste gehou, onder meer in huise en sale. In 1952 het die gemeente eindelik sy eie kerkgebou opgerig. Omdat dié hoekige gebou met sy plat dak se buitemure plek-plek enkelstene vertoon wat uitstaan en dit nie geverf was soos die mure nie, het die gebou die bynaam Rosyntjiebroodkerk gekry.

Op 10 September 1977 het die Gereformeerde kerk Windhoek sy nuwe, ruim kerkgebou in gebruik geneem. Dié gebou van bruin bakstene kyk oor die hoofstad uit en is geleë op die hoek van Luther- en Liliencronstraat, Eros. Die argitek was Tinus du Plessis en Michiel Prinsloo, destyds die oudste Angola-Afrikaner, het die deur oopgesluit. ’n "Skatkis" van marmer is in die voorportaal geplaas vir kerkbydraes. Eers is vir ’n spesiaal ontwerpte orrel voorsiening gemaak, maar omdat die boukoste te hoog was, moes die gemeente ’n kleiner orrel aankoop. Die laaste fase van die kerkgebou is op 2 November 2002 afgehandel toe die korbeelklip in plek gelê is.

Predikante

1. Van der Merwe, dr. Daniël Charl Stephanus, 1950–1957
2. Van der Walt, dr. Jan Jacobus, 1957–1958
3. Jooste, Jacobus Andries, 1959–1962
4. Louw, Hermanus Albertus, 1962–1968
5. Yssel, Andries Gerhardus Christiaan, 1968–1988 (aanvaar sy emeritaat)
6. De Villiers, Philippus Petrus, 1984–1989
7. Van der Westhuizen, Philippus Jacobus Wilhelmus Schutte, 1988 – 9 Januarie 2000 (oorlede in die amp)
8. Reinecke, Hendrik, 1991–1999
9. Bingle, dr. Johannes Petrus, 2000–2010
10. Fanoy, dr. Pieter (Piet), 2010 – 2016
11. Venter, Henning Vorster, 24 Julie 2016 – hede

Galery

• 
  Ds. D.C.S. van der Merwe, van 1950 tot 1957 die eerste leraar.
• 
  Mev. ds. D.C.S. (Annie) van der Merwe, pastoriemoeder van 1950 tot 1957.
• 
  Dr. en mev. J.J. van der Walt, die leraarspaar van 1957 tot 1958.
• 
  Ds. J.A. Jooste, die leraar van 1959 tot 1962.
• 
  Ds. H.A. Louw, leraar van 1962 tot 1968.
• 
  Ds. Dries Yssel, leraar van 1968 tot 1988, toe hy in 1960 toerleier was van die Potchefstroomse studentetoneelvereniging, Thalia.
• 
  Ds. J.P. Bingle, leraar van 2000 tot 2010.
• 
  Ds. Henning Venter, die gemeente se predikant sedert 2016.

Bronne

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• (en) Potgieter, D.J. (hoofred.) Standard Encyclopaedia of Southern Africa. Cape Town: Nasionale Opvoedkundige Uitgewery Ltd., 1973.
• (en) Raper, P.E. 1987. Dictionary of South African Place Names. Johannesburg: Lowry Publishers.
• (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
• (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• (af) Venter, ds. A.A. (hoofred.) 1957. Almanak van die Gereformeerde Kerk in Suid-Afrika vir die jaar 1958. Potchefstroom: Administratiewe Buro.
• (af) Venter, ds. A.A. (hoofred.) 1958. Almanak van die Gereformeerde Kerk in Suid-Afrika vir die jaar 1959. Potchefstroom: Administratiewe Buro.
• (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.

Sien ook

• Gereformeerde Kerke in Namibië