Gert Hendrik Jacobus Kruger (distrik Burgersdorp, Kaapkolonie, 18 Oktober 1871 – onbekend) was ’n plaaslike leier in die Nasionale Party en kerkraadslid in die Gereformeerde Kerk

Gert Kruger.
Die Gereformeerde kerk Postmasburg, waarvan die hoeksteen in 1906 gelê is en wat Gert Kruger help bou het.

Kruger het grootgeword in die distrik Venterstad, maar in 1888, toe hy 16 of 17 jaar oud was deurgetrek na Griekwaland-Wes en eindelik gaan boer op die plaas Venn, distrik Kuruman. Hy was sedert 1915 ’n getroue ondersteuner van die Nasionale Party en voorsitter van die tak Venn. In 1915 was hy veldkornet en het die voorreg gehad om ’n paspoort na Suidwes-Afrika te gee aan ’n vroeëre veldkornet onder die SAP-regering. Tydens die Rebellie het hy met die opstandelinge gesimpatiseer. Sy tweede vrou, Susanna Levina (geb. 18 Januarie 1888), dogter van Jan Coetzee van Middelburg, Kaap, met wie hy in 1908 getroud is, het die manne onder genl. Kemp gratis van kos voorsien toe hulle oor die plaas getrek het. Uit dié huwelik is blykbaar net ’n dogter, Martha Helena, gebore.

Kruger was lidmaat van die Gereformeerde Kerke en ouderling van die gemeente Olifantshoek. Hy het die kerk op Postmasburg, waarvan die hoeksteen op 8 Desember 1906 gelê is, help bou terwyl hy daar in die kerkraad gedien het. Gereformeerde eredienste is reeds van 1912 af op die plaas Gamyana en later in die pakkamer van Van Druten se winkel op Olifantshoek gehou. Op Saterdag 18 Oktober 1919 is die hoeksteen van die kerkgebou gelê waarop Afrikaanse bewoording vir die eerste keer voorkom: "Dit is van die Here geskied, dis lieflik voor ons oë" (Psalm 118:23). Op 23 April 1921 het die Gereformeerde kerk Olifantshoek dan ook van die Gereformeerde kerk Postmasburg afgestig, waarna Kruger kerkraadslid van die nuwe gemeente was waarvan hy ook die kerk help bou het. So het hy albei dorpe oor meer as 30 jaar sien groei. Hy was vanaf omstreeks 1928 lid van die afdelingsraad van Kuruman.

Bron wysig

  • (af) (en) Reitz, Hjalmar en Oost, Harm (reds.), Goodman, I.M. (samesteller). 1931. Die Nasionale Boek. 'n Geskiedenis van die ontstaan en groei van die Nasionale Party van Suid-Afrika en wat dit bereik het, tesaam met belangwekkende Artiekels in verband daarmee. Johannesburg: Nasionale Boek Maatskappy.