Guadalajara ([ɡwɑːdələˈhɑːrə], Spaans: Ciudad de Guadalajara) is die hoofstad en grootste stad van die Meksikaanse deelstaat Jalisco, die tweede grootste stad van Meksiko ná Meksikostad en is op 14 Februarie 1542 deur Spanjaarde onder Cristóbal de Oñate as Espíritu Santo (die Heilige Gees) gestig. Die stad het 'n bevolking van 1 495 182 en van 4 434 252 in die metropolitaanse gebied Guadalajara/Zapopan in 2010 gehad en het 'n oppervlakte van 699 km².
Kaart van die metropolitaanse gebied Guadalajara/Zapopan.
Die katedraal van Guadalajara.
Guadalajara is geleë net suidoostelik van Zapopan, noordwes van Meksikostad en suidwes van León. Die stad staan bekend as Perla del Occidente, die pêrel van die Weste, is 'n belangrike ekonomiese sentrum en knooppunt vir lug- en padvervoer. In 1818 en 1875 is Guadalajara deur swaar aardbewings verwoes en daarna weer opgebou. Die Hospicio Cabañas van Guadalajara is in 1997 deur die UNESCO as 'n wêrelderfenisgebied gelys.