Maak hoofkeuseskerm oop
Janneke Rumpff-Kruger.

Janneke Kruger (gebore Rumpff, Groningen, Nederland, datum onbekend – plek en datum onbekend) was ’n vroedvrou en leiersfiguur in vroueverenigings van die Gereformeerde Kerke in Suid-Afrika.

Janneke was blykbaar die enigste dogter van Frans Rumpff (1850–1916)[1] en Pieterke Kloosterhuis (25 September 1845 – 13 November 1923).[2] Sy het in 1915 na Suid-Afrika gekom en haar gevestig op Venterstad waar haar broer, ds. Derk Rumpff, toe reeds sedert die vorige jaar leraar van die plaaslike Gereformeerde gemeente was. Haar ouers het hulle waarskynlik saam met haar op Venterstad gevestig, want albei is in die plaaslike kerkhof begrawe. Janneke se broer het reeds begin 1899, toe hy 20 jaar oud was, na Suid-Afrika gekom en die Tweede Vryheidsoorlog saam met die Transvaalse Boeremagte deurgemaak. Daarna het hy as onderwyser in Transvaal opgetree. Ná ’n paar jaar is hy terug na Nederland om daar verder in die teologie te studeer. In 1910 het hy teruggekeer in Suid-Afrika en getrou met Femke Molenaar, wie se vader argitek was in Groningen. Van Standerton was hy predikant van 1910 tot 1913 en van Petrusburg van 1913 tot sy koms na Venterstad in die daaropvolgende jaar.

Ds. Rumpff het in 1920 ’n beroep na die Gereformeerde kerk Heidelberg (Tvl.) aangeneem en daar gebly tot 1922, waarna hy tot 1941 leraar van die Paul Kruger-kerk in Pretoria. Sy suster en moeder het blykbaar telkens saam met ds. en mev. Rumpff verhuis, want nadat sy vroedvrou op Venterstad was, het Janneke Rumpff dié beroep ook op Heidelberg, Tvl., beoefen. In Pretoria was sy medestigster van die vereniging Die Gereformeerde Sustershulp. Sy is tot komiteelid benoem en was ook twee jaar lank wyksuster.

In 1928 is sy met G. Kruger van die plaas Springfontein, distrik Venterstad, getroud. Te oordeel na haar broer (gebore in 1878) se ouderdom was sy as mev. Kruger moontlik reeds te oud om kinders te hê.

Janneke Kruger was ten gunste van die idee van ’n Algemene Sustersvereniging vir die vroue van die Gereformeerde Kerk en het meermale in dié verband van haar laat hoor in die vrouerubriek van Die Kerkblad. As afgevaardigde van Venterstad was sy in 1932 op Potchefstroom op die eerste kongres teenwoordig. Sy is tot die bestuur van die Algemene Gereformeerde Sustersvereniging verkies en het Kaapland verteenwoordig saam met Ella Eloff-van der Walt, eggenote van ds. S.J. van der Walt, predikant van die gemeente Molteno. In 1936 is Janneke Kruger tot lid van die Uniale Komitee benoem toe die Bond van Gereformeerde Verenigings tot stand gekom het. Met die eerste Bondskongres van Kaapland is sy tot voorsitster verkies en het in dié hoedanigheid gedien tot sy weens haar man, wat in 1947 oorlede is, se siekte gedwing is om af te tree. In 1955 het sy haar in Pretoria gevestig.

Met die eeufees van die Gereformeerde Kerk in 1959 het Ida Bosman in die gedenkboek Die Gereformeerde Kerk van mev. Kruger geskryf: "Kaapland het in tante Janneke, soos die Bondslede haar genoem het, ’n bekwame leidster gehad. In besielende woorde het sy tydens die sittings van kongresse gewag gemaak van die geestelike stryd wat die vrou moet aanknoop sodat sy, innerlik ontwikkel, ander tot seën kan wees."

BronWysig

  • (af) Die Gereformeerde Vroueblad. 1959. Die Gereformeerde vrou 1859–1959. Potchefstroom: Potchefstroom Herald.

VerwysingsWysig

  1. (en) (af) Sy grafsteen op die webtuiste van die GGSA. URL besoek op 13 November 2016.
  2. (en) (af) Haar grafsteen op die webtuiste van die die GGSA. URL besoek op 13 November 2016.