Maak hoofkeuseskerm oop

Leicester (Engels: [ˈlɛstər] is 'n stad en unitary authority in die East Midlands-streek van Engeland wat as die administratiewe sentrum van Leicestershire fungeer. Die stad is aan die Soarrivier en naby die National Forest-bosgebied geleë.

City of Leicester
Leicester landmarks montage.jpg
Wapen van City of Leicester
Wapen
Ligging van City of Leicester op 'n kaart (Engeland)
City of Leicester
City of Leicester
Koördinate: 52°38′00″N 1°08′00″W / 52.63333°N 1.13333°W / 52.63333; -1.13333Koördinate: 52°38′00″N 1°08′00″W / 52.63333°N 1.13333°W / 52.63333; -1.13333
Land Vlag van Verenigde Koninkryk Verenigde Koninkryk
Land (VK) Vlag van Engeland Engeland
Graafskap Leicestershire
Stigting 50
Stadstatus herstel 1919
Regering
 - Burgemeester Sir Peter Soulsby
Oppervlak
 - Stad  28,31 vk m (73,32 km²)
Bevolking (2011)
 - Stad 329 600
 - Digtheid 10 826,2/myl2 (4 180/km²)
 - Stedelik 441 213
Tydsone MGT (UTC+00:00)
 - Somer (DST) BST (UTC+01:00)
Poskode LE
Skakelkode(s) 0116
Webwerf: leicester.gov.uk

Met 'n bevolking van 330 000 in die unitary authority en 440 000 in Groter Leicester (Leicester Urban Area) volgens die sensus van 2011 is Leicester die tiende grootste stad in die Verenigde Koninkryk, die grootste stad in die East Midlands asook die tweede grootste in die hele Midlands-streek na Birmingham. Opvallend is die hoë persentasie van jong inwoners (in 2011 was 27 persent van die bevolking 19 jaar oud of jonger) asook die groot aandeel bewoners van nie-Britse afkoms. Leicester huisves die grootste gemeenskap van etniese minderhede en immigrante in die Koninkryk, veral danksy immigrasie uit Suid-Asië.

As 'n belangrike kommersiële en nywerheidsentrum lewer Leicester se ekonomie, die grootste in die East Midlands, met sowat £11 miljard 'n kwart van dié streek se totale bruto geografiese produk op en bied werkgeleenthede vir 437 000 mense.

Ondanks sy industriële ontwikkeling het Leicester 'n buitengewone persentasie van historiese geboue en strukture bewaar. So dateer antieke Romeinse sypaadjies en badhuise uit die tyd toe Leicester as Ratae Corieltauvorum 'n Romeinse militêre buitepos in 'n gebied was wat deur die Keltiese Corieltauvi-stam bewoon is.

Min is bekend oor die vroeë middeleeuse geskiedenis van die nedersetting nadat Romeinse troepe uit Brittanje onttrek is, maar nadat dit deur die Dene ingeneem is het dit een van vyf versterkte nedersettings in die Deens-oorheerste Danelaw-gebied van Engeland geword. Die stadsnaam is volgens geskiedkundiges afgelei van die term castra van die Ligore of "kamp van bewoners aan die Legro-rivier". Leicester verskyn in die Normandiese Domesday Book as Ledecestre.

Leicester is een van die oudste stede in Engeland wat vanaf omstreeks 670 as setel van 'n biskop gedien en sodoende stadstatus verwerf het. Dié status is egter herroep nadat die plaaslike adel en kerkowerhede in die 11de eeu in 'n stryd gewikkel was.

Leicester het in die moderne tydperk tot 'n belangrike markdorp gegroei, maar eers met die begin van die nywerheidsomwenteling is 'n proses van onbeplande stedelike groei in die gebied aan die gang gesit. Die industriële groei is in die 19de eeu deur 'n nuutgeboude netwerk van spoorweë en kanale bevorder en het van Leicester 'n ekonomiese spilpunt met 'n verskeidenheid nywerhede, waaronder ingenieurswese, skoen- en tekstielvervaardiging gemaak sodat die stadsgebied gaandeweg na die voorheen landelike omgewing uitgebrei het. Die stadsgrense is in die 19de en 20ste eeu verskeie kere verskuif om nuut verstedelikte gebiede in te sluit. In 1889 het Leicester 'n county borough geword en in 1919 sy stadstatus herwin.

Vandag is Leicester 'n belangrike opvoedkundige sentrum en setel van twee tersiêre instellings, die Universiteit van Leicester en die De Montfort-universiteit. Die stad is langs die Midland Main Line-spoorroete en naby die M1-snelweg geleë.

Eksterne skakelsWysig