Philippus Bouwer

Philippus Lourens Steyn Bouwer (Montagu, Kaapkolonie, 25 Februarie 1903 – onbekend) was ’n Suid-Afrikaanse onderwyser en onder andere hoof van die Laerskool Nassau, Mowbray, Kaapstad.

Philippus Bouwer.

Vroeë loopbaan

Bouwer was die seun van Ernst Jacobus Bouwer. Hy het sy hele skoolloopbaan op Robertson deurgebring en in 1922 daar gematrikuleer. Op Robertson het hy vir die skool sowel as die dorp se eerste span rugby gespeel. In 1923 het hy ’n tydelike sekondêre betrekking op Rawsonville aanvaar en die volgende jaar ’n privaat plaasskoolbetrekking in die distrik Albert (die distrik waarvan Burgersdorp die setel is). In 1926 het hy die primêre-onderwyskursus aan die Oudtshoornse Opleidingskollege voltooi, en daarna twee jaar lank skoolgehou in die distrik Hopetown. In 1928 het hy assistent geword aan die spesiale primêre skool op De Aar. Hier het hy onder meer ’n skoolkrieketklub gestig en rugby gespeel vir die Conroy-unie.

Laerskool Nassau

In 1936 is hy aangestel as assistent aan die twee jaar oue Laerskool Nassau in Observatory en stig ’n skoolrugbyklub. In 1944 het hy met aandklasse aan die Universiteit van Kaapstad, ’n hanetree van die skool af, begin en gradueer in Desember 1948. Nadat hy etlike jare lank ’n spesiale graad primêre pos beklee het, is hy in 1952 aangestel as die Laerskool Nassau se skoolhoof.

Sowat 10 jaar later het die onderwysdepartement ’n nuwe gebou vir die Hoërskool Nassau in Montrealweg, Mowbray opgerig en kon die laerskool in Januarie 1962 uit Observatory na die hoërskool se ou gebou aan Hoofweg, Mowbray, verhuis. Bouwer was nie baie ingenome met die toestand van die ou hoërskool se terrein nie en skryf op 23 Augustus 1962 aan die Provinsiale Sekretaris in Kaapstad dat sy skool vanaf 1934 tot 1961 in Observatory was (waarvan hyself 25 van die 27 jaar) en dat hulle amper 300 bome aangeplant het. Hy versoek daarom bome van die departement ná hy reeds vertoë tot die stadsraad, skoolraad en departement van openbare werke gerig het. Op 24 September 1962 laat die provinsiale administrasie weet dat ook hulle nie bome kan voorsien nie.

Bron

• (af) (en) Kruger, dr. D.F. 1963. Wie is wie in Suid-Afrika. Johannesburg: Vitae Uitgewers.